សម្តេច ហ៊ុន សែន ស្នើឲ្យកងទ័ពជើងទឹកជប៉ុន បន្តកិច្ចសហប្រតិបត្តិការជំរុញតំបន់ឱ្យមានសន្តិសុខ និងសុវត្ថិភាព

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកទឹកចិត្តដោយស្នើឲ្យនាវាកងកម្លាំងស្វ័យការពារជើងទឹកជប៉ុន(JMSDF)បន្តកិច្ចសហប្រតិបត្តិការធ្វើយ៉ាងណាជំរុញតំបន់ឱ្យមានសន្តិសុខ និងសុវត្ថិភាព និងគោរពច្បាប់ឲ្យបានត្រឹមត្រូវ ។ សម្ដេចតេជោ ហ៊ុន សែន ស្នើបែបនេះទៅកាន់លោក Noguchi Yasushi មេបញ្ជាការកងពលធំបោសសំអាតមីនទី១នៃនាវាកងកម្លាំងស្វ័យការពារជើងទឹកជប៉ុន(JMSDF) នៅក្នុងជំនួបពិភាក្សាការងារនាល្ងាចថ្ងៃទី១៥ ខែមីនា ឆ្នាំ២០២២ នៅសណ្ឋាគារសុខា ខេត្តព្រះសីហនុ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ាង សុផល្លែត ជំនួយការសម្តេចតេជោ ហ៊ុន សែន​ បានមានប្រសាសន៍ឲ្យដឹងបន្ទាប់ពីជំនួបនោះថា លោក Noguchi  Yasushi បានសម្តែងការអបអរសាទរជូនចំពោះសម្តេចតេជោ ហ៊ុន សែន ដែលត្រូវបានធ្វើជាប្រធានអាស៊ាន និងបានសម្ដែងនូវអំណរគុណជូនចំពោះសម្តេចតេជោដែលបានផ្ដល់នូវកិច្ចសហប្រតិបត្តិការយ៉ាងល្អជាមួយជប៉ុន ជាពិសេស តាមរយៈលោក ហ៊ុន ម៉ាណែត ដែលបានបំពេញបេសកម្មនៅប្រទេសជប៉ុនកន្លងមក ។  លោក Noguchi ក៏បានប្ដេជ្ញាជូនសម្ដេចតេជោ ហ៊ុន សែន ថា លោកនឹងប្រឹងប្រែងឲ្យអស់ពីសមត្ថភាពដើម្បីធ្វើយ៉ាងណារក្សានូវសន្តិភាព និងសន្តិសុខក្នុងតំបន់ ។

ជាការឆ្លើយតប សម្តេចតេជោ ហ៊ុន សែន បានសម្តែងនូវក្ដីរីករាយដែលនាវាជប៉ុនបានចូលចតនៅកម្ពុជាហើយការចូលចតនេះគឺចំខួប៣០ឆ្នាំ PKO ហើយអ្វីដែលសំខាន់ជាងនេះទៅទៀត គឺការចូលចតនៃនាវាកងកម្លាំងស្វ័យការពារជើងទឹកជប៉ុននាពេលនេះ បានបង្ហាញឲ្យឃើញនូវភាពជោគជ័យនៃប្រតិបត្តិការPKO កាលពីរយៈពេល៣០ឆ្នាំកន្លងទៅ ។

តាមប្រតិបត្តិការ PKO រយៈពេល៣0ឆ្នាំកន្លងទៅនេះ សម្ដេចតេជោ បានសង្កេតឃើញថា តួនាទីរបស់ជប៉ុននៅក្នុងឆាកអន្តរជាតិក្នុងការស្វែងរកសន្តិភាពកាន់តែមានការរីកចម្រើនឡើង ហើយ PKO ដែលបានមកកាន់កម្ពុជាកន្លងមក មិនត្រឹមតែបានជួយរក្សាសុខសន្តិភាពដល់កម្ពុជាប៉ុណ្ណោះទេ នៅបានជួយជំរុញការអភិវឌ្ឍនៅកម្ពុជាថែមទៀតផង។

សម្តេចតេជោនាយករដ្ឋមន្ត្រីបានមានប្រសាសន៍ថា សម្ដេចពិតជាមានមោទនភាពណាស់ចំពោះកិច្ចប្រតិបត្តិការរបស់ PKO ហើយសម្ដេចបានលើកទឹកចិត្តសូមឲ្យបន្តកិច្ចសហប្រតិបត្តិការធ្វើយ៉ាងណាជំរុញតំបន់ឱ្យមានសន្តិសុខ និងសុវត្ថិភាព និងគោរពច្បាប់ឲ្យបានត្រឹមត្រូវ៕

ដោយៈណារី