ឯកឧត្តម ហ៊ុន ម៉ានី គូសបញ្ជាក់ពីភាពចាំបាច់ក្នុងការណែនាំ និងបង្ហាញពលរដ្ឋឲ្យចេះគូសសន្លឹកឆ្នោត

ឯកឧត្តម ហ៊ុន ម៉ានី បេក្ខជនតំណាងរាស្រ្ដមណ្ឌលកំពង់ស្ពឺ របស់គណបក្សប្រជាជនកម្ពុជា បានគូសបញ្ជាក់អំពីភាពចាំបាច់ក្នុងការណែនាំ និងបង្ហាញប្រជាពលរដ្ឋឲ្យចេះគូសសន្លឹកឆ្នោត សម្រាប់ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ ឆ្នាំ ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការគូសបញ្ជាក់នេះ បានធ្វើឡើងក្នុងពិធីសំណេះសំណាលជាមួយសមាជិក-សមាជិកាគណបក្សប្រជាជនកម្ពុជា ឃុំព្រៃវិហារ និងឃុំស្នំក្រពើ នៃស្រុកគងពិសី ខេត្តកំពង់ស្ពឺ កាលពីព្រឹកថ្ងៃទី ១១ ខែកក្កដា ឆ្នាំ ២០២៣។

ឯកឧត្តម ហ៊ុន ម៉ានី បានសរសេរនៅលើទំព័រហ្វេសប៊ុកថា បើតាមការកត់សម្គាល់ ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីឆ្នាំ ២០២២ លទ្ធផលសន្លឹកឆ្នោតឥតបានការទូទាំងប្រទេសមានចំនួនមួយគួរឲ្យកត់សម្គាល់។

ផ្អែកលើចំនុចនេះហើយ គឺជាមូលដ្ឋានដែលថ្នាក់ដឹកនាំ សមាជិក-សមាជិកា សកម្មជន គណបក្សប្រជាជនកម្ពុជា បាននិងកំពុងបន្តចូលរួមសកម្មភាពយ៉ាងហ្មត់ចត់ ក្នុងការណែនាំអំពីនីតិវិធី និងរបៀបគូសសន្លឹកឆ្នោតឲ្យបានត្រឹមត្រូវ និងបានការនៅតាមមូលដ្ឋាននីមួយៗ។

បើតាមឯកឧត្តម ហ៊ុន ម៉ានី ការបង្ហាញ និងសាកល្បងគូសសន្លឹកឆ្នោតឲ្យបានត្រឹមត្រូវ គឺជាការចូលរួមបន្តរម្លឹកជាថ្មីអំពីព័ត៌មានសំខាន់ៗ ដើម្បីធានាថា ប្រជាពលរដ្ឋ ជាពិសេសសមាជិក-សមាជិកា គណបក្សប្រជាជនកម្ពុជា និងអង្គបោះ ឆ្នោត មិនចាញ់បោកតាមចេតនាជំរុញចលនាបំផ្លាញសន្លឹកឆ្នោត ដោយក្រុមជនអគិតមួយចំនួន៕