សម្ដេចតេជោបង្ហាញមោទនភាពដែលបានការពារសម្ដេចព្រះនរោត្តម សីហនុ

ប្រធានព្រឹទ្ធសភា សម្ដេចតេជោ ហ៊ុន សែន បាន​បង្ហាញនូវមោទនភាពដែលរក្សាបាននូវសន្ដិភាពរបស់កម្ពុជាក្នុងពេលដែលសម្ដេចចេញមុខការពារឥស្សរជនមួយចំនួនដែលត្រូវបានតុលាការខ្មែរក្រហមចោទប្រកាន់ ក្នុងនោះ​ក៏មានសម្ដេចព្រះនរោត្តម សីហនុ ផងដែរ។

ថ្លែងក្នុងពិធីបិទសន្និបាតសមាគមឧកញ៉ា ល្ងាចថ្ងៃទី១៤ ខែមីនា ឆ្នាំ២០២៥នេះ សម្ដេចតេជោ ហ៊ុន សែន បានរម្លឹកពីយុទ្ធសាស្ត្ររដ្ឋាភិបាលដែលសម្ដេចបានដាក់តាំងពីឆ្នាំ១៩៩៨មកដោយពង្រឹងនូវសន្ដិភាព កុំឱ្យប្រទេសកម្ពុជាកើតសង្គ្រាមឡើងវិញ។ សម្ដេចបានរម្លឹកទៅពេលមួយដែលសម្ដេចជួបពិភាក្សាជាមួយអតីតអគ្គលេខាធិការអង្គការសហប្រជាជាតិលោក បាន គឹមមូន នៅភ្នំពេញ​ដែលពេលនោះសម្ដេចថា «ខ្ញុំសុខចិត្តឱ្យតុលាការខ្មែរក្រហមបរាជ័យ តែមិនឱ្យកម្ពុជាកើតសង្គ្រាមឡើងវិញទេ»។

សម្ដេចថាសម្ដេចមានមោទនភាពដែលកម្ពុជារក្សាបាននូវសិទ្ធអំណាចរបស់ខ្លួនក្នុងតុលាការកូនកាត់ អង្គជំនុំជម្រះវិសាមញ្ញក្នុងតុលាការកម្ពុជា កាត់ទោសខ្មែរក្រហម។

សម្ដេចថា៖ «ម្សិលមិញខ្ញុំប្រជុំជាមួយបណ្ដាអនុប្រធានគណបក្ស និងមនុស្សសំខាន់ៗរបស់គណបក្សខ្ញុំនិយាយពីមោទនភាពនៃគណបក្សប្រជាជនដែលមានខ្ញុំដឹកនាំរាជរដ្ឋាភិបាល។ ខ្ញុំការពារបានឥស្សរជនដែលបានចោទប្រកាន់ខ្ញុំការពារបានរាប់ទាំងសម្ដេចព្រះនរោត្តម សីហនុ ព្រះបរមរតនកោដ្ឋ ក៏ត្រូវទទួលការកោះហៅរបស់តុលាការដែរ ខ្ញុំប្រាប់ច្បាស់ថាខ្ញុំអត់ធ្វើទេ។ ហើយគេចង់ពង្រីកការកាត់ទោសមនុស្សមិនតិចទេ សរុបចុងក្រោយខ្ញុំថាអត់ធ្វើទេ! ខ្ញុំឱ្យបរាជ័យចុះតែប្រទេសខ្ញុំអត់ត្រូវមានសង្គ្រាមទេ។ ឥឡូវតុលាការត្រូវបានបញ្ចប់ជាមួយនឹងសន្ដិភាពត្រូវបានរក្សា»។

គួរឱ្យដឹងដែរថាក្រោយពេលដែលខ្មែរសាធារណរដ្ឋដួលរលំនៅខែមេសា ឆ្នាំ១៩៧៥ ចុងឆ្នាំដដែលពួកកម្ពុជាប្រជាធិបតេយ្យបានតែងតាំងសម្ដេចព្រះនរោត្តម សីហនុ ជាប្រមុខរដ្ឋដែលគ្រាន់តែជារូបភាពប៉ុណ្ណោះ ហើយនៅ​ខែ​មីនា​ឆ្នាំ​១៩៧៦ សម្តេចព្រះនរោត្តម សីហនុ បានសម្រេចព្រះទ័យ​លា​លែង​ពី​តំណែងនេះ។ ក្រោយលាលែងពីតំណែងព្រះអង្គត្រូវបានខ្មែរក្រហមចាប់ឃុំខ្លួនក្នុងរាជវាំងរហូតដល់ថ្ងៃរបបអាវខ្មៅដួលរលំ ហើយសម្ដេចត្រូវបានជម្លៀសទៅកាន់ទីក្រុងប៉េកាំង ប្រទេសចិន៕

អត្ថបទដោយ ហ៊ុន សិរីវឌ្ឍន៍