​កសិករ​សប្បាយ​ចិត្ត​ឃើញ​ដំណាំល្ពៅ​ និង​តាសក់​ស្រូវ​ឡើង​ថ្លៃ​ជាង​ឆ្នាំមុន​

តម្លៃផ្លែល្ពៅ និងតាសក់ស្រូវនៅផ្សារមាត់កំពង់ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង មានតម្លៃខ្ពស់ជាងឆ្នាំមុន ធ្វើ​ឱ្យ​ប្រជាកសិករមានទឹកចិត្តសប្បាយរីករាយក្នុងការប្រមូលផលយកទៅលក់។

ប្រជាកសិករភូមត្រពាំងចាន់ អ្នកស្រី ប្រាក់ ប៊ុនថា អាយុ ៥៥ ឆ្នាំ បានឱ្យដឹងថា ការដាំដុះ​ផ្លែល្ពៅ​ និង​ផ្លែ​តាសក់ស្រូវ​ក្នុងចម្ការ​​នៅឆ្នាំនេះ​ លក់​បាន​តម្លៃ​ខ្ពស់​ជាង​ឆ្នាំ​ទៅ​ ដែល​អាច​ធ្វើ​ឱ្យ​រូប​គាត់​ក៏ដូច​ជា​ប្រជាកសិករ​ដទៃទៀត​នៅក្នុងស្រុកបរិបូណ៌​សប្បាយរីករាយ​ក្នុងការប្រមូលផល​ផងដែរ។

កសិករដដែលរូបនេះបន្តថា ផ្លែល្ពៅ​លក់បោះដុំ​នៅក្នុង​ថ្ងៃនេះ​មានតម្លៃ​​មួយគី​ឡូ​ពី​ ៥០០ រៀល ទៅ ១ ០០០ រៀល តាមតូចតាមធំ។ ចំណែកផ្លែតាសក់​ស្រូវវិញគឺលក់បោះ​ឱ្យម៉ូយក្នុង​តម្លៃ​មួយៗ​ពី ១០០០ រៀលទៅ ៣ ០០០ រៀល តាមតូចតាមធំ។

មូលហេតុធ្វើដំណាំពីរប្រភេទនេះឡើងថ្លៃដោយសារតែ ប្រជាកសិករភាគច្រើនក្នុងឆ្នាំនេះមិន​បានបាន​ដាំដុះ​ផ្លៃល្ពៅ និងផ្លែតាសក់ស្រូវទេគឺគេដាំដំណាំសណ្ដែកបាយឬឪឡឹកជំនួសវិញ។

ព្រោះថាតម្លៃផ្លែល្ពៅ​ក្នុង​ឆ្នាំមុនមួយគីឡូលក់បានតែ ១៥០ រៀលទៅ ៣០០ រៀល និងផ្លែតាសក់​ស្រូវវិញ​​មួយផ្លែៗ​លក់​បាន​ពីថ្លៃ ៥០០ រៀលទៅ ១ ០០០ រៀលតែប៉ុណ្ណោះ។

កសិករ ប្រាក់ ប៊ុនថា បានបញ្ជាក់ ឲ្យដឹងទៀតថា ទោះបីការប្រមូលផលដំណាំដាំដុះខាង​លើនេះ​លក់​ដូរក្នុង​ទីផ្សារមានតម្លៃខ្ពស់ក៏ដោយ ប៉ុន្តែប្រជាកសិករយើងមិនទទួលបានផលចំណេញ​បាន​ច្រើន​នោះទេ។

ព្រោះថាតម្លៃជីដាក់ដំណាំពីឆ្នាំមុនក្នុងមួយការ៉ុងតែ ១០ ម៉ឺនរៀល តែក្នុងឆ្នាំនេះមួយ​ការុងថ្លៃដល់​ទៅ​២០ ម៉ឺនរៀល។ ចំណែកប្រេងម៉ាស៊ូតនិងប្រេងសាំងឆ្នាំមុនក្នុងមួយលីត្រថ្លៃតែ ៣ ០០០ ទៅ ៣ ៥០០​ ឥឡូវឆ្នាំ នេះឡើងទៅដល់ ៥ ០០០ រៀលទៅ ៥៥០០រៀល។ ហេតុនេះហើយ​បើប្រៀបធៀប​ និងការ​ចំណាយជាមួយការប្រមូលផលលក់ចេញវិញនោះ គឺមិនបានចំណេញច្រើននោះទេ៕

អត្ថបទ៖ ឈៀង ថារិទ្ធ