សន្តិសុខសង្គម

សមត្ថកិច្ចចុះរដ្ឋបាលត្រួតពិនិត្យកន្លែងស្នាក់នៅ ១៣៤ ទីតាំង ក្នុងរាជធានីភ្នំពេញ រកឃើញជនបរទេសខុសច្បាប់មួយចំនួនពាក់ព័ន្ធបទល្មើសផ្សេងៗ គ្នា

បានផុស

៤ ខែ មុន

នៅ

ថ្ងៃចន្ទ ៩ មីនា ២០២៦

ដោយ

កាលពីថ្ងៃទី ០៨ ខែមីនា ឆ្នាំ ២០២៦ កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ បានបន្តប្រតិបត្តិការចុះរដ្ឋបាលពិនិត្យទីតាំងស្នាក់នៅ ១៣៤ ទីតាំង ក្នុងភូមិសាស្ត្ររាជធានីភ្នំពេញ រកឃើញជនបរទេសខុសច្បាប់មួយចំនួនជាប់ពាក់ព័ន្ធបទល្មើសគ្រឿងញៀន , ស្នាក់នៅដោយខុសច្បាប់ និងលបលួចឆ្លងដែនមកកម្ពុជាដោយខុសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបន្តចុះពិនិត្យរដ្ឋបាលទ្រង់ទ្រាយធំនេះ ធ្វើឡើងក្រោមការដឹកនាំរបស់លោកអភិបាលរងរាជធានីភ្នំពេញ ០៣ រូប ដោយមានការចូលរួមពីកម្លាំងស្នងការដ្ឋាននគរបាលរាជធានីភ្នំពេញ , កម្លាំងកងរាជអាវុធហត្ថរាជធានី និងអាជ្ញាធរពាក់ព័ន្ធនៅតាមមូលដ្ឋានខណ្ឌចំនួន ០២ គឺ ខណ្ឌច្បារអំពៅ និងខណ្ឌពោធិ៍សែនជ័យ។

ជាលទ្ធផល កម្លាំងអាជ្ញាធរចម្រុះ បានត្រួតពិនិត្យលើជនបរទេសសរុប ៥៩៨ នាក់ (ស្រី ១៦៧ នាក់) ដោយក្នុងចំណោមជនបរទេសមួយចំនួន ត្រូវបានរកឃើញថា មានពាក់ព័ន្ធបទល្មើសទាំង ០៣ ខាងលើ ក៏ត្រូវបានឃាត់ខ្លួនអមដោយការដកហូតវត្ថុតាងពាក់ព័ន្ធបទល្មើសមួយចំនួនធំផងដែរ។

ក្នុងការពិនិត្យរដ្ឋបាលនេះដែរ កម្លាំងអាជ្ញាធរមានសមត្ថកិច្ច ពុំបានរកឃើញថាមានទីតាំងណាមួយ ឬជនបរទេសណាម្នាក់ ជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា (Online Scams) នោះឡើយ។