ចាប់ខ្លួនអ្នកឆក់ត្រីខុសច្បាប់ម្នាក់បញ្ជូនទៅតុលាការ

ជនសង្ស័យអ្នកប្រើប្រាស់ឧបករណ៍ឆក់ត្រីម្នាក់ ត្រូវបានសមត្ថកិច្ចនគរបាលក្រុងកំពង់ឆ្នាំងចាប់ឃាត់ខ្លួន ខណៈកំពុងឆក់ត្រីនៅក្នងបឹង១កន្លែង ក្រោយវត្តភ្នំយោង ក្នុងភូមិទី៧ សង្កាត់ខ្សាម ក្រុងកំពង់ឆ្នាំង។

ការបង្ក្រាបបទល្មើសនេះបានធ្វើឡើងនៅវេលាម៉ោង១៥និង៣០នាទីល្ងាចថ្ងៃទី១៧ ខែឧសភា ឆ្នាំ២០២២ ។

លោកវរសេនីយ៍ឯក ឆាយ ខេមរ័ត្ន អធិការនគរបាលក្រុងកំពង់ឆ្នាំង បានអោយដឹងថា ជនសង្ស័យដែលត្រូវឃាត់ខ្លួនមាន ឈ្មោះ ក្រូច ចាន់រ៉ា ភេទប្រុស អាយុ៣៤ឆ្នាំ មានទីលំនៅភូមិទី១ សង្កាត់ខ្សាម ក្រុងកំពង់ឆ្នាំង។ ពេលសមត្ថកិច្ចឃាត់ខ្លួនរូបគេកំពុងធ្វើសកម្មភាពឆក់ត្រីនៅចំណុចក្រោយវត្តភ្នំយោង ។

វត្ថុតាងនៃបទល្មើសដែលសមត្ថកិច្ចដកហូតបានមាន អាំងវែទ័រឆក់ត្រី១គ្រឿង អាគុយ១គ្រឿង ដងឆក់ចំនួន២ ត្រីផ្ទក់ ត្រីរ៉ស់ ជាង ២គីឡូ និងពីដុងជ័រ១ ។

ជនសង្ស័យរួមទាំងវត្ថុតាងត្រូវបានសមត្ថកិច្ចកសាងសំណុំរឿងបញ្ជូនទៅការិយាល័យជលផល នៃមន្ទីរកសិកម្មរុក្ខាប្រមាញ់ខេត្តកំពង់ឆ្នាំង ដើម្បីចាត់ការបន្តបញ្ជូនទៅតុលាការខេត្តផ្ដន្ទាទោសតាមផ្លូវច្បាប់ ៕

អត្ថបទ៖ ឈៀង ថារិទ្ធ