អាជ្ញាធរខេត្តកំពតកំពុងមមាញឹកលើកផ្ទាំងរូបភាព ដាក់ភ្លើងបំភ្លឺផ្លូវមុនថ្ងៃបុណ្យអុំទូក

លោក ម៉ៅ ធនិន អភិបាលខេត្តកំពតបានជំរុញឲ្យមន្ត្រីក្នុងខេត្ត និងក្រុមការងារចុះពិនិត្យការដំឡើងផ្ទាំងរូបភាព និងការដាក់បំភ្លឺភ្លើងចម្រុះពណ៌នៅតាមតាមដងផ្លូវសាធារណៈនានាក្នុងក្រុងកំពត ដែលក្រុមជាងកំពុងមមាញឹករៀបចំដើម្បីឱ្យការតុបតែងមានសោភ័ណភាពសម្រាប់ទាក់ទាញភ្ញៀវទេសចរណ៍ជាតិ និងអន្តរជាតិដែលមកលេងកម្សាន្ត។

រដ្ឋបាលខេត្តបានបញ្ជាក់ថា៖ ការរៀបចំប្រារព្ធពិធីបុណ្យអុំទូកគឺនឹងធ្វើឡើងនៅមាត់ព្រែករយៈពេល៣ ថ្ងៃ ហើយក៏មានរៀបចំពិធីអកអំបុក សំពះព្រះខែទៅតាមប្រពៃណីជាតិយើងផងដែរ។ ជាមួយគ្នានេះពិធីបុណ្យអុំទូកនេះបានរៀបចំការប្រណាំងទូកងមានចំនួន១៣គូស្មើនិង២៦ទូកផងដែរ។

ទន្ទឹមនិងនេះដែរអាជ្ញាធរខេត្ត បានដាក់ផែនការដល់អាជ្ញាធរក្រុងស្រុកទាំង៩ ត្រូវគ្រៀមរៀបចំអញ្ជើញប្រជាពលរដ្ឋមកចូលរួមលេងកម្សាន្តក្នុងពិធីប្រណាំងទូកងឱ្យបានច្រើនកុះករ និងបានត្រៀមចំណាយថវិកាចំនួនសម្រាប់ជួយឧបត្ថម្ភជូនបងប្អូនប្រជាពលរដ្ឋមកចូលរួមប្រណាំងទូក។

ចំណែកក្រុមការងារយុវជនតាមអង្គភាពនានា ត្រូវរៀបចំវង់ភ្លេងរាំលេងកម្សាន្ត ដើម្បីកំដរពិធីបុណ្យអុំទូកឲ្យបានអធិកអធម្មនៅក្នុងក្រុងកំពតក៏ត្រូវមានការរៀបចំដាក់ឱមានតាំងពិពណ៌នៅតាមបណ្ដោយមាត់ព្រែកនេះរហូតទីតាំងប្រណាំងទូក ដែលកម្មវិធីនេះប្រគល់ជូនមន្ទីរ អប់រំយុវជនជាអ្នករៀបចំហើយពេលយប់ក៏រៀបចំពិធីដុតកាំជ្រូចអបអរសាទរផងដែរ។

ចំណែកនៅតាមដងផ្លូវជុំវិញក្រុងកំពត គឺត្រូវដាក់ភ្លើងបំភ្លឺនៅតាមដើមឈើទីឆ្លាសាធារណៈនៅក្នុងក្រុងទាំងអស់ រដ្ឋបាលខេត្ត និងរដ្ឋបាលក្រុង ត្រូវរៀបចំជាធ្វើជាតំបន់ត្រជាក់ស្វាគមន៍ប្រជាពលរដ្ឋនិងភ្ញៀវទេសចរណ៍មកលេងកម្សាន្តបានសប្បាយរីករាយផងដែរ។

សូមបញ្ជាក់ថា ក្រៅពីបំពាក់បំភ្លឺភ្លើងចម្រុះពណ៌នៅតាមដងផ្លូវ និងដើមឈើតាមទីធ្លាសាធារណៈ និងលើកប៉ាណូរំលេចរូបភាព និងមិត្តសញ្ញាឆ្នាំងទុរេន រូបអុំទូក នៅតាមសួនច្បារមាត់ព្រែក ក៏រៀបចំកាត់ផ្កាលំអរ លាបពណ៌តាមខឿនសួនច្បារ និងជួសជុលលាបពណ៌ផ្លែធុរេនដាក់បំភ្លឺភ្លើងចម្រុះពណ៌នៅរង្វង់មូលទុរេនផងដែរ៕

អត្ថបទ៖ សឹង រ៉ាត់