នគរបាលស្រុកសំរោងទងឃាត់ខ្លួនក្រុមបាញ់រថយន្ដនៅផ្លូវល្បឿនលឿនម្នាក់ក្នុងចំណោមបក្ខពួកផ្សេងទៀត

កម្លាំងនគរបាលនៃអធិការដ្ឋាននគរបាលស្រុកសំ​រោ​ងទង ខេត្តកំពង់ស្ពឺ បានសហការជាមួយកម្លាំងនគរបាលប្រចាំការលើ​ផ្លូវល្បឿនលឿនបើកប្រតិបត្ដិការស្រាវជ្រាវរហូតឈានដល់ការឃាត់ខ្លួនក្រុមជនសង្ស័យម្នាក់​ក្នុងចំណោមបក្ខពួកផ្សេងទៀតដែលតែងធ្វើសកម្មភាពបាញ់ និងគប់កញ្ចក់រថយន្ដអ្នកដំណើរលើផ្លូវល្បឿនលឿនដែលក្រុមជនង្ស័យទាំងនេះធ្វើសកម្មភាពជាច្រើនលើក។

ការឃាត់ខ្លួននេះបានធ្វើឡើងកាលពីវេលាម៉ោង២និង៣០នា​ទី ថ្ងៃទី២ ខែកក្ដដា ឆ្នាំ២០២៣។ យោងតាមរបាយការណ៍របស់ស្នងការដ្ឋាននគរបាលខេត្តកំពង់ស្ពឺបានឲ្យដឹងថា ជនសង្ស័យមានឈ្មោះ ឈឿម ដែន ហៅ ខ្មៅ ភេទប្រុស៣៣ឆ្នាំ ស្នាក់នៅភូមិអូក្រាំងអំបិល ឃុំត្រពាំងគង ស្រុកសំ​រោងទង ខេត្តកំពង់ស្ពឺ ខណៈបក្ខពួកផ្សេងទៀតកំពុងគេចខ្លួន។

តាមចម្លើយសារភាពរបស់ជនសង្ស័យបានឆ្លើយថា ខ្លួន និងបក្ខពួក​បានធ្វើសកម្មភាពយកចំពាមកៅស៊ូដាក់គ្រាប់ថ្មបាញ់​ក​ញ្ចក់រថយន្តដែលធ្វើដំណើរឆ្លងកាត់លើផ្លូវល្បឿន​លឿនម្ដុំអូរក្រាំងអំបិល និងផ្លូវជាតិលេខ៤ភូមិស្លា ហើយការធ្វើសកម្មភាពមិនរើសប្រភេ​ទ​រថយន្ដ និងពេលវេលានោះទេ​ អោយតែខ្លួន និងបក្ខពួកចេ​ញមកពីកន្លែងដែលស្នាក់នៅបណ្ដោះអាស​ន្ន​ (​ប្រើ​ប្រាស់គ្រឿងញៀន)​។

ជនសង្ស័យបន្ថែមថា កន្លងមកខ្លួនបានយកជំពាមដាក់គ្រាប់ថ្មបាញ់ទៅលើរថយន្ដជាច្រើនតែមិនដឹងថាចំ ឬបែកកញ្ចក់ ឬកំពិតនោះទេ​ តែការបាញ់គប់កញ្ចក់​រ​ថយន្ដមិនមែនមានតែខ្លួនទេ គឺមានបក្ខពួកផ្សេង​ទៀ​ត ហើយការបាញ់នោះ គឺពេលខ្លះមានប្រសិទ្ធភាព ពេលខ្លះមិនបានផលនោះទេ។

បើតាមរបាយការណ៍របស់ស្នងការខេត្តកំពង់ស្ពឺ ករណីនេះកម្លាំងនគរបាលជំនាញកំពុងបន្តស្រាវជ្រា​វរកក្រុមបក្ខពួកជនសង្ស័យបន្ថែមទៀតដើម្បីចាប់ខ្លួន និង​កសាងសំណុំរឿងបញ្ជូនអនុវត្ដតា​មនីតិវិធីច្បាប់៕

អត្ថបទ៖​ សុខុម