ប ស ស ប្រកាសឲ្យសាធារណជនប្រុងប្រយ័ត្នចំពោះការឆបោករបស់ក្រុមជនអណាមិកតាមរយៈបង់ភាគទាន

បេឡាជាតិសន្តិសុខសង្គម (ប.ស.ស.) បានប្រកាសដល់សាធារណជន ពិសេសប្រជាពលរដ្ឋដែលជាសមាជិក ប.ស.ស.ទាំងអស់ឱ្យបង្កើនការប្រុងប្រយ័ត្នខ្ពស់ចំពោះការឆបោករបស់ក្រុមជនអណាមិកតាមរយៈការបង់ភាគទាន។

បើតាម ប.ស.ស.បានបញ្ជាក់ថា ការប្រកាសនេះបានធ្វើឡើងបន្ទាប់ពីថ្មីៗនេះមានជនអាណាមិកបានបន្លំលេខគណនីធនាគាររបស់ ប.ស.ស និងចូលក្នុងគ្រុបតេឡេក្រាមឆាតរបស់ ប.ស.ស.ដោយបានបន្លំឈ្មោះជាភ្នាក់ងារ ប.ស.ស. និងបានយកឡូហ្គោលរបស់ ប.ស.ស.ទៅតាំងធ្វើជាប្រូហ្វាលដើម្បីឆបោក និងបានបញ្ចុះបញ្ចូលឱ្យសមាជិក ប.ស.ស.បង់ប្រាក់មកគណនីធនាគាររបស់ខ្លួនតាមរយៈការបង់ភាគទាន។

ករណីនេះបានបង្កឱ្យមានភាពភាន់ច្រឡំ និងបង្កើតឱ្យមានសេចក្តីមិនទុកចិត្តមកលើ ប.ស.ស.ហើយការក្លែងបន្លំនេះ បង្កឱ្យមានភាពប៉ះពាល់យ៉ាងធ្ងន់ធ្ងរចំពោះអង្គភាព ប.ស.ស.ជាពិសេសពលរដ្ឋដែលជាសមាជិក ប.ស.ស. ផ្ទាល់តែម្តង។
អាស្រ័យហេតុនេះ សូមពលរដ្ឋមេត្តាប្រុងប្រយ័ត្នឱ្យបានខ្ពស់ចំពោះការឆបោករបស់ក្រុមជនអណាមិកទាំងនេះ ចៀស​វាងខាតបង់ប្រាក់ ឬទ្រព្យសម្បត្តិផ្សេងៗ។

ប.ស.ស. បានបន្ថែមថា សម្រាប់ពលរដ្ឋជាសមាជិក ប.ស.ស. ជាបុគ្គលស្វ័យនិយោជន៍រាល់ពេលបង់ភាគទានមក ប.ស.ស. ត្រូវរកមើលពាក្យ “ប.ស.ស.បង់ភាគទានស្វ័យនិយោជន៍” ឬជាភាសាអង់គ្លេស “NSSF Self Employed”
ហើយប្រសិនបើពេលចុចបង់ភាគទាន តែមិនមានឃើញឈ្មោះដូចខាងលើទេ គឺមិនមែនជាគណនីរបស់ ប.ស.ស. ឡើយ ដូច្នេះ សូមកុំចុចបង់ ព្រោះជាការឆបោករបស់ក្រុមជនអណាមិក។ សម្រាប់មានចម្ងល់ផ្សេងៗ ឬមានការសង្ស័យណាមួយ សូមលោកអ្នកខលមកលេខ ១២៨៦ ឬ ១២៩៧ ឬអាចឆាតមកកាន់ Facebook Page ប.ស.ស. ឬតាមរយៈ Telegram Group ផ្លូវការរបស់ ប.ស.ស.។

លោក ហេង សុផាន់ណារិទ្ធ អគ្គនាយករង ប.ស.ស.នៃក្រសួងការងារនិងបណ្តុះបណ្តាលវិជ្ជាជីវៈ បានឱ្យដឹងថា ពាក់
ព័ន្ធករណីខាងលើនេះ ប.ស.ស.បាននិងកំពុងសហការជាមួយនាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃដើម្បីចាត់វិធានការនីតិវិធីតាមផ្លូវច្បាប់ និងស្រាវជ្រាវរកជនឆបោកខាលើមកផ្តន្ទាទោសតាមច្បាប់ជាធរមាន៕

អត្ថបទ៖ សំអឿន