សន្តិសុខសង្គម

អគ្គិភ័យឆេះបន្ទប់ធ្វើការនាយប៉ុស្ដិ៍បឹងកេងកងទី៣ ខូចខាតសម្ភារៈមួយចំនួន

បានផុស

១ year មុន

នៅ

ថ្ងៃចន្ទ ២៤ មីនា ២០២៥

ដោយ

អគ្គិភ័យមួយបានឆាបឆេះបន្ទប់ធ្វើការរបស់នាយប៉ុស្តិ៍នគរបាលរដ្ឋបាលបឹងកេងកងទី៣ ខណ្ឌបឹងកេងកង ផ្អើលសមត្ថកិច្ចចេញរថយន្តពន្លត់អគ្គិភ័យអន្តរាគមន៍បាញ់ពន្លត់ទាំងក្បាលព្រលប់ និងបណ្ដាលឲ្យខូចខាតសម្ភារៈមួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកេីតឡេីងនៅវេលាម៉ោង៦និង៣០នាទីព្រលប់ ថ្ងៃទី២៣ ខែមីនា ឆ្នាំ២០២៥ ចំណុចប៉ុស្តិ៍នគរបាលរដ្ឋបាលបឹងកេងកងទី៣ ផ្លូវ១៤៣ សង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានអោយដឹងថា មុនពេលកេីតហេតុ គឺមានកម្លាំងសមត្ថកិច្ចបានប្រចាំការនៅក្នុងប៉ុស្តិ៍ខាងលើ ហើយស្រាប់តែពេលកេីតហេតុមានការដាច់ភ្លើងនៅក្នុងប៉ុស្តិ៍ ដោយពួកគាត់សង្ស័យស្មានតែដាច់ភ្លើងទាំងអស់ ក៏ចេញរកមេីលស្រាប់តែផ្សែងហុយខ្មួលខ្មាញ់ចេញពីបន្ទប់លោកនាយប៉ុស្តិ៍ ដែលចាក់សោរចេញទៅក្រៅ។

ប្រភពដដែលបានបន្តទៀតថា ដោយឃើញសភាពបែបនេះ ពួកគាត់បានរាយការណ៍សុំជំនួយពីរថយន្តពន្លត់អគ្គិភ័យអោយមកជួយអន្តរាគមន៍បាញ់ពន្លត់។ ក្រោយទទួលព័ត៌មានភ្លាម ក្រុមរថយន្ដការិយាល័យនគរបាលបង្ការពន្លត់អគ្គិភ័យ របស់ស្នងការដ្ឋាននគរបាលរាជធានីភ្នំពេញ បានចេញអន្តរាគមន៍ចំនួន៧គ្រឿង និងបានធ្វើការបាញ់ពន្លត់១៤រថយន្តទេីបធ្វើអោយភ្លើងរលត់ទៅវិញនៅវេលាម៉ោង៧និង៤០នាទីយប់ថ្ងៃដដែល។

ពាក់ព័ន្ធហេតុការណ៍នេះ សមត្ថកិច្ចបានអោយដឹងថា ករណីនេះមិនមានគ្រោះថ្នាក់ដល់មនុស្ស និងរាលដាលដល់ផ្ទះរបស់ប្រជាពលរដ្ឋណានោះទេ ហើយអគ្គិភ័យនេះធ្វើឱ្យឆេះបន្ទប់ ទំហំ៤ម៉ែត្រ គុណ ៤ម៉ែត្រ ចំនួន១បន្ទប់ រួមមានម៉ាស៊ីនថតអត្តសញ្ញាណប័ណ្ឌចំនួន ១គ្រឿង, កុំព្យូទ័រចំនួន ១គ្រឿង រួមទាំងសម្ភារប្រើប្រាស់មួយចំនួនទៀត។
ចំពោះមូលហេតុបណ្តាលមកពីឆ្លងចរន្តអគ្គិសនីទេីបបង្កអោយការឆាបឆេះបែបនេះ៕

អត្ថបទ៖ សុខា