នគរបាលក្រុងតាខ្មៅ កោះហៅអ្នករត់កង់បីឥណ្ឌាដែលប្រើប្រាស់សម្ភារកងកម្លាំងមកសួរនាំ និងធ្វើកិច្ចសន្យាបញ្ឈប់សកម្មភាព

បន្ទាប់ពីបានឃើញការផ្សព្វផ្សាយនៅលើបណ្ដាលសង្គមពាក់ព័ន្ធករណីបុរសម្នាក់ជាអ្នករត់ម៉ូតូកង់បីឥណ្ឌា ប្រើប្រាស់សម្ភារកងកម្លាំងមានដូច អាយកូម អាយឌី រួមទាំងខ្នោះដៃ និងស្រោមកាំភ្លើងផងនោះ នៅថ្ងៃទី១ ខែឧសភា ឆ្នាំ២០២៥ កម្លាំងនគរបាលប៉ុស្ដិ៍រដ្ឋបាលកំពង់សំណាញ់ នៃអធិការដ្ឋាននគរបាលក្រុងតាខ្មៅ បានកោះហៅបុរសរូបនោះមកបំភ្លឺ និងបានធ្វើកិច្ចសន្យាអប់រំឲ្យបញ្ឈប់សកម្មភាពបែបនេះតទៅទៀត ព្រមទាំងបានដកហូតសម្ភារទាំងអស់ផងដែរ។

តាមការបញ្ជាក់ពីក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្ដាលឲ្យដឹងនៅរសៀលថ្ងៃទី១ ឧសភា នេះថា បុរសដែលប្រើប្រាស់សម្ភារកងកម្លាំងនេះមានឈ្មោះ នី​ សាលី​ អាយុ​៤៥ឆ្នាំ​ មុខរបរ​រត់កង់បី​ រស់នៅបន្ទប់ជួល​ស្ថិតនៅភូមិ​កំពង់សំណាញ់១​ សង្កាត់កំពង់សំណាញ់​ ក្រុងតាខ្មៅ។

តាមការបញ្ជាក់របស់អ្នកស្រី លឹម​ សុខឃៀង​ ដែលត្រូវជាប្រពន្ឋរបស់បុគ្គលខាងលើបានឱ្យដឹងថា​ ប្តីរបស់គាត់ ដោយ​សារ​តែការស្រឡាញ់របស់របរដូចជាកងកម្លាំង​មានដូចជា អាយកូម​ អាយឌី​ ខ្នោះដៃ ជាដើម។ល។ ពេលគាត់បានថវិកាពីកូនៗឱ្យខែបុណ្យទៀនក៏យកទៅទិញរបស់របរទាំងនោះយកមកប្រើប្រាស់ដោយមិនដឹងថា ខុសទៅនឹងច្បាប់ ឬប៉ះពាល់ដល់ស្ថាប័នមានសមត្ថកិច្ចនោះទេ។ តាមការបញ្ជាក់ពីស្ត្រីជាប្រពន្ធ ប្ដីរបស់គាត់ធ្លាប់ត្រូវរបួសក្បាលធ្ងន់ធ្ងរកាលពី១០ឆ្នាំ​មុន​ ចាប់តាំងពីពេលនោះ​មក ប្តីរបស់គាត់មានសតិមិនល្អដូចគេនោះទេ​ ការនិយាយស្តីក៏មិនសូវបានល្អដែរ​(និយាយមិនដឹងអី) ហេតុនេះសូមសមត្ថកិច្ចយោគយល់ផង​។ លោក​ នី​ សាលី​ ដែលជាសាម៉ីខ្លូន នៅព្រឹកថ្ងៃទី១ឧសភានេះ ក៏បានមកបំភ្លឺបន្ថែមដល់សមត្ថកិច្ចផ្នែកជំនាញនៅអធិការដ្ឋាននគរបាលក្រុងតាខ្មៅ ហើយបានទទួលស្គាល់កំហុសឆ្គងកន្លងមកផងដែរ។

ក្រោយពីសាកសួរ សមត្ថកិច្ចបានយកវិទ្យុទាក់ទងទាំងអស់មកត្រួតពិនិត្យឃើញថា វិទ្យុទាក់ទងទាំងនោះពុំមានភ្ជាប់ជាមួយកាណាល់ប៉ូសីលនោះទេ​ ចំណែកអាយកូមខ្លះបើកទៅលឺសំឡេង ខ្លះមិនដំណើរការ(ខូច)​។ ជាចំណាត់ការ កម្លាំងសមត្ថកិច្ចបានធ្វើកិច្ចសន្យាបញ្ឈប់នូវការប្រើប្រាស់រាល់សម្ភារផ្សេងៗដែលទាក់ទងនឹងកងកម្លាំង៕

អត្ថបទ៖ សុខុម