កីឡា

ប្រាប់កាសែតបរទេស លោក Pep Muñoz សរសើរ បាល់ទាត់ និងប្រជាជនកម្ពុជា

បានផុស

៧ ខែ មុន

នៅ

ថ្ងៃព្រហស្បតិ៍ ២៥ ធ្នូ ២០២៥

ដោយ

លោក Pep Muñoz អតីតគ្រូបង្វឹកព្រះខ័នរាជស្វាយរៀងបានកោតសរសើរពីបាល់ទាត់ និងប្រជាជនកម្ពុជាដ៏ល្អដែលលោកបានរៀនសូត្រច្រើនសម្រាប់ការស្នាក់នៅប្រទេសកម្ពុជាពីររដូវកាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសផ្តាច់មុខជាមួយសារព័ត៌មាន Urbanpitch លោក Pep Muñoz បានឆ្លើយឆ្លងជុំវិញជីវិតបាល់ទាត់របស់លោកក្នុងនាមជាគ្រូបង្វឹកដែលបានចាប់ផ្តើមពីប្រទេសអេស្ប៉ាញ ចិន និងកម្ពុជា។ ប្រទេស ៣ ផ្សេងគ្នា ប៉ុន្តែលោកមានទស្សនវិជ្ជាតែមួយតាមរយៈបាល់ទាត់ វប្បធម៌ និងអត្តសញ្ញាណ។

ចម្លើយដោយឡែកពីប្រទេសកម្ពុជា អតីតគ្រូបង្វឹករបស់ក្លិបព្រះខ័នរាជស្វាយរៀង បានកោតសរសើរពីក្លិបដែលលោកធ្វើការនៅកម្ពុជាមានរចនាសម្ព័ន្ធច្បាស់លាស់ដែលឈានដល់កម្រិតកំពូលនៅក្នុងតំបន់។ ជាមួយគ្នានេះ លីគបាល់ទាត់កម្ពុជាកំពុងពិតជាមានការប្រកួតប្រជែងខ្លាំង ហើយប្រជាជនកម្ពុជាផ្តល់នូវភាពកក់ក្តៅដល់មនុស្សជុំវិញខ្លួន។

លោក Pep Muñoz បានលើកឡើងថា ៖«ខ្ញុំបានរកឃើញក្លិបមានរចនាសម្ពន្ធដ៏ល្អដែលមាននាយកជាជនបរទេសយល់ច្បាស់ពីតម្រូវការវិជ្ជាជីវៈរបស់ខ្ញុំ។ ខ្ញុំមានអារម្មណ៍ថា ខ្ញុំអាចបញ្ចេញគំនិតយោបល់ពីបាល់ទាត់ដោយសេរី និងការគាំទ្រក្នុងនាមជាគ្រូបង្វឹកម្នាក់។ យើងបានរីកចម្រើនជាមួយគ្នាដោយការខិតខំប្រឹងប្រែងធ្វើការ ហើយយើងបាននាំ ព្រះខ័នរាជស្វាយរៀង ក្លាយជាក្លិបលំដាប់កំពូលមួយនៅអាស៊ីអាគ្នេយ៍»។

«ខ្ញុំអាចនិយាយបានថា កម្រិតលីគពិតជាមានការប្រកួតប្រជែងខ្លាំង ហើយមនុស្សម្នាភ្ញាក់ផ្អើលចំពោះអ្វីដែលក្រុមបាល់ទាត់របស់កម្ពុជាអាចប្រកួតប្រជែងនឹងក្រុមខ្លាំងៗពីបណ្តាប្រទេសដែលមានធនធានថវិកាច្រើន»។

លោកបានបន្តថា ៖«ប្រជាជនកម្ពុជាចិត្តល្អ រួសរាយរាក់ទាក់ និងស្រស់ស្រាយ។ ពួកគេពេញចិត្តនឹងជីវិតរស់នៅ ហើយរីករាយតាមអ្វីដែលពួកគាត់មាន។ ខ្ញុំបានរៀនសូត្រពីពួកគាត់ច្រើនណាស់។ សូម្បីបាល់ទាត់ក៏អីចឹងដែរ ពួកគេលេងបាល់ទាត់នៅតាមផ្លូវ ហើយហ្វឹកហាត់យ៉ាងងាយស្រួលប្រកបដោយភាពវិជ្ជមាន»។

សូមបញ្ជាក់ថា លោក Pep Muñoz បានដឹកនាំ ក្លិបព្រះខ័នរាជស្វាយរៀង ពីររដូវកាលដោយបានឈ្នះជើងឯកលីគកំពូលកម្ពុជា ២ ឈ្នះជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន ១ និងជើងឯករង AFC Challenge League។ លោកបានចាកចេញពីកម្ពុជានៅចុងបញ្ចប់រដូវកាល ២០២៤-២៥ ទៅដឹកនាំក្លិបនៅចិន ហើយបានចាកចេញពីចិននៅពាក់កណ្តាលរដូវកាល ២០២៥-២៦ ទៅស្រុកកំណើតនៅប្រទេសអេស្ប៉ាញវិញ៕