មកវិញ ២ ប្រកួតចុងក្រោយ វឿន វាសនា រកបាន ៥២ ពិន្ទុ ជួយឱ្យ Win Streak ឈ្នះទាំង ២ ប្រកួត

កីឡាករ វឿន វាសនា របស់ក្រុមបាល់ទះ Win Streak រកបានពិន្ទុច្រើនជាងគេប្រចាំក្រុម ២ ប្រកួតជាប់គ្នា អំឡុងការប្រកួត ២ ប្រកួតចុងក្រោយក្នុងសប្តាហ៍ទី ២០ នៃក្របខណ្ឌលីគបាល់ទះកំពូលតៃវ៉ាន់។

ការប្រកួតសប្តាហ៍ទី ២០ ក្រុមបាល់ទះ Win Streak ទទួលបានជ័យជម្នះទាំង ២ ប្រកួត ដោយការប្រកួតទល់នឹងក្រុម TSG Skyhawks កាលពីថ្ងៃ សៅរិ៍ ទី ២៨ ខែ កុម្ភៈ បានយកឈ្នះក្នុងលទ្ធផល ៣ សិតទល់ ១។ ចំណែកការប្រកួតទល់នឹងក្រុម Taoyuan Cloud Leopard កាលពីថ្ងៃ អាទិត្យ ទី ០១ ខែ មីនា ឆ្នាំ ២០២៦ បានយកឈ្នះក្នុងលទ្ធផល ៣ សិតទល់ ២។

វឿន វាសនា នៅតែជាស្មាត់ដ៏សំខាន់របស់ក្រុម Win Streak ដោយការប្រកួតទាំង ២ នោះ កីឡាកររកបានពិន្ទុច្រើនជាងគេប្រចាំក្រុមទាំង ២ ប្រកួត។ ការប្រកួតទល់នឹងក្រុម TSG Skyhawks កីឡាកររកបាន ២៦ ពិន្ទុ។ រីឯការប្រកួតទល់នឹងក្រុម Taoyuan Cloud Leopard កីឡាករ កម្ពុជា វ័យ ២៤ ឆ្នាំក៏រកបាន ២៦ ពិន្ទុផងដែរ។

ក្នុងចំណោម ២ ប្រកួតខាងលើ វឿន វាសនា ត្រូវបានលីគ TPVL ជ្រើសរើសជាកីឡាករល្អបំផុតប្រចាំការប្រកួត ១ លើក គឺនៅក្នុងការប្រកួតចុងក្រោយទល់នឹងក្រុម Taoyuan Cloud Leopard។ បច្ចុប្បន្ន វឿន វាសនា កំពុងឈរនៅលើគេជា​កីឡាករល្អបំផុតច្រើនជាងគេប្រចាំ​ការ​ប្រកួត​របស់ ក្រុម Win Streak នៅរដូវកាលនេះ ដោយរកបានសរុបចំនួន ១៤ លើក។

គួរឱ្យដឹងថា ក្រុមបាល់ទះ Win Streak បច្ចុប្បន្នកំពុងឈរនៅលើកំពូលតារាងនៃលីគបាល់ទះកំពូល តៃវ៉ាន់ ក្រោយឆ្លងកាត់ ៣៨ ប្រកួត ឈ្នះ ៣៤ លើក និងចាញ់ ៤ លើក៕

អត្ថបទ៖ សេម កុសល