លទ្ធផលគ្រប់គូជើងទី ១ វគ្គ ៨ ក្រុមពានសម្តេច​តេ​ជោ សុទ្ធតែតឹងតែង តម្រូវអ៊ុតមើលជើងទី ២

ការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន លើក​ទី​១៩ បានបញ្ចប់ជើងទី ១ វគ្គ ៨ ក្រុមចុងក្រោយជាស្ថាពរហើយ ក្នុងនោះលទ្ធផលគ្រប់គូទាំងអស់សុទ្ធតែតឹងតែង ដែលតម្រូវឱ្យអ៊ុតមើលដល់ជើងទី ២ ទើបដឹងពីក្រុមណាខ្លះ នឹងទទួលបានកៅអីឡើងវគ្គពាក់កណ្តាលផ្តាច់ព្រ័ត្រ។

កាលពីថ្ងៃ ពុធ ទី ២៥ ខែ កុម្ភៈ ឆ្នាំ ២០២៦ សប្តាហ៍មុន ការប្រកួតជើងទី ១ វគ្គ ៨ ក្រុម បានបញ្ចប់ ២ គូ ក្នុងនោះ ព្រះខ័នរាជស្វាយរៀង បានរងបរាជ័យក្រោមថ្វីជើងក្រុម គិរីវង្សសុខសែនជ័យ ក្នុងលទ្ធផល ១-២។ ចំណែក ១ គូទៀត ក្រុម ភ្នំពេញក្រោន ស្មើគ្នាជាមួយក្រុម អាយអេសអាយ ដង្កោរសែនជ័យ ក្នុងលទ្ធផល ២-២។

រីឯកាលពីថ្ងៃ ពុធ ទី ៤ ខែ មីនា ម្សិលមិញ បានបញ្ចប់ទៅ ២ គូបន្ថែមទៀត ក្នុងនោះក្រុម បឹងកេត បានយកឈ្នះ កងយោធពលខេមរភូមិន្ទ ក្នុងលទ្ធផល ២-០ និង ណាហ្គាវើលដ៍ បានស្មើគ្នាជាមួយ វិសាខា ក្នុងលទ្ធផល ២-២។

គួរបញ្ជាក់ ថា ការប្រកួតជើងទី ២ នឹង​ធ្វើ​នៅសប្តាហ៍ក្រោយ ដោយនៅថ្ងៃ ពុធ ទី ១១ ខែ មីនា មាន ២ គូ ក្នុងនោះ បឹងកេត ត្រូវជួបក្រុម កងយោធពលខេមរភូមិន្ទ និង វិសាខា ត្រូវជួបក្រុម ណាហ្គាវើលដ៍។ ចំណែកនៅថ្ងៃ ពុធ ទី ១៨ ខែ មីនា មាន ២ គូទៀត ក្នុងនោះ ព្រះខ័នរាជស្វាយរៀង ត្រូវជួបក្រុម គិរីវង្សសុខសែនជ័យ និង ភ្នំពេញក្រោន ត្រូវជួបក្រុម អាយអេសអាយ ដង្កោរសែនជ័យ៕

អត្ថបទ៖ សេម កុសល