កីឡា

Brooks គំរាមកំហែងខ្ពស់ក្នុងទម្ងន់ Strawweight និងស្ថិតក្នុងដំណើរទៅដណ្ដើមខ្សែក្រវាត់

បានផុស

៥ years មុន

នៅ

ថ្ងៃចន្ទ ២៩ វិច្ឆិកា ២០២១

ដោយ

ក្នុងការបង្ហាញខ្លួនលើកដំបូងនៅសង្វៀន ONE Championship កីឡាករគុនចម្រុះអាមេរិក Jarred “The Monkey God” Brooks បានបង្ហាញភាពខ្លាំងរបស់ខ្លួនរហូតដល់បញ្ចប់កីឡាករលំដាប់ទី៥ទម្ងន់ strawweight គូប្រជែង Lito “Thunder Kid” Adiwang។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីជ័យជម្នះយ៉ាងល្អនេះ គេមើលឃើញថា អតីតកីឡាករប្រចាំសង្វៀន UFC បានបញ្ចេញស្នៀតចំបាប់កម្រិតកំពូល និងមានភាពច្បាស់លាស់នូវអ្វីដែលគេបានធ្វើ។ ជើងខ្លាំងហ្វីលីពីន Adiwang មិនអាចឈរដើម្បីប្រកួតងាយស្រួលបានទេ ដោយសារតារាអាមេរិក ប្រុងជើងការក្នុងការចូលចាប់ផ្ដួលគ្រប់វិនាទី។ កីឡាកររហស្សនាម “The Monkey God” គ្រប់គ្រង “Thunder Kid” បានល្អនៅលើក្ដាររេញ, ប្រើកម្លាំងរបស់គេ និងរិះរកវិធីមិនឲ្យភ្លាត់ស្នៀតឡើយ។

ស្នៀតដ៏កំពូលរបស់គេបានកើតឡើងបន្តបន្ទាប់នៅពាក់កណ្ដាលទឹកទី២ នៅពេល Brooks បានចាប់ឃ្លេដៃ និងបង្ខំឲ្យតារាហ្វីលីពីនទះដៃចុះចាញ់តែម្ដង។ Adiwang បានដាក់ដៃឆ្វេងរបស់គេជុំវិញករបស់ Brooks ប៉ុន្តែ ធ្វើឲ្យកូនសិស្សក្លិប Mash Fight Team មានឱកាសស៊កដៃដើម្បីឃ្លេទៅវិញ។ គេគាបកាន់តែណែនរហូតធ្វើឲ្យកូនសិស្សក្លិប Team Lakay មកពីហ្វីលីពីន ទះដៃចុះចាញ់ត្រឹមនាទីទី ៣:០៧ នៅទឹកទី២។

ជ័យជម្នះគួរឲ្យចាប់អារម្មណ៍នេះ គឺជាការគំរាមកំហែងខ្លាំងដល់តារាគុនចម្រុះទម្ងន់ strawweight រួមទាំងម្ចាស់ខ្សែក្រវាត់ Joshua “The Passion” Pacio ផងដែរ។ Brooks អាចត្រូវបានគេចាត់ទុកជាកីឡាករគូប្រជែងលំដាប់ពិភពលោក ដោយសារមានក្បាច់ចាប់ផ្ដួលលឿនដូចផ្លេកបន្ទរ, សមត្ថភាពគ្រប់គ្រងគូប្រកួតនៅសង្វៀនកម្រិតខ្ពស់ និង ជំនាញប្រើកណ្ដាប់ដៃសំពងពីលើទៀតផង។ បើសិនជើងខ្លាំងហ្វីលីពីន Pacio ឡើងការពារខ្សែក្រវាត់ទល់នឹង “The Monkey God” គេអាចនឹងរៀបចំប៉ះកីឡាករដ៏លំបាកមួយក្នុងអាជីពមិនខាន៕