កីឡា

ថ្ងៃនេះសំខាន់ U23 កម្ពុជា ប៉ះ U23 ទីម័រខាងកើត ដើម្បីកៅអីវគ្គ៤ក្រុម

បានផុស

៤ years មុន

នៅ

ថ្ងៃអាទិត្យ ២០ កុម្ភៈ ២០២២

ដោយ

វានឹងក្លាយជាការប្រកួតដ៏លំបាកសម្រាប់ក្រុម ក្រុម U23 ឆ្នាំកម្ពុជា ជាមួយ ក្រុម U23 ទីម័រខាងកើត សម្រាប់ការបញ្ចប់ក្នុងពូល A ជើងឯក AFF U23 Championship 2022 នៅពហុកីឡដ្ឋានជាតិមរតកតេជោវេលាម៉ោង៧យប់។ ម៉ោងជាមួយគ្នានេះ ហ្វីលីពីន ប្រកួតនឹង ព្រុយណេ នៅកីឡដ្ឋានព្រីនស៍ដើម្បីឱកាសក្រុមលេខ២ល្អក្នុងពូលដែរសម្រាប់ហ្វីលីពីន។

ឆ្លងកាត់២ប្រកួតក្នុងពូលដូចគ្នា កម្ពុជាស៊ុតចូលគូប្រកួត៧គ្រាប់ក្នុងនោះស៊ុតចូលព្រុយណេ៦គ្រាប់ និងស៊ុតចូលហ្វីលីពីន១គ្រាប់ និងបានរក្សាសំណាញ់ទីមិនឲ្យគូប្រកួតស៊ុតចូលសោះ។ ចំណែកទីម័រខាងកើតវិញស៊ុតចូលដៃគូ៥គ្រាប់គឺស៊ុតចូលហ្វីពីលីន២គ្រាប់ និងស៊ុតចូលព្រុយណេ៣គ្រាប់ ប៉ុន្តែត្រូវដៃគូស៊ុតចូលវិញ២គ្រាប់។

យុវជនកម្ពុជាមាន៦ពិន្ទុស្ថិតនៅចំណាត់ថ្នាក់លេខ១ក្នុងពូល A ស្របពេលទីម័រខាងកើត មាន៤ពិន្ទុស្ថិតនៅលេខ២។ លក្ខខណ្ឌ សម្រាប់ទីម័រខាងកើតដើម្បីឡើងទៅវគ្គពាក់កណ្តាលផ្តាច់ព្រ័ត្រគឺត្រូវការឈ្នះកម្ពុជា ប៉ុន្តែសម្រាប់កម្ពុជាវិញត្រូវការត្រឹមស្មើក៏ឡើងដែរ។ យ៉ាងណា ក្រុមទាំងពីរ ប្រសិនបើក្រុមណាមួយចាញ់ ក៏នៅមានឱកាសអ៊ុតមើលក្រុមលេខ២ល្អក្នុងពូលដែរ។

សម្រាប់ក្រុមចំណាត់លេខ១ក្នុងពូល A ឡើងទៅវគ្គពាក់កណ្តាលត្រូវជួបក្រុមខ្លាំងលេខ១ពីពូល C ដែលមានក្រុមខ្លាំង វៀតណាម ឬ ថៃ ដែលជាក្រុមត្រូវបានគេមើលឃើញខ្លាំងជាងគេក្នុងចំណោមក្រុមទាំងអស់។

ចំណែកចំណាត់ថ្នាក់លេខ១ក្នុងពូល B ដែលមានតែ ម៉ាឡេស៊ី និងឡាវ ត្រូវជួបក្រុមលេខ២ល្អក្នុងពូល A, B ឬ C ដូច្នេះអាចចាត់ទុកថា ធូរស្រាលជាងក្រុមលេខ១ក្នុងពូល A ដែលត្រូវជួបក្រុមលេខ១ក្នុងពូល C នៅវគ្គពាក់កណ្តាលផ្តាច់ព្រ័ត្រ។

សូមបញ្ជាក់ថា សម្រាប់ពូល C បន្ទាប់ពីមីយ៉ាន់ម៉ា និងឥណ្ឌូណេស៊ីដកខ្លួន គឺសល់តែក្រុមឡាវ និងម៉ាឡេស៊ីប៉ុណ្ណោះ។ ប្រកួតលើកទី១ ឡាវ បានយកឈ្នះម៉ាឡេស៊ីដោយលទ្ធផល ២-១ ហើយក្រុមទាំងពីរនេះត្រូវប្រកួតគ្នាម្តងទៀតទើបដឹង ក្រុមណាឡើងវគ្គពាក់កណ្តាលផ្តាច់ព្រ័ត្រ៕