Harry Maguire ត្រូវគេគំរាមបំផ្ទុះគ្រាប់បែកនៅផ្ទះ

ស្របពេលដែលទម្រង់លេងធ្លាក់ចុះយ៉ាងខ្លាំង កាពីទែនក្រុមបិសាចក្រហម Manchester United កីឡាករ Harry Maguire បានទទួលការគម្រាមបំផ្ទុះគ្រាប់បែកនៅផ្ទះរបស់គាត់។

ការគំរាមនេះ ត្រូវបានរាយការណ៍ទៅប៉ូលិស Cheshire ហើយប៉ូលិសបានមកពិនិត្យនៅផ្ទះរបស់កីឡាករអន្តរជាតិអង់គ្លេសរូបនេះ កាលពីរសៀលថ្ងៃព្រហស្បតិ៍ទី២១ខែមេសា រួចបញ្ជាក់ថា ប៉ូលិសមិនបានរកឃើញវត្ថុគួរឲ្យសង្ស័យនោះទេ។

Maguire មានកូនតូចចំនួនពីរនាក់ ជាមួយគូដណ្តឹង Fern Hawkins។

អ្នកនាំពាក្យរបស់ Maguire បាននិយាយថា “ក្នុងរយៈពេល២៤ម៉ោងចុងក្រោយ Harry បានទទួលការគំរាមកំហែងយ៉ាងធ្ងន់ធ្ងរដល់ផ្ទះគ្រួសាររបស់គាត់។ គាត់បានរាយការណ៍រឿងនេះទៅប៉ូលិស ហើយបច្ចុប្បន្នកំពុងពិនិត្យករណីនេះ។ សុវត្ថិភាពគ្រួសាររបស់គាត់និងអ្នកដែលនៅជុំវិញគាត់ ច្បាស់ជាអាទិភាពទីមួយរបស់ Harry។ គាត់នឹងបន្តត្រៀមខ្លួនសម្រាប់ការប្រកួតចុងសប្តាហ៍នេះជាធម្មតា ហើយយើងនឹងមិនធ្វើអត្ថាធិប្បាយលម្អិតណាមួយបន្ថែមទៀតទេនៅពេលនេះ”។

ស្របពេលជាមួយគ្នានោះ សេចក្តីថ្លែងការណ៍របស់ប៉ូលិស Cheshire បានឲ្យដឹងថា “ប៉ូលិស Cheshire ត្រូវបានគេរាយការណ៍អំពីការគំរាមបំផ្ទុះគ្រាប់បែកនៅឯអាសយដ្ឋានមួយនៅក្នុងតំបន់ Wilmslow។ មិនមានការជម្លៀសចេញទេ ប៉ុន្តែជាវិធានការប្រុងប្រយ័ត្ន សត្វសុនខហិតរកជាតិផ្ទុះរបស់ប៉ូលិសបានចូលរួមក្នុងប្រតិបត្តិការ ដើម្បីរុករកសួនច្បារ និងតំបន់ជុំវិញនោះ។ មិន​មាន​វត្ថុ​គួរឲ្យ​សង្ស័យ​ត្រូវ​បាន​រក​ឃើញ​អំឡុង​ពេល ​ស្វែង​រកទេ​។ ការស៊ើបអង្កេតលើការគំរាមកំហែងបំផ្ទុះគ្រាប់បែកនៅតែបន្ត ហើយពេលនេះ មិនមានការចាប់ខ្លួនណាមួយត្រូវបានធ្វើឡើងឡើយ”៕

ប្រែសម្រួល៖ Vann Vann

ប្រភព៖ Sky Sports

ចុចអាន៖ Ronaldo បង្ហាញរូបថតជុំគ្រួសារលើកដំបូង ក្រោយបាត់បង់កូនប្រុស