ស្លាប់និងរបួសជាង៤០នាក់ ក្នុងហេតុការណ៍បំផ្ទុះគ្រាប់បែកអត្តឃាតនៅភាគនិរតីប្រទេសប៉ាគីស្ថាន

យោងតាមការចេញផ្សាយរបស់ទីភ្នាក់ងារប័ត៌មាន AP នៅថ្ងៃទី ០៣ ខែកញ្ញា ជនបំផ្ទុះគ្រាប់បែកអត្តឃាតម្នាក់បានវាយប្រហារលើការប្រមូលផ្តុំនយោបាយនៅទីក្រុង Quetta ក្នុងខេត្ត Balochistan របស់ប្រទេសប៉ាគីស្ថាន ដោយបានសម្លាប់មនុស្សយ៉ាងហោចណាស់ ១៣ នាក់ និង ៣០ នាក់ផ្សេងទៀតរងរបួស។

ការផ្ទុះបានកើតឡើងនៅជិតកីឡដ្ឋានមួយ ខណៈដែលអ្នកគាំទ្រគណបក្សជាតិ Balochistan កំពុងចាកចេញពីការប្រមូលផ្ដុំ។ មេដឹកនាំគណបក្សលោក Akhtar Mengal មិនបានត្រូវរបួសទេ ប៉ុន្តែអ្នកដើរតាមលោកខ្លះស្ថិតក្នុងចំណោមជនរងគ្រោះ។

គ្មាន​ក្រុម​ណា​អះអាង​ទទួលខុសលើ​ការ​វាយ​ប្រហារ​នេះ​ទេ ទោះ​បី​ជា​ក្រុម​មន្ត្រី​ប៉ាគីស្ថានបាន​ស្តី​បន្ទោសភេរវជន​ដែល​គាំទ្រ​ដោយ​ឥណ្ឌាជាអ្នកធ្វើក៏ដោយ តែការ​ចោទ​ប្រកាន់​ត្រូវឥណ្ឌា​បដិសេធ។

គួរបញ្ជាក់ថាខេត្ត Balochistan បានប្រឈមនឹងអំពើហិង្សាជាមួយពួកក្រុមបំបែកខ្លួនជាច្រើនឆ្នាំហើយ ដែលភាគច្រើនសំដៅលើកងកម្លាំងសន្តិសុខ ហើយការវាយប្រហារនៅតែបន្ត បើទោះបីជាមានការអះអាងពីរដ្ឋាភិបាលពីវឌ្ឍនភាពប្រសើឡើងក៏ដោយ។

ការបំផ្ទុះគ្រាប់បែកនេះក៏បានកើតឡើងតែប៉ុន្មានថ្ងៃបន្ទាប់ពីការវាយប្រហាររបស់ក្រុមសកម្មប្រយុទ្ធដ៏សាហាវផ្សេងទៀតនៅភាគពាយ័ព្យប៉ាគីស្ថាន ដែលបង្ហាញពីការកើនឡើងយ៉ាងខ្លាំងនៃអំពើហិង្សានៅទូទាំងប្រទេស៕

អត្ថបទ៖ ប៊ុន សុភាព