កីឡា

ភ្នំពេញហ្គាឡាក់ស៊ី គ្រងជើងឯកពានសម្តេចតេជោ ហ៊ុន សែន ថ្នាក់ខេត្ត ឆ្នាំ២០២២

បានផុស

២ years មុន

នៅ

ថ្ងៃសៅរ៍ ១១ មិថុនា ២០២២

ដោយ

ក្លិបបាល់ទាត់ភ្នំពេញហ្គាឡាក់ស៊ី បានក្លាយជាម្ចាស់ជើងឯកពានរង្វាន់សម្តេចតេជោ ហ៊ុន សែន លើកទី១៦ ឆ្នាំ២០២២ វគ្គថ្នាក់ខេត្ត បន្ទាប់បានយកឈ្នះ ខេត្តឧត្តរមានជ័យ ១-០ នារសៀលថ្ងៃទី១១ ខែមិថុនា ឆ្នាំ២០២២ នេះ។

ការប្រកួតដែលធ្វើឡើងនៅកីឡដ្ឋានខេមបូឌាអ៊ែរវ៉េ និងមានការផ្សាយផ្ទាល់តាមរយៈស្ថានីយទូរទស្សន៍ BTV News ផងដែរនោះ ទើបតែលេងបាន ២នាទី ភ្នំពេញហ្គាឡាក់ស៊ី បានរកគ្រាប់បាល់នាំមុខមុនដោយកីឡាករ ម៉ាត់ សេតមូស្លីម ហើយបានរក្សាលទ្ធផល ១-០ នេះដល់ចប់វគ្គទី១។ ចូលដល់វគ្គទី២ ឧត្តរមានជ័យ ដែលត្រូវការគ្រាប់បាល់នោះ បានព្យាយាមជាច្រើនលើកច្រើនសារ ប៉ុន្តែនៅតែមិនអាចធ្វើបានសម្រេចរហូតរក្សាលទ្ធផលដដែលនេះដល់ចប់ការប្រកួត ភ្នំពេញហ្គាឡាក់ស៊ី បានក្លាយជាម្ចាស់ជើងឯកពានរង្វាន់សម្តេចតេជោ ហ៊ុន សែន លើកទី១៦ ឆ្នាំ២០២២ វគ្គថ្នាក់ខេត្ត។

ដោយឡែកសម្រាប់ចំណាត់ថ្នាក់លេខ៣ គឺបានទៅក្លិបបាល់ទាត់តំណាងឱ្យខេត្តកំពង់ឆ្នាំង ‘ឬទ្ធីសែន’ បន្ទាប់បានយកឈ្នះ ក្លិបបាល់ទាត់កំពតអេហ្វស៊ី ២-០ នាព្រឹកថ្ងៃទី១១ ខែមិថុនា ឆ្នាំ២០២២ នេះ។

សូមបញ្ជាក់ថា ក្រោយចប់ការប្រកួតវគ្គថ្នាក់ខេត្តនេះរួច ទើបការប្រកួតវគ្គថ្នាក់ជាតិចាប់ផ្ដើមបន្ត ដោយក្រុមទាំង៤ ភ្នំពេញហ្គាឡាក់ស៊ី, ខេត្តឧត្តរមានជ័យ, ឬទ្ធីសែន និងកំពតអេហ្វស៊ី ត្រូវឡើងទៅប្រកួតជាមួយក្រុមចំនួន ១២នៅលីគទី២កម្ពុជា ក្នុងវគ្គ ១៦ក្រុមចុងក្រោយ ជាបន្តតទៀត៕

អត្ថបទ ៖ មន្នីរ័ត្ន