ឡាវ ប្រមូលផ្ដុំក្រុមជម្រើសជាតិលឿនជាងគេដល់​ទៅ២ខែ មុនការប្រកួត AFF Championship មកដល់

ក្រុមបាល់ទាត់ជម្រើសជាតិឡាវ បានចាប់ផ្ដើមប្រមូលផ្ដុំហ្វឹកហាត់មុនគេក្នុងតំបន់អាស៊ាន ដែលមាន១១ប្រទេស ដើម្បីត្រៀមខ្លួនប្រកួតក្នុងពានរង្វាន់ជើងឯកតំបន់អាស៊ីអាគ្នេយ៍ (AFF Mitsubishi Electric Cup 2022) ឬគេនិយមស្គាល់ថា ‘AFF Suzuki Cup’ នៅខែធ្នូខាងមុខ។

ការប្រមូលផ្ដុំលឿនបែបនេះ គឺចំពេលដែលលីគបាល់ទាត់របស់ប្រទេសឡាវ បានបញ្ចប់អស់ទាំងស្រុងតាំងពីខែមុន​ ហើយដើម្បីរក្សាទម្រង់លេង និងកាយសម្បទារបស់កីឡាករ គ្រូបង្វឹកសញ្ជាតិអាល្លឺម៉ង់ លោក Hans Michael Weiß សម្រេចកោះហៅកីឡាករ២៧នាក់ ដើម្បីហ្វឹកហាត់ ហើយភាគច្រើនបណ្ដុំទៅដោយកីឡាករយុវជន។

ពានរង្វាន់ជើងឯកតំបន់អាស៊ីអាគ្នេយ៍ (AFF Mitsubishi Electric Cup 2022) នឹងចាប់ផ្ដើមប្រកួតនៅថ្ងៃទី​២០​ ខែធ្នូ ឆ្នាំ២០២២ ដោយមានការបែងចែកជា ២ពូលផ្សេងគ្នា។ បើទោះបីជា ឡាវ មិនស្ថិតនៅរួមពូលជាមួយកម្ពុជា ប៉ុន្តែ ឡាវ គឺជាដៃគូដែលគេតែងតែគិតថាល្អមើលពេលប៉ះគ្នា។

ការចាប់ឆ្នោតដែលបានធ្វើឡើងកាលពីថ្ងៃទី៣០ ខែសីហា ឆ្នាំ២០២២ នៅប្រទេសថៃ ក្រុមជម្រើសជាតិកម្ពុជា ត្រូវបានចាប់ឆ្នោតស្ថិតនៅពូល A ជាមួយក្រុមជម្រើសជាតិថៃ, ហ្វីលីពីន, ឥណ្ឌូនេស៊ី និងទីម័រខាងកើត ឬក៏ ព្រុយណេ (២ ក្រុមនេះត្រូវប្រកួតជម្រុះសិន)។ ខណៈពូល B វិញមានវៀតណាម, ម៉ាឡេស៊ី, សិង្ហបុរី, មីយ៉ាន់ម៉ា និងឡាវ នេះផ្ទាល់តែម្ដង។

ចំពោះការបែងចែកជា ២ពូល ក្នុងមួយពូលមាន៥ក្រុមនេះ ក្រុមនីមួយៗលេង ២ប្រកួតក្នុងដី និង២ប្រកួតក្រៅដី។ បន្ទាប់មកក្រុមកំពូលទាំងពីរ នៃពូលនីមួយៗនឹងឈានទៅវគ្គជម្រុះចាញ់ធ្លាក់ ដែលមាន២ជើង គឺវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ៕

អត្ថបទ៖ មន្នីរ័ត្ន