កីឡា

មកស្គាល់សមត្ថភាពរបស់ Kaori ដែលប្តេជ្ញាឃ្លេ ខាន់ ចេសា ឲ្យចុះចាញ់ថ្ងៃនេះ

បានផុស

១ year មុន

នៅ

ថ្ងៃសុក្រ ១៨ វិច្ឆិកា ២០២២

ដោយ

កីឡាការិនីជឺជីតស៊ូអាមេរិក Kaori Hernandez នឹងប្រកួតជាមួយកីឡាការិនីជឺជីតស៊ូជម្រើសជាតិកម្ពុជា ខាន់ ចេសា យប់ថ្ងៃសុក្រ ទី១៨ ខែវិច្ឆិកា នេះហើយក្នុងព្រឹត្តិការណ៍ IBJJF Absolute Grand Prix ដែលជាកម្មវិធីប្រកួតមិត្តភាពអន្តរជាតិនៅសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

និយាយដោយសង្ខេបអំពីកីឡាការិនីខ្មែរ-អាមេរិក ខាន់ ចេសា គឺជាម្ចាស់មេដាយមាសជឺជីតស៊ូពិភពលោក ម្ចាស់ខ្សែក្រវាត់ខ្មៅជឺជីតស៊ូពិភពលោក PAN ម្ចាស់មេដាយមាសទ្វីបអាស៊ី និងមេដាយមាសស៊ីហ្គេម ព្រមទាំងមានចំណាត់ថ្នាក់លេខ៣លើពិភពលោកប្រភេទទម្ងន់របស់នាង។

ចំណែកកីឡាការិនីអាមេរិក Kaori Hernandez អ្នកគាំទ្រមិនទាន់ស្គាល់ច្បាស់ឡើយ ប៉ុន្តែបើប្រៀបធៀបជាមួយ ខាន់ ចេសា គឺទាំងសមត្ថភាព និងសមិទ្ធផលមិនលើកីឡាការិនីកម្ពុជាទេ។

Kaori បានចាប់ផ្តើមហ្វឹកហាត់កីឡាជឺជីតស៊ូតាំងពីអាយុ១១ឆ្នាំ ហើយបច្ចុប្បន្នអាយុ២៣ឆ្នាំ។ នាងមានក្លឹបបង្ហាត់កីឡាជឺជីតស៊ូផ្ទាល់ខ្លួនមួយកន្លែង។ កាលពីយុវតី កីឡាការិនីអាមេរិករូបនេះបានឈ្នះខ្សែក្រវាត់ពណ៌ស្វាយ និងជាម្ចាស់ខ្សែក្រវាត់ពណ៌បៃតងពិភពលោក៥ដង។ នេះបើយោងតាមបទសម្ភាសរបស់ throughtheeyesofan កាលពីឆ្នាំ២០១៧។

នៅពេលពេញវ័យ Kaori Hernandez ទទួលបានចំណាត់ថ្នាក់លេខ៣ (មេដាយសំរឹទ្ធ) នៃខ្សែក្រវាត់ខ្មៅពិភពលោក PAN កាលពីដើមឆ្នាំនេះ ប្រៀបធៀបនឹង ខាន់ ចេសា ជាម្ចាស់មេដាយមាស។

ខាន់ ចេសា មេដាយមាសពិភពលោកទម្ងន់-៥៣គក ខណៈ Kaori មេដាយសំរឹទ្ធ ទម្ងន់ -៤៨គក

សម្រាប់មួយរយៈពេលចុងក្រោយនេះ Kaori មិនសូវបានចេញប្រកួតទេ។ ជំនាញដែលចូលចិត្តបំផុតគឺក្បាច់ឃ្លេដៃគូឲ្យចុះចាញ់។

Kaori Hernandez បាននិយាយពីការប្រកួតថ្ងៃនេះថា ៖«ខ្ញុំដឹងថា ចេសា ជាកីឡាការិនីដ៏ល្អម្នាក់។ នាងអាចប្រកួតបានល្អពេញទឹក។ ខ្ញុំមិនមែនទន្ទឹងរង់ចាំការប្រកួតជាមួយ ចេសា ទេ តែខ្ញុំទន្ទឹងរង់ចាំបង្ហាញសមត្ថភាពរបស់ខ្ញុំ។ ខ្ញុំសម្លឹងឆ្ពោះទៅរកការឃ្លេដៃគូឲ្យចុះចាញ់។ ខ្ញុំជឿលើជំនាញរបស់ខ្ញុំ»។

កីឡាការិនីកម្ពុជា និងកីឡាការិនីអាមេរិកទាំងពីរនេះធ្លាប់ជួបគ្នាច្រើនលើកមកហើយ ប៉ុន្តែចាប់តាំងពីឆ្នាំ២០១៩ដែលជាពេលវេលាអ្នកទាំងពីរធំពេញវ័យគឺមិនធ្លាប់បានប្រកួតគ្នាទេ។ ដូច្នេះច្បាស់ណាស់ទាំងសមត្ថភាព បច្ចេកទេស និងកម្លាំងកាយមានការប្រែប្រួលខុសពីមុនច្រើន៕