ចប់វគ្គសន្សុំពិន្ទុតាមពូលជុំទី ១ គោជល់ អេស្ប៉ាញ ធ្វើបានល្អជាងគេ

បន្ទាប់ពីឆ្លងកាត់ការតតាំងគ្នាចំនួន ១៦ ប្រកួតក្នុងវគ្គសន្សុំពិន្ទុតាមពូលជុំទី ១ ក្នុងព្រឹត្តិការណ៍បាល់ទាត់ពិភពលោក FIFA World Cup ឆ្នាំ ២០២២ នៅប្រទេសកាតា មានតែក្រុមបាល់ទាត់ជម្រើសជាតិគោជល់អេស្ប៉ាញប៉ុណ្ណោះដែលធ្វើបានល្អជាងគេ ។

ក្រុមជម្រើសជាតិដែលដឹកនាំដោយលោកគ្រូបង្វឹក Luiz Enrique ធ្វើបានល្អមែនទែនសម្រាប់ការប្រកួតវគ្គសន្សុំពិន្ទុជុំដំបូងក្នុងពូល E ដោយបំបាក់ក្រុមបាល់ទាត់ជម្រើសជាតិកូស្ដារីកាមិនឲ្យតដៃរួចក្នុងលទ្ធផល ៧-០ កាលពីយប់ថ្ងៃពុធ ទី២៣ ខែវិច្ឆិកា ។

ការយកឈ្នះក្នុងលទ្ធផល ៧-០ នេះធ្វើឲ្យក្រុមគោជល់អេស្ប៉ាញក្លាយជាក្រុមតែមួយគត់ដែលរកបានគ្រាប់បាល់ច្រើនជាងគេសម្រាប់ជុំទី១ ខណៈដែលក្នុងពូល B អង់គ្លេសរកបានតែ ៦ គ្រាប់ប៉ុណ្ណោះ ពោលអង់គ្លេសបានបំបាក់អ៊ីរ៉ង់ក្នុងលទ្ធផល ៦-២ ។

គួរបញ្ជាក់ថា បច្ចុប្បន្នអេស្ប៉ាញឈរនៅលំដាប់ទី១ ក្នុងពូល E ហើយក្រុមគោជល់មួយនេះនឹងត្រូវប្រកួតជុំទី២ ប៉ះឥន្រ្ទីដែកអាល្លឺម៉ង់ នៅថ្ងៃអាទិត្យ ទី២៧ ខែវិច្ឆិកា វេលាម៉ោង ២ រំលងអធ្រាត្រ ៕

ដោយ ៖ ជីវ័ន្ត

ចុចអាន ៖ ដឹងទេ បាល់សម្រាប់ព្រឹត្តិការណ៍ World Cup នៅកាតា មានទម្ងន់ និងតម្លៃ​ប៉ុន្មាន?