ក្រោយឈ្នះក្រូអាតយប់មិញ ដឹងទេ អាហ្សង់ទីន ឡើងវគ្គផ្ដាច់ព្រ័ត្រ World Cup ប៉ុន្មានដងហើយ?

អាហ្សង់ទីនបានកក់កៅអីវគ្គផ្ដាច់ព្រ័ត្របាល់ទាត់ពិភពលោក FIFA World Cup លើកទី ៦ របស់ខ្លួនហើយ បន្ទាប់ពីបានបំបាក់ក្រូអាត ក្នុងលទ្ធផល ៣-០ ក្នុងវគ្គពាក់កណ្ដាលផ្ដាច់ព្រ័ត្រកាលពីយប់មិញ ហើយអាហ្សង់ទីន ក៏ធ្លាប់ក្លាយជាជើងឯកចំនួន ២ លើកផងដែរក្នុងឆ្នាំ ១៩៧៨ ដែលខ្លួនឯងធ្វើជាម្ចាស់ផ្ទះ និងឆ្នាំ ១៩៨៦ ដែលប្រទេសម៉ិកស៊ិកជាម្ចាស់ផ្ទះ ។

នេះគឺជាវគ្គផ្ដាច់ព្រ័ត្រ ៥ លើកផ្សេងទៀតរបស់អាហ្សង់ទីន៖

ឆ្នាំ ១៩៣០ ៖ អាហ្សង់ទីន ចាញ់ម្ចាស់ផ្ទះ អ៊ុយរូហ្គាយ ក្នុងលទ្ធផល ២-៤ ។

ឆ្នាំ ១៩៧៨ ៖ អាហ្សង់ទីន បានក្លាយជាប្រទេសម្ចាស់ផ្ទះទី ៥ ដែលបានឈ្នះពានរង្វាន់ World Cup ដោយយកឈ្នះហូឡង់ ៣-១ ក្នុងម៉ោងបន្ថែម ក្រោយបញ្ចប់ ៩០ នាទីក្នុងលទ្ធផល ១-១ ។

ឆ្នាំ ១៩៨៦ ៖ អាហ្សង់ទីន ​បាន​យក​ឈ្នះ ​អាល្លឺម៉ង់​ខាង​លិច ​ក្នុង​លទ្ធផល ៣-២ និងក្លាយជាជើងឯកលើកទី ២ ក្នុងប្រវត្តិសាស្ត្រ ហើយក៏ជាឆ្នាំដែលគេចងចាំមិនភ្លេចសម្រាប់គ្រាប់បាល់យកដៃតែតបញ្ចូលទី “Hand of God” ​របស់លោក Maradona ទល់​នឹង​ក្រុម​អង់គ្លេស ​ក្នុង​វគ្គ ៨ ក្រុមចុងក្រោយ ។

ឆ្នាំ ១៩៩០ ៖ ការទាត់បាល់ប៉េណាល់ទីចុងម៉ោងដោយកីឡាករ Andreas Brehme ជួយឲ្យអាល្លឺម៉ង់ខាងលិចទទួលបានជ័យជម្នះ ១-០ ហើយអាហ្សង់ទីន​បាន​ក្លាយ​ជា​ក្រុម​ដំបូងគេដែលរកគ្រាប់បាល់មិនបាន​នៅ​វគ្គ​ផ្តាច់ព្រ័ត្រ World Cup នាពេលនោះ ។

ឆ្នាំ ២០១៤ ៖ គ្រាប់បាល់ដ៏អស្ចារ្យរបស់កីឡាករ Mario Götze មុនពេលការប្រកួតបានឈានទៅដល់ការស៊ុតបាល់ប៉េណាល់ទីបានធ្វើឲ្យអាល្លឺម៉ង់ឈ្នះ អាហ្សង់ទីន ១-០ ហើយនេះក៏ជាបរាជ័យលើកដំបូងរបស់ Messi ផងដែរនៅក្នុងព្រឹត្តិការណ៍ World Cup ។

គួរបញ្ជាក់ថា មិនមានប្រទេសច្រើនដូច អាហ្សង់ទីន នោះទេដែលបានឈានដល់វគ្គផ្ដាច់ព្រ័ត្រ World Cup ច្រើនបែបនេះ ពោលមានតែប្រទេស ៣ ប៉ុណ្ណោះដូចជា អាឡឺម៉ង់ បានឡើងវគ្គផ្ដាច់ព្រ័ត្រចំនួន ៨ ដង ខណៈជើងឯក ៥ សម័យកាល ប្រេស៊ីល មានចំនួន ៧ ដង និងអ៊ីតាលីដែលមិនបានមកលេង World Cup ឆ្នាំនេះ ធ្លាប់ឡើងវគ្គផ្ដាច់ព្រ័ត្រចំនួន ៦ ដង ។

ដូច្នេះតើប្រិយមិត្តគិតថា ឆ្នាំនេះ អាហ្សង់ទីន អាចឈ្នះពានរង្វាន់ World Cup ដែរឬទេ?

ប្រែសម្រួលដោយ ៖ ជីវ័ន្ត

ប្រភព ៖ New York Times

ចុចអាន ៖ វគ្គផ្តាច់ព្រ័ត្រនៅថ្ងៃអាទិត្យនេះ គឺជាការប្រកួត World Cup ចុងក្រោយ ក្នុងជីវិតរបស់ Messi