កម្ពុជាត្រៀមខ្លួនបានល្អ ក្នុងឋានៈម្ចាស់ផ្ទះការប្រកួតកីឡាចំបាប់ ជើងឯកអាស៊ីអាគ្នេយ៍ ២០២២

សហព័ន្ធកីឡាចំបាប់កម្ពុជា បានត្រៀមខ្លួនរួចរាល់រៀបចំធ្វើម្ចាស់ផ្ទះការប្រកួតកីឡាចំបាប់ជ្រើសរើស ជើងឯកអាស៊ីអាគ្នេយ៍  ដែលនិងប្រព្រឹត្តនាថ្ងៃទី១៦ ដល់ថ្ងៃទី១៨ខែធ្នូ ឆ្នាំ២០២២នេះ នៅសាលនៃសកលវិទ្យាល័យភូមិន្ទភ្នំពេញ រាជធានីភ្នំពេញ ។

សម្រាប់ការប្រកួតនេះ កម្ពុជាបានបង្ហាញសមាសភាពកីឡាករ កីឡាការិនីសរុបចំនួន ២៦នាក់ ក្នុងនោះ មានកីឡាករ១៨នាក់ និងកីឡាការិនី៨នាក់ ។

ការប្រកួតកីឡាចំបាប់ជើងឯកអាស៊ីអាគ្នេយ៍ ឆ្នាំ២០២២នេះ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) និងសហព័ន្ធកីឡាចំបាប់កម្ពុជា ក៍បានរៀបចំវគ្គបណ្តុះបណ្តាល អាជ្ញាកណ្តាល-ចៅក្រម គ្រូបង្វឹកកីឡាចំបាប់កម្រិតអន្តរជាតិ និងការបោះជំរំហ្វឹកហាត់ដល់ក្រុមកីឡាករ កីឡាការិនីម្ចាស់ផ្ទះកម្ពុជា និងបណ្តាប្រទេសអាស៊ីអាគ្នេយ៍ ដែលចូលរួមសរុប ៧ប្រទេស ពីថ្ងៃទី០៧ដល់ថ្ងៃទី១៩ ខែធ្នូ ឆ្នាំ២០២២ នៅរាជធានីភ្នំពេញ។

នេះជាព្រឹត្តិការណ៍ប្រកួតដ៏សំខាន់មួយ  ដើម្បីត្រៀមឆ្ពោះទៅរៀបចំ និងការប្រកួតប្រជែងមេដាយលើប្រភេទកីឡាចំបាប់ សម្រាប់ស៊ីហ្គេម លើកទី៣២ ដែលគ្រោងដំណើរការជាផ្លូវការពីថ្ងៃទី៥-១៧ ខែឧសភា ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា។

គួរបញ្ជាក់ថា កម្មវិធីប្រកួតមានកាលបរិច្ឆេត និងវិញ្ញាសាប្រកួត រួមមាន៖ ថ្ងៃទី១៦ ខែធ្នូ ឆ្នាំ២០២២ ពិនិត្យសុខភាព-ថ្លឹងទម្ងន់លើវិញ្ញាក្រិចកូរ៉ូម៉ាំង១០ប្រភេទទម្ងន់ GR-55kg, 60kg, 63kg, 67kag, 72kg, 77kg, 82kg, 87kg, 97kg, 130kg។

ថ្ងៃទី១៧ ខែធ្នូ ឆ្នាំ២០២២ ពិនិត្យសុខភាព-ថ្លឹងទម្ងន់លើវិញ្ញាសាចំបាប់សេរីនារី (Women Wrestling) ដោយមាន១០ប្រភេទទម្ងន់ WW-50kg, 53kg, 55kg, 57kg, 59kg, 62kg, 65kg, 68kg, 72kg, 76kg។

ថ្ងៃទី១៨ ខែធ្នូ ឆ្នាំ២០២២ ពិនិត្យសុខភាព-ថ្លឹងទម្ងន់លើវិញ្ញាសាចំបាប់សេរីបុរស (Freestyle) ក្នុងប្រភេទទម្ងន់ FS-57kg, 61kg, 65kg, 70kg, 74kg, 79kg, 86kg, 92kg, 97kg, 125kg ៕

រូបភាព៖ Camsoc