កីឡា

សឿយ វិសាល រីករាយជាមួយលទ្ធផលឈ្នះ ហ្វីលីពីន ប៉ុន្តែក៏មានចំណុចត្រូវកែប្រែ

បានផុស

៤ years មុន

នៅ

ថ្ងៃពុធ ២១ ធ្នូ ២០២២

ដោយ

ក្រុមបាល់ទាត់ជម្រើសជាតិកម្ពុជា បានយកឈ្នះ ក្រុមជម្រើសជាតិហ្វីលីពីន ក្នុងជំនួបដំបូង នៃពូល A ពានរង្វាន់ជើងឯកប្រចាំតំបន់អាស៊ីអាគ្នេយ៍ (AFF Championship) ដោយលទ្ធផល ៣-២ នាពហុកីឡដ្ឋានជាតិមរតកតេជោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជ័យជម្នះក៏កើតចេញពីការរួមចំណែករបស់ប្រធានក្រុម សឿយ វិសាខា ខណៈបាននិយាយនៅក្រោយចប់ការប្រកួត កីឡាកររបស់ក្លិបព្រះខ័នរាជស្វាយរៀង រូបនេះ បានសម្ដែងក្ដីរីករាយជាមួយលទ្ធផលឈ្នះនេះ ប៉ុន្តែទន្ទឹមជាមួយគ្នានេះក៏បានលើកឡើងថា នៅមានចំណុចត្រូវកែប្រែបន្ថែមទៀតផងដែរ ដើម្បីប្រកួតបន្ទាប់ៗ។

សឿយ វិសាល បាននិយាយក្នុងសន្និសីទសារព័ត៌មានក្រោយចប់ការប្រកួតថា «ពួកយើងពិតជាសប្បាយរីករាយ ការប្រកួតទី ១ យើងទទួលបានជ័យជម្នះ ការប្រកួតថ្ងៃនេះពួកយើងក៏ធ្វើបានល្អច្រើន ហើយក្នុងពេលដែលយើងលេងនៅចុងតង់ទី ១ ហើយនឹងចុងតង់ទី ២ ពួកយើងមានចន្លោះខ្វះខាតច្រើន ហើយពួកយើងនឹងប្រឹងប្រែងកែនូវផលអវិជ្ជមាន នៅការប្រកួតបន្ទាប់ទៀត ដោយសារតែពួកយើងត្រូវជួបពួកគេដែលមានរបៀបលេងខុសៗគ្នា អ៊ីចឹងពួកយើងផ្ដោតអារម្មណ៍លើប្រកួតបន្ទាប់ទៀត»។

ប្រកួតបន្ទាប់ កម្ពុជា ត្រូវជួបម្ចាស់ផ្ទះឥណ្ឌូណេស៊ី ខណៈកីឡាករវ័យ ២៧ ឆ្នាំរូបនេះ ក៏បានប្ដេជ្ញាចិត្តបន្ថែម ដោយប្រើឆន្ទៈឲ្យអស់ពីកម្លាំងកាយចិត្ត ដើម្បីនាំលទ្ធផលជូនក្រុម។

«ការសន្យាសម្រាប់ប្រកួតបន្ទាប់យើងអត់ទាន់ដឹងថាយើងទទួលបានលទ្ធផលល្អ ឬយ៉ាងណាទេ តែជាដំបូងពួកយើងដឹងត្រឹមតែប្រឹងប្រែងឲ្យអស់ពីសមត្ថភាព ដើម្បីអ្នកគាំទ្ររបស់ពួកយើង អ៊ីចឹងពួកយើងនឹងប្ដេជ្ញាចិត្តនៅប្រកួតបន្ទាប់ ក៏ដូចជាប្រកួតបន្តទៀត ដោយប្រើឆន្ទៈឲ្យអស់ពីកម្លាំងកាយចិត្ត»។ សម្ដីរបស់ សឿយ វិសាល៕

អត្ថបទ ៖ មន្នីរ័ត្ន