កីឡា

លោក Honda មិនអាចទទួលយកបានទេចំពោះពេលវេលាប៉ះឥណ្ឌូនេស៊ីស្អែក

បានផុស

៤ years មុន

នៅ

ថ្ងៃព្រហស្បតិ៍ ២២ ធ្នូ ២០២២

ដោយ

ក្រុមបាល់ទាត់ជម្រើសជាតិកម្ពុជាបានធ្វើដំណើរទៅប្រទេសឥណ្ឌូនេស៊ីកាលពីព្រឹកថ្ងៃទី២១ ខែធ្នូ ម្សិលមិញដើម្បីប្រកួតជាមួយម្ចាស់ផ្ទះនាថ្ងៃទី២៣ ខែធ្នូ ស្អែកនេះក្នុងពានរង្វាន់ AFF Championship វគ្គសន្សំពិន្ទុក្នុងពូល A។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ពេលវេលានេះ លោក Keisuke Honda អ្នកចាត់ការទូទៅជម្រើសជាតិកម្ពុជាមិនអាចទទួលយកបានទេ ពីព្រោះក្រុមកម្ពុជាគ្មានពេលវេលាហ្វឹកហាត់ និងចាញ់ប្រៀបម្ចាស់ផ្ទះឥណ្ឌូនេស៊ី ដែលជាប្រកួតលើកដំបូងទៀត ខណៈកម្ពុជាទើបតែប្រកួតកាលពីថ្ងៃទី២០ ខែធ្នូនេះ។

លោកបានលើកឡើងថា ៖«ពេលវេលាសម្រាប់ការប្រកួត Mitsubishi Cup មិនអាចទទួលយកបានទេ។ អ្នកអាចគិតស្រមៃមើលទៅពេលវេលាខាងក្រោម? ថ្ងៃទី២០ ធ្នូ វេលាម៉ោង៥ល្ងាច ប្រកួតជាមួយហ្វីលីពីន។ ថ្ងៃទី២១ ខែធ្នូ ពេលព្រឹក ធ្វើដំណើរទៅប្រទេសឥណ្ឌូនេស៊ី (អត់បានហ្វឹកហាត់សោះ)។ ថ្ងៃទី២២ ខែធ្នូ ជាការហ្វឹកហាត់ផ្លូវការមុនការប្រកួត ហើយថ្ងៃទី២៣ ខែធ្នូ វេលាម៉ោង៤:៣០នាទី ប្រកួតជាមួយឥណ្ឌូនេស៊ី។ ហើយឥណ្ឌូនេស៊ីជាការប្រកួតលើកទី១ជាមួយកម្ពុជាថែមទៀត»។

អ្នកគាំទ្រដឹងស្រាប់ហើយថា ការធ្វើដំណើរទៅប្រទេសឥណ្ឌូនេស៊ីត្រូវការពេលវេលាយូរហោចណាស់ក៏មួយថ្ងៃដែរ ពីព្រោះត្រូវចេញពីប្រទេសកម្ពុជាទៅប្រទេសថៃ រួចប្តូរជើងយន្តហោះបន្តទៅឥណ្ឌូនេស៊ី ដូច្នេះត្រូវការពេលវេលាច្រើនទើបទៅដល់ទីក្រុងហ្សាកាតា។ គ្រាន់តែពេលវេលាធ្វើដំណើរគឺចំណាយពេលវេលាមួយថ្ងៃបាត់ ហើយនៅថ្ងៃទី២២នេះគឺជាការហ្វឹកហាត់ផ្លូវការមុនការប្រកួត។ សរុបទៅក្រុមកម្ពុជាចាញ់ប្រៀបទាំងស្រុងតែម្តង។

តាមការឲ្យដឹងពីសហព័ន្ធកីឡាបាល់ទាត់កម្ពុជាថា ក្រុមជម្រើសជាតិកម្ពុជាបានទៅដល់ឥណ្ឌូនេស៊ី វេលាម៉ោង១០យប់ ដោយសារជើងហោះហើរត្រូវបានពន្យារពេល២ដង។ ដូច្នេះកុំឡើយនិយាយដល់ការហ្វឹកហាត់ សូម្បីតែពេលវេលាសម្រាកខ្លះក៏គ្មានផង។

មែនទែនទៅ តាមធម្មតា ពេលវេលារៀបចំការប្រកួតចន្លោះពេល៣ថ្ងៃម្តងនេះសម្រាប់តែព្រឹត្តិការណ៍ប្រកួតដែលរៀបចំក្នុងប្រទេសមួយ ដែលក្រុមនីមួយៗស្ថិតនៅក្នុងប្រទេសនោះតែម្តងពោលគឺមិនមែនជាពេលវេលាសម្រាប់ការធ្វើដំណើរទៅប្រកួតឡើយ៕

អត្ថបទ៖ វីរបុត្រ

Related Topics:AFF Championship