Preview សម្ដីគ្រូបង្វឹក៖ ឥណ្ឌូនេស៊ី ប៉ះ​ កម្ពុជា ក្នុង AFF Cup 2022 ល្ងាចនេះ

ក្រុមជើងឯករងឥណ្ឌូណេស៊ី នឹងចាប់ផ្ដើមយុទ្ធនាការ AFF Mitsubishi Electric Cup 2022 របស់ពួកគេ ដែលនឹងដំណើរការនៅកីឡដ្ឋាន Gelora Bung Karno ខណៈដែលពួកគេធ្វើជាម្ចាស់ផ្ទះទទួលក្រុមជម្រើសជាតិកម្ពុជា ដែលកំពុងសល់ឥទ្ធិពលនៃជ័យជម្នះថ្ងៃបើកឆាកជាប្រវត្តិសាស្ត្រ។

ជាប្រទេសដែលបានបញ្ចប់ចំណាត់ថ្នាក់លេខ២ ក្នុងកំណត់ត្រាច្រើនជាងគេ (៦លើក) ឥណ្ឌូនេស៊ីកំពុងមានសម្ពាធ និងការរំពឹងទុកយ៉ាងខ្លាំងពីអ្នកគាំទ្រ ក្នុងការឈានទៅវគ្គបន្តសម្រាប់ការឈ្នះពានរង្វាន់ជាលើកដំបូង ប៉ុន្តែគ្រូបង្វឹក Shin Tae-yong បាននិយាយថា លោកមិនផ្តោតទៅលើសំឡេងរំខានពីខាងក្រៅទេ។ «ខ្ញុំមិនបារម្ភអំពីអ្វីដែលប្រទេសផ្សេងទៀតដូចជាថៃ ឬម៉ាឡេស៊ីអាចនឹងធ្វើនោះទេ ហើយខ្ញុំគ្រាន់តែផ្តោតលើក្រុមរបស់យើង និងការត្រៀមខ្លួនរបស់យើង»។ សម្ដីរបស់ លោក Shin Tae-yong។

ដោយសារកម្ពុជា ឈ្នះហ្វីលីពីន ៣-២ នៅដើមសប្តាហ៍នេះ គ្រូបង្វឹកសញ្ជាតិកូរ៉េដឹងច្បាស់ថា តើក្រុមភ្ញៀវនឹងបង្កការគំរាមបែបណា។ «កម្ពុជាស្ថិតក្នុងស្ថានភាពល្អ ហើយយើងដឹងថាពួកគេនឹងធ្វើឱ្យរឿងលំបាកសម្រាប់យើង ប៉ុន្តែយើងក៏បានរៀបចំយ៉ាងល្អ ហើយនឹងធ្វើអ្វីគ្រប់យ៉ាងដែលយើងអាចធ្វើបានដើម្បីឈ្នះការប្រកួតនេះ»។

នោះក៏ជាគោលបំណងសម្រាប់ការបន្តភាពភ្ញាក់ផ្អើលនៃក្រុមកំពុងនាំមុខក្នុងពូល A ជាមួយនឹងការយកឈ្នះហ្វីលីពីន​ នៅលើទឹកដីខ្លួនឯង កម្ពុជា ក៏ចង់បន្តការខិតខំខ្លាំងមួយទៀតនៅទីក្រុងហ្សាកាតា។ គ្រូបង្វឹក លោក Ryu Hirose បានឱ្យដឹងថា ទោះបីជាការផ្លាស់ប្តូរ និងការធ្វើដំណើរដ៏ឆាប់រហ័ស បានបង្ហាញឱ្យក្រុមរបស់លោកនូវបញ្ហាប្រឈមក៏ដោយ ក៏លោកថាត្រូវតែជម្នះ។ «យើងបានរៀបចំយ៉ាងល្អ ប៉ុន្តែយើងមានកាលវិភាគដ៏លំបាកមួយដែលត្រូវលេងមួយថ្ងៃបន្ទាប់ពីធ្វើដំណើរទៅកាន់ប្រទេសឥណ្ឌូនេស៊ី ប៉ុន្តែអ្វីដែលយើងអាចធ្វើបានគឺល្អបំផុតរបស់យើង ហើយខ្ញុំសង្ឃឹមថានឹងទទួលលទ្ធផលល្អនៅថ្ងៃស្អែក»។

គ្រូបង្វឹកជនជាតិជប៉ុនរូបនេះក៏បានកត់សម្គាល់ថា ការយកឈ្នះហ្វីលីពីន ក្រុមយុវជនរបស់លោកឥឡូវនេះ គួរតែខិតទៅជិតការប្រកួតដែលនៅសេសសល់របស់ពួកគេដោយមានទំនុកចិត្ត និងជំនឿជាក់។ «ប្រសិនបើអ្នកក្រឡេកមើលចំណាត់ថ្នាក់របស់ FIFA អ្នកអាចមើលឃើញគម្លាតរវាងក្រុម ហើយយើងដឹងថាយើងអាចជាក្រុមខាងក្រោព្រឹត្តិការណ៍នេះ ប៉ុន្តែយើងបានរៀបចំយ៉ាងល្អិតល្អន់ ហើយក្នុងការប្រកួតមុន យើងធ្វើបានល្អ ហើយដែលអាចផ្តល់ទំនុកចិត្តដល់ពួកយើងសម្រាប់ការប្រកួតនេះ»។

សូមបញ្ជាក់ថា ការប្រកួតរវាង ឥណ្ឌូនេស៊ី ជាមួយ កម្ពុជា នឹងធ្វើឡើងនៅកីឡដ្ឋាន Gelora Bung Karno Main Stadium ទីក្រុងហ្សាកាតា ប្រទេសឥណ្ឌូនេស៊ី នាវេលាម៉ោង ៤:៣០ល្ងាចត្រូវនឹងម៉ោងកម្ពុជាដូចគ្នា ហើយការប្រកួតមានផ្សាយបន្តផ្ទាល់តាមរយៈទូរទស្សន៍ BTV News៕

អត្ថបទ៖ មន្នីរ័ត្ន