កីឡា

ផ្លូវការហើយ ! FIFA អនុម័ត ការប្រកួត Club World Cup នឹងពង្រីកដល់ ៣២ ក្រុម នៅឆ្នាំ ២០២៥

បានផុស

២ សប្តាហ៍ មុន

នៅ

ថ្ងៃពុធ ១៥ មីនា ២០២៣

ដោយ

សហព័ន្ធកីឡាបាល់ទាត់ពិភពលោក (FIFA) បានអនុម័តផែនការសម្រាប់ការប្រកួតពានរង្វាន់ក្លិបបាល់ទាត់ពិភពលោក (FIFA Club World Cup) ដែលនឹងពង្រីកដល់ ៣២ ក្រុម ចាប់ពីឆ្នាំ ២០២៥ តទៅ។ នេះបើយោងតាមការសម្រេចនៅក្នុងសមាជរបស់ FIFA ដែលកំពុងធ្វើឡើងនៅប្រទេសរ៉វាន់ដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពានរង្វាន់នេះ ត្រូវបានបង្កើតឡើងក្នុងឆ្នាំ ២០០០ ហើយត្រូវបានប្រារព្ធឡើងជាប្រពៃណីក្នុងរដូវកាលដែលលីគប្រទេសនីមួយៗកំពុងប្រកួត មានរយៈពេលប្រហែលមួយសប្ដាហ៍។ មានតែក្រុមចំនួន ៧ ប៉ុណ្ណោះ ដែលត្រូវបានចូលរួមនៅក្នុងការប្រកួតចុងក្រោយបំផុតក្នុងខែមករា ប៉ុន្តែវានឹងត្រូវបានផ្លាស់ប្ដូរនៅឆ្នាំ ២០២៥ ដោយការប្រកួតនឹងលេងខែមិថុនា ហើយក្រុមចំនួន ៣២ នឹងត្រូវប្រកួតប្រជែង។

Chelsea និង Real Madrid បានកក់កន្លែងរបស់ពួកគេរួចហើយនៅក្នុងការប្រកួតឆ្នាំ ២០២៥ បន្ទាប់ពីក្រុមតោខៀវ បានឈ្នះពានរង្វាន់ Champions League ក្នុងឆ្នាំ ២០២១ ខណៈក្រុមយក្សអេស្ប៉ាញ បានផ្ដួលក្រុម Liverpool ក្នុងវគ្គផ្ដាច់ព្រ័ត្រកាលពីឆ្នាំមុន។

កន្លែងជាច្រើនទៀតនៅក្នុងពានរង្វាន់នេះក៏នឹងត្រូវបានបម្រុងទុកសម្រាប់ក្រុមដែលឈ្នះការប្រកួតក្លិបនៅអឺរ៉ុប ក្នុងឆ្នាំ ២០២៣ និងឆ្នាំ ២០២៤។

ការផ្លាស់ប្ដូរបានឈានទៅដល់ការប្រកួត Club World Cup មួយរយៈមកហើយ ដោយសារ FIFA គ្រោងនឹងផ្លាស់ប្ដូរវាទៅជាការប្រកួតដែលមាន ២៤ ក្រុម នៅឆ្នាំ ២០២១ ប៉ុន្តែជំងឺរាតត្បាតកូវីដ-១៩ ពន្យារពេលផែនការទាំងនេះ។

ឥឡូវនេះពួកគេបានឈានទៅមុខមួយជំហានទៀត ហើយបានឈានទៅការប្រកួតដែលមានក្រុមចំនួន ៣២ ហើយបាននិយាយនៅឯសមាជ ក្នុងប្រទេស Rwanda ប្រធាន FIFA លោក Gianni Infantino បានប្រកាសថា “វានឹងដូចជាការប្រកួតបាល់ទាត់ពិភពលោក”។

ការសម្រេចចិត្តរបស់ FIFA ទំនងមិនសូវជាល្អជាមួយក្លិបមួយចំនួននៅអឺរ៉ុបនោះទេ បន្ទាប់ពី Sportsmail បានបង្ហាញកាលពីខែធ្នូថា ក្លិបកំពូលៗរបស់ទ្វីបមួយនេះបានច្រានចោលសំណើរបស់ស្ថាប័នបាល់ទាត់ពិភពលោក ដើម្បីពង្រីកការប្រកួត ហើយផ្លាស់ប្ដូរវាទៅរដូវក្តៅ។

ការប្រកាសនេះធ្វើឡើងនៅថ្ងៃដដែល ដែល FIFA បានបញ្ជាក់អំពីផែនការសម្រាប់ការប្រកួតបាល់ទាត់ពិភពលោក នឹងពង្រីកដល់ ៤៨ ក្រុម ចាប់ពីឆ្នាំ ២០២៦ ដោយមាន ១០៤ ប្រកួត ត្រូវលេង ក្នុងការប្រកួតនៅសហរដ្ឋអាមេរិក ម៉ិកស៊ិក និងកាណាដា។

នេះគឺជាការកើនឡើងគួរឲ្យកត់សម្គាល់លើចំនួនហ្គេមដែលបានលេងនៅក្នុងការប្រកួត កាលពីឆ្នាំមុន ក្នុងប្រទេសកាតា ហើយមានពូលចំនួន ១២ ដែលមាន ៤ ក្រុម ជាមួយនឹងក្រុមចំនួន ៣២ នឹងបានឈានទៅវគ្គចាញ់ធ្លាក់(Knockout Stage)៕

ប្រភព ៖ dailymail.co.uk

អត្ថបទ ៖ មន្នីរ័ត្ន