ទីបំផុត ប្រធាន FIFA ចេញសេចក្ដីថ្លែងការណ៍ពាក់ព័ន្ធការប៉ះទង្គិចក្នុងស៊ីហ្គេមនៅកម្ពុជា

ប្រធានសហព័ន្ធបាល់ទាត់ពិភពលោក (FIFA) លោក Gianni Infantino បានផ្តល់សេចក្តីថ្លែងការណ៍មួយទាក់ទងនឹងភាពចលាចលនៅក្នុងការប្រកួតកីឡាស៊ីហ្គេម លើកទី៣២ ឆ្នាំ២០២៣ ការប្រកួតដែលមានការប៉ះទង្កិចគ្នារវាង U-22 ឥណ្ឌូនេស៊ី និង U-22 ថៃ។

ការប្រកួតវគ្គផ្តាច់ព្រ័ត្រ ប្រភេទកីឡាបាល់ទាត់ ស៊ីហ្គេម ឆ្នាំ២០២៣ រវាង U-22 ឥណ្ឌូនេស៊ី ជាមួយ U-22 ថៃ បានក្លាយជាចំណុចចាប់អារម្មណ៍ក្នុងពិភពបាល់ទាត់ បន្ទាប់ពីមានឧប្បត្តិហេតុនៃការប៉ះទង្គិចគ្នារវាងកីឡាករ និងមន្ត្រីបានកើតឡើងក្នុងការប្រកួតដ៏ក្តៅគគុក។

ទីបំផុតប្រធាន FIFA លោក Gianni Infantino បាននិយាយឡើងអំពីភាពចលាចលក្នុងព្រឹត្តិការណ៍ដដែលនេះថា ៖ «បាល់ទាត់អាស៊ីអាគ្នេយ៍កំពុងមានសក្តានុពលក្នុងការអភិវឌ្ឍន៍បានល្អ និងទូលំទូលាយ ប៉ុន្តែនៅទីបញ្ចប់វាត្រូវបានរំខានដោយបញ្ហាអំពើហិង្សា បញ្ហាដែលទាក់ទងនឹងបាល់ទាត់ និងបញ្ហាសង្គមផ្សេងៗទៀត”។

លោក Infantino បានសារភាពថា លោកមានការសោកស្តាយចំពោះឧប្បត្តិហេតុនៃការប៉ះទង្គិចគ្នារវាងកីឡាករដែលបានកើតឡើងនៅក្នុងការប្រកួតវគ្គផ្តាច់ព្រ័ត្រនៃការប្រកួតកីឡាស៊ីហ្គេម ឆ្នាំ២០២៣ រវាងឥណ្ឌូនេស៊ី និងថៃ ដែលធ្វើឡើងនៅពហុកីឡដ្ឋានជាតិអូឡាំពិក រាជធានីភ្នំពេញ ប្រទេសកម្ពុជា កាលពីថ្ងៃអង្គារ។

«ឧបទ្ទវហេតុកាលពីល្ងាចថ្ងៃទី១៦ ខែឧសភា នៅពហុកីឡដ្ឋានជាតិអូឡាំពិក វាជាការសោកស្តាយយ៉ាងខ្លាំង។ ប្រសិន បើវាជាភាពចលាចលរវាងកីឡាករ នោះជំនួយការ និងគ្រូបង្វឹករបស់ក្រុមគួរតែឈានជើងចូលដើម្បីបញ្ឈប់វា។ រូបភាពក្នុងការប្រកួតកីឡាស៊ីហ្គេមវគ្គផ្ដាច់ព្រ័ត្របានផ្សព្វផ្សាយសារអវិជ្ជមានយ៉ាងខ្លាំងក្នុងវិស័យបាល់ទាត់»។ សម្ដីលោក Infantino។

Infantino សង្ឃឹមថា បន្ទាប់ពីឧបទ្ទវហេតុក្នុងការប្រកួតកីឡាស៊ីហ្គេម ឆ្នាំ២០២៣ វគ្គផ្តាច់ព្រ័ត្រ សហព័ន្ធបាល់ទាត់ទ្វីបអាស៊ី (AFC), សហព័ន្ធបាល់ទាត់អាស៊ិអាគ្នេយ៍ (AFF), សហព័ន្ធបាល់ទាត់ឥណ្ឌូណេស៊ី (PSSI) និង សមាគមបាល់ទាត់ថៃ (FAT) អាចស្វែងរកដំណោះស្រាយដ៏ល្អបំផុត ដើម្បីទប់ស្កាត់ឧប្បត្តិហេតុស្រដៀងគ្នានេះកុំឱ្យកើតឡើងម្តងទៀតនាពេលអនាគត។

គួររំលឹកថា ឥណ្ឌូណេស៊ី ឈ្នះមេដាយមាស១ ក្រោយយកឈ្នះថៃ ៥-២ ក្នុងម៉ោងបន្ថែម១៥នាទី ២ដង នៅវគ្គផ្ដាច់ព្រ័ត្រ ស៊ីហ្គេម ឆ្នាំ២០២៣៕

ប្រែសម្រួល៖ មន្នីរ័ត្ន

ប្រភព៖ indonesia.postsen.com