កីឡា

កំណត់ត្រា៣យ៉ាងរបស់វីរកីឡាការិនី ស៊ន សៀវម៉ី លើឆាកអន្តរជាតិ

បានផុស

១០ ខែ មុន

នៅ

ថ្ងៃចន្ទ ២២ ឧសភា ២០២៣

ដោយ

វីរកីឡាការិនី ស៊ន សៀវម៉ី ទើបតែបានឈ្នះមេដាយមាស១គ្រឿងទៀតក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ បន្ទាប់ពីកីឡាការិនីឆ្នើមរូបនេះបានវិលចូលអាជីពកីឡាតេក្វាន់ដូវិញ ក្រោយសម្រាកអស់រយៈពេលប្រមាណ៣ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសមិទ្ធផលថ្មីខាងលើនេះ ស៊ន សៀវម៉ី បានបង្កើតកំណត់ត្រាលើឆាកអន្តរជាតិជាច្រើនដែលមិនទាន់មានអត្តពលិកកម្ពុជាណាម្នាក់អាចធ្វើបានដូចនាង។ ថ្ងៃនេះ សារព័ត៌មាន«កម្ពុជាថ្មី» សូមលើកយកកំណត់ត្រា៣យ៉ាងរបស់វីរកីឡាការិនីរូបនេះលើឆាកអន្តរជាតិ។

១. អត្តពលិកកម្ពុជាឈ្នះមេដាយមាសស៊ីហ្គេម៤ជំនាន់

ស៊ន សៀវម៉ី ធ្លាប់បានចូលរួមប្រកួតកីឡាស៊ីហ្គេម៥លើកគិតចាប់តាំងពីស៊ីហ្គេម ឆ្នាំ២០១១ នៅប្រទេសឥណ្ឌូណេស៊ី រហូតដល់ស៊ីហ្គេម ឆ្នាំ២០២៣ នៅប្រទេសកម្ពុជា។ សម្រាប់ការចូលរួមប្រកួតទាំង៥លើកគឺឈ្នះមេដាយមាស៤លើក និងឈ្នះមេដាយសំរឹទ្ធ១លើក។ ស៊ីហ្គេម លើកដំបូង ឆ្នាំ២០១១ សៀវម៉ី បានឈ្នះមេដាយសំរឹទ្ធ ប៉ុន្តែ៤លើកចុងក្រោយគឺឆ្នាំ២០១៣ ២០១៧ ២០១៩ និង២០២៣ ឈ្នះមេដាយមាសទាំងអស់ ដូច្នេះវីរកីឡាការិនីរូបនេះជាអត្តពលិកកម្ពុជាតែម្នាក់គត់ដែលបានឈ្នះមេដាយមាសស៊ីហ្គេមរហូតដល់ទៅ៤ជំនាន់។

២. អត្តពលិកកម្ពុជាទី១ឈ្នះមេដាយមាសកីឡាទ្វីបអាស៊ី

ស៊ន សៀវម៉ី បានក្លាយជាអត្តពលិកកម្ពុជាដំបូងគេបង្អស់ដែលបានឈ្នះមេដាយមាសពីកីឡាទ្វីបអាស៊ី (Asian Games) គិតចាប់តាំងពីកម្ពុជាធ្លាប់ចូលរួមប្រកួតកីឡាអាស៊ីតាំងពីឆ្នាំ១៩៥៤។ កីឡាទ្វីបអាស៊ី ឆ្នាំ២០១៤ នៅទីក្រុងអ៉ីនឆន ប្រទេសកូរ៉េខាងត្បូង សៀវម៉ី បានឈ្នះកីឡាអ៊ូបេគីស្ថាននៅជុំទី១ និងបន្តឈ្នះកីឡាការិនីហ្វីលីពីននៅវគ្គពាក់កណ្តាលផ្តាច់ព្រ័ត្រ មុនពេលឈ្នះកីឡាការិនីអ៉ីរ៉ង់នៅវគ្គផ្តាច់ព្រ័ត្រ ដើម្បីក្លាយជាអត្តពលិកកម្ពុជាទី១ឈ្នះមេដាយមាសកីឡាទ្វីបអាស៊ីក្នុងប្រវត្តិសាស្ត្រ។

៣. អត្តពលិកកម្ពុជាទី១ជាប់វគ្គជម្រុះកីឡាអូឡាំពិក

តាមរយៈការឈ្នះមេដាយមាសកីឡាទ្វីបអាស៊ី ឆ្នាំ២០១៤ កីឡាការិនីកម្ពុជារូបនេះទទួលបានសិទ្ធិពេញលេញក្នុងការចូលរួមប្រកួតកីឡាអូឡាំពិករដូវក្តៅនៅប្រទេសប្រេស៊ីល ឆ្នាំ២០១៦។ ប្រការនេះមានន័យថា ស៊ន សៀវម៉ី បានក្លាយជាអត្តពលិកកម្ពុជាដំបូងគេបង្អស់ដែលបានជាប់វគ្គជម្រុះក្នុងព្រឹត្តិការណ៍អូឡាំពិក។

សូមបញ្ជាក់ថា កីឡា ហែលទឹក និងអត្តពលកម្ម គឺជាប្រភេទកីឡាកាតព្វកិច្ចដែលប្រទេសជាសមាជិកអូឡាំពិកត្រូវបញ្ជូនអត្តពលិកចូលរួមប្រកួត ទោះបីជាជាប់វគ្គជម្រុះ ឬមិនជាប់ក៏ដោយ ដោយសារតែទទួលបានការអនុគ្រោះ និងបំពេញកាតព្វកិច្ចក្នុងនាមជាសមាជិក ប៉ុន្តែកីឡាផ្សេងៗទៀត ទាល់តែជាប់វគ្គជម្រុះទើបមានសិទ្ធិ ឬទទួលបានកៅអីចូលរួមប្រកួតក្នុងកីឡាអូឡាំពិក៕

អត្ថបទ៖ វីរបុត្រ