ប្រធាន AFF ចង់ឱ្យពាន AFF U-23 Championship ក្លាយជាការប្រកួតអចិន្ត្រៃយ៍

ប្រមុខ​សហព័ន្ធកីឡាបាល់ទាត់​អាស៊ី​អាគ្នេយ៍​ (AFF) បានប្រកាសនៅថ្ងៃ​ចន្ទ ទី​២៩ ខែ​ឧសភា​នេះថា ពានរង្វាន់ AFF U23 Championship 2023 នឹងធ្វើឡើងនៅទីក្រុងឈុនបុរី ប្រទេសថៃ ចាប់ពីថ្ងៃទី១៧ ដល់ថ្ងៃទី២៦ ខែសីហា ឆ្នាំ២០២៣ ហើយនឹងឃើញក្រុមបាល់ទាត់ជម្រើសជាតិអាយុក្រោម២៣​ឆ្នាំ​មកពី១០​ប្រទេសជាសមាជិកអាស៊ានចូល​រួម​ប្រកួត។

ពិធីចាប់ឆ្នោតជាផ្លូវការបានធ្វើឡើងនៅទីក្រុងបាងកក ប្រទេសថៃ នា​ព្រឹក​ថ្ងៃនេះ ​ដែល​ដំណើរការដោយប្រធានសហព័ន្ធ AFF លោក​នាយឧត្តមសេនីយ៍ទោ ខៀវ សាម៉េត, ប្រធានសហព័ន្ធបាល់ទាត់ឡាវ លោក Viphet Sihachakr និងប្រធានសមាគមបាល់ទាត់ថៃ លោកឧត្តមសេនីយ៍ឯក Somyot Poompanmoung ក្រោមវត្តមានរបស់​តំណាងមកពីសមាគម​ជា​សមាជិក និងមន្ត្រីក្រុមស្ទើរតែទាំងអស់។

លោក​នាយឧត្តមសេនីយ៍ទោ ខៀវ សាម៉េត បានមានប្រសាសន៍ថា ៖«យើងមានសេចក្តីសោមនស្សរីករាយក្នុងការបង្ហាញពីកាលបរិច្ឆេទ និងក្រុមសម្រាប់ការប្រកួតពានរង្វាន់ AFF U23 Championship ឆ្នាំនេះ ដែលមិនត្រឹមតែជាផ្នែកសំខាន់នៃការប្រកួត AFF ប៉ុណ្ណោះទេ ប៉ុន្តែវាក៏ជាវេទិកាដ៏សំខាន់មួយដើម្បីរៀបចំកីឡាករបាល់ទាត់ជំនាន់ក្រោយរបស់យើង ដើម្បីផ្លាស់ប្តូរទៅកាន់ក្រុមជម្រើសជាតិជាន់ខ្ពស់ផងដែរ»។

«វាតែងតែមានសារៈសំខាន់នៅក្នុងគំនិតរបស់យើង ដើម្បីធ្វើឱ្យការប្រកួតនេះក្លាយជាការប្រកួតអចិន្ត្រៃយ៍នៅក្នុងប្រតិទិននៃការប្រកួតរបស់យើង។ យើងមានមោទនភាពយ៉ាងខ្លាំងក្នុងការរៀបចំការប្រកួតជើងឯកម្តងទៀតនៅឆ្នាំនេះ»។ អនុប្រធានសហព័ន្ធកីឡាបាល់ទាត់កម្ពុជា​ផងដែររូបនេះបានសង្កត់ធ្ងន់។

គួរបញ្ជាក់ថា ក្រុមដែលចូលរួមទាំង ១០ត្រូវបានបែងចែកជា៣ពូល ម្ចាស់ផ្ទះថៃ ស្ថិតក្នុងពូល A ដែលមានកម្ពុជា ប្រ៊ុយណេ និងមីយ៉ាន់ម៉ា ខណៈក្រុមការពារតំណែងជើងឯក វៀតណាម ត្រូវប៉ះហ្វីលីពីន និងឡាវ ក្នុងពូល C។ រីឯពូល B មាន ទីម័រខាងកើត ម៉ាឡេស៊ី និង​ម្ចាស់​មេដាយ​មាសស៊ីហ្គេម ឥណ្ឌូណេស៊ី។

ក្រុមកំពូលនៃក្រុមនីមួយៗនឹងឈានទៅវគ្គពាក់កណ្តាលផ្តាច់ព្រ័ត្រ រួមជាមួយនឹងក្រុមលេខ២ ល្អបំផុតពីវគ្គចែកពូល ខណៈក្រុម​ឈ្នះ​វគ្គពាក់កណ្តាលផ្តាច់ព្រ័ត្រ នឹង​ឡើង​ទៅ​វគ្គផ្តាច់ព្រ័ត្រនៅថ្ងៃទី២៦ ខែសីហា ឆ្នាំ២០២៣៕

ប្រែសម្រួល៖ មន្នីរ័ត្ន
ប្រភព៖ aseanfootball.org