កីឡា

អតីតអ្នកប្រដាល់ ស សី បង្កើតក្លិបប្រដាល់ពីបាតដៃទទេកំពុងក្លាយជាថ្នាលដ៏សំខាន់

បានផុស

២ years មុន

នៅ

ថ្ងៃព្រហស្បតិ៍ ១០ សីហា ២០២៣

ដោយ

លោក ស សី បានបង្កើតក្លិបប្រដាល់ឈ្មោះ«សសីគុនខ្មែរ»បានក្លាយជាថ្នាលបណ្តុះបណ្តាលដ៏សំខាន់មួយក្នុងការជួយជំរុញ និងអភិវឌ្ឍធនធានកីឡាករ កីឡាការិនីប្រដាល់គុនខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតអ្នកប្រដាល់ ស សី បានបង្កើតក្លិបប្រដាល់តូចមួយឈ្មោះ«ស សីគុនខ្មែរ» បន្ទាប់ពីលោកបានឈប់ពីប្រដាល់កាលពីពាក់កណ្តាលឆ្នាំ២០១៩។ ក្លិបរបស់លោកដែលស្ថិតនៅភូមិស្វាយជ្រុំ ឃុំព្រែកដំបង ស្រុកមុខកំពូល ខេត្តកណ្តាលមិនមានទីធ្លារធំ ឬសម្ភារៈគ្រប់គ្រាន់ឡើយដោយគ្រាន់តែស្ថិតនៅផ្ទៃដីតូចមួយ បោះបង្គោលឈើ ប្រកស្លឹកដូង ស្លឹកត្នោត និងមានកម្រាលលើដី ហើយមានឧបករណ៍ហ្វឹកហាត់ចាស់ៗមួយចំនួនតូចប៉ុណ្ណោះ។

លោកបាននាំកូន និងក្មេងៗមួយចំនួនហ្វឹកហាត់ជាបណ្តើរៗហើយបានអភិវឌ្ឍក្លាយជាក្លិបបង្ហាត់ប្រដាល់ត្រឹមត្រូវដោយទទួលស្គាល់ជាផ្លូវការដោយសហព័ន្ធកីឡាប្រដាល់គុនខ្មែរ។ ក្នុងរយៈពេលប្រហែលជាពីរឆ្នាំចុងក្រោយនេះ កូនសិស្សរបស់លោកមួយចំនួនបានឡើងប្រកួតជាបន្តបន្ទាប់ និងមានកីឡាករមួយចំនួនមានសមត្ថភាពខ្លាំងគួរឲ្យកត់សំគាល់។

ជាក់ស្តែងកីឡាករ ម៉ាប់ ធារ៉ា (ស ធារ៉ា) ដែលជាកូនសិស្សរបស់លោក ស សី បានបានជាប់ជម្រើសជាតិគុនខ្មែរ និងបានឈ្នះមេដាយមាសស៊ីហ្គេម ឆ្នាំ២០២៣។ ឥឡូវនេះ កីឡាការិនី ស វិច្ឆិកា មកពីខេត្តកំពង់ធំជាកូនសិស្សរបស់លោកកំពុងក្លាយជាកីឡាការិនីដ៏ល្អម្នាក់ដោយបានឡើងប្រកួតឈ្នះកីឡាការិនីថៃជាបន្តបន្ទាប់។ ជាមួយគ្នានេះ លោកក៏មានកូនសិស្សជាច្រើនទៀតកំពុងហ្វឹកហាត់នៅក្លិបរបស់លោក។

ទោះបីជាយ៉ាងណា លោក ស សី បានប្រាប់«កម្ពុជាថ្មី»ថា រឿងលំបាកក្នុងការរៀបចំក្លិបប្រដាល់ឲ្យមានកម្រិតស្តង់ដាគឺជារឿងម្យ៉ាងហើយ ប៉ុន្តែអ្វីដែលលំបាកទៀតនោះគឺការចាប់គូឲ្យកូនសិស្សឡើងប្រកួត។ លោកមានកូនសិស្សដែលអាចឡើងប្រកួតបានហើយ តែមិនសូវទទួលបានឱកាសឲ្យកូនសិស្សបានឡើងប្រកួតទេ។

មួយរយៈពេលចុងក្រោយនេះដោយមើលឃើញការលំបាក និងខ្វះខាត ឧកញ៉ា ស្រី ចាន់ថន បានសម្រេចឧបត្ថម្ភជាថវិកា១លានរៀលក្នុងមួយខែសម្រាប់រយៈពេល២ឆ្នាំ ព្រមទាំងសម្ភារមួយចំនួនទៀត។

លោក ស សី បានប្រឡូកក្នុងអាជីពប្រដាល់រយៈពេលប្រមាណ២០ឆ្នាំមុនពេលលោកឈប់ដោយសារអាយុច្រើន។ បន្ទាប់មកលោកបានធ្វើជាគ្រូបង្វឹកនៅក្លិប Cambodian Top Team ដែលមានលោក ហ៊ុន ចាន់រាជ ជាស្ថាបនិកក្លិប ហើយលោកក៏ធ្លាប់ហ្វឹកហាត់ជាមួយក្លិបលោក អេ ភូថង៕