កីឡា

ពីរប្រកួតក្រៅស្រុករបស់ ផល សោភ័ណ្ឌ សុទ្ធតែចាញ់លឿនហួសពីការគិត

បានផុស

៣ years មុន

នៅ

ថ្ងៃសៅរ៍ ១៩ សីហា ២០២៣

ដោយ

ជើងឯកគុនខ្មែរ ផល សោភ័ណ្ឌ បានបរាជ័យក្រោមរន្ទះជើងរបស់កីឡាករម្ចាស់ផ្ទះរុស្ស៊ី Kamran Nabati នៅដើមទឹកទី១ កាលពីយប់ថ្ងៃទី១៨ ខែសីហា ឆ្នាំ២០២៣ នៅកម្មវិធី RCC Fair Fight 22 នៅទីក្រុងមូស្គូ ប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួបដែលអ្នកគាំទ្រទន្ទឹងរង់ចាំអស់រយៈពេលជាយូរមកហើយបានប្រព្រឹត្តទៅត្រឹមតែ១:១៣នាទីប៉ុណ្ណោះក៏ត្រូវបានបញ្ចប់ បន្ទាប់ពីកីឡាករ Nabati ប្រើជើងទាត់នាគវាត់កន្ទយចំមុខរបស់ ផល សោភ័ណ្ឌ បណ្តាលឲ្យសន្លប់។

តាមបទពិសោធឡើងសង្វៀនរាប់ឆ្នាំ និងឆ្លងកាត់ដៃគូរាប់ភ្លេច ផល សោភ័ណ្ឌ គួរតែបានតតាំង បញ្ចេញសមត្ថភាពអស់ បើទោះបីជាចាញ់ ឬឈ្នះយ៉ាងណាក៏ដោយ ប៉ុន្តែបែរជាបញ្ចប់ទៅយ៉ាងលឿនហួសពីការរំពឹងទុក និងជារឿងគួរឲ្យសោកស្តាយបំផុត។

លទ្ធផលនេះមិនខុសអ្វីកាលពីឆ្នាំ២០១៥ ផល សោភ័ណ្ឌ បានទៅប្រកួតនៅកម្មវិធីធំ Thai Fight ជាមួយវីរបុរសថៃ Saenchai ប៉ុន្តែការប្រកួតបានប្រព្រឹត្តទៅត្រឹមតែប៉ុន្មានវិនាទីប៉ុណ្ណោះក៏កីឡាករថៃប្រើកណ្តាប់ដៃផ្តួលអ្នកលេងគុនខ្មែរឲ្យសន្លប់យ៉ាងលឿន។ ការប្រកួតនេះក៏ជារឿងគួរឲ្យសោកស្តាយបំផុតដែរ។

តាមពិតទៅ ផល សោភ័ណ្ឌ ជាកីឡាករវ៉ៃក្បាច់ និងតែងតែធ្វើបានល្អរាល់ពេលដែលរូបគេប្រកួតនៅក្នុងប្រទេស ប៉ុន្តែនៅពេលចេញទៅប្រកួតនៅក្រៅស្រុកហាក់ដូចជាមិនកាក់កបសោះ។

នេះមិនមែនជារឿងចៃដន្យ ឬសំណាងមិនល្អនោះទេ ប៉ុន្តែជាការខ្វះចន្លោះនៅពេលជួបដៃគូដែលរហ័ស ចេញអាវុធលឿន និងប្រើក្បាច់ប្លែកៗ ខណៈកីឡាករកម្ពុជាមានទម្លាប់តាមរបៀបដែលធ្លាប់នោះក្នុងស្រុក ដូច្នេះជាចំណុចដែលត្រូវកែលំអនៅពេលចេញទៅប្រកួតនៅក្រៅស្រុក៕

អត្ថបទ៖ វីរបុត្រ