លោក Oleg ថា ភ្នំពេញក្រោនមិនមែនជាក្រុមល្អជាងគេនៅកម្ពុជាទេ

លោក Oleg Starynskyi មិន​បាន​ចាត់​ទុក​ក្លិប​​ភ្នំពេញ​ក្រោន​​ជាក្រុមល្អជាងគេក្នុង​ប្រទេស​កម្ពុជា​ឡើយ​ បើ​ទោះបី​ជា​ពីរ​ឆ្នាំ​ចុង​ក្រោយ​​ឈ្នះពានច្រើន។

ក្នុង​សន្និសីទ​សារព័ត៌មាន លោក Oleg Starynskyi គ្រូបង្វឹក​ភ្នំពេញក្រោន បាន​ឆ្លើយ​តប​នឹង​អ្នក​សារព័ត៌មាន​ហ្វីលីពីន​​ថា ៖«ភ្នំពេញក្រោនមិនមែនជាក្រុមខ្លាំង​ជាង​គេ​នៅកម្ពុជាទេ ទោះជា​យើង​បាន​ឈ្នះពានច្រើ​ន​ពីរ​ឆ្នាំចុងក្រោយនេះ។ ការឈ្នះពាន​កាល​ពី​ឆ្នាំ២០២១ ពួកយើង​ខុសគ្នាតែ២ពិន្ទុប៉ុណ្ណោះជា​មួយ​ក្រុមលេខ២។ កាលពីឆ្នាំ​២០២២ យើងមានពិន្ទុស្មើគ្នាជាមួយក្រុមលេខ២ទៀត ប៉ុន្តែយើងឈ្នះពានដោយសារគិតតាមប្រវត្តិ​ជួបគ្នា។ សម្រាប់ការប្រកួតវគ្គផ្តាច់ព្រ័ត្រលីគខាប់ និងស៊ុបភើខាប់គឺសុទ្ធតែជាការប្រកួតដ៏លំបាកដែលយើងឈ្នះដោយតានតឹង»។​

«និយាយពីការប្រកួតក្នុងលីគកំពូលកម្ពុជាគឺ​ប្រជែងខ្លាំង។ នេះហើយជាមូលហេតុ​នាំ​ឲ្យ​ភ្នំពេញ​ក្រោន​អភិវឌ្ឃខ្លួនបានល្អ ដោយសារមានការ​ប្រកួតតានតឹងនិង​ប្រ​ជែងខ្លាំងក្នុងលីគ។ មុនការប្រកួតជាមួយ Cebu ​យើងមានការប្រកួតដ៏​លំបាក​ជាមួយ​វិសាខា​កាល​ពី​ថ្ងៃ​អាទិត្យ ដែល​វិសាខា​ក៏​ក្រុម​បានបង្ហាញខ្លួនក្នុង​ពាន​ AFC Cup កាលពីឆ្នាំមុន​ដែរ»។ លោក Oleg បាន​បញ្ជាក់​បន្ថែម។

ក្រោមការដឹកនាំរបស់លោក Oleg Starynskyi ភ្នំពេញក្រោន​បាន​ឈ្នះ ពានរង្វាន់ជាច្រើនក្នុងនោះរួមមាន ពានរង្វាន់លីគកំពូលកម្ពុជា២លើក, ពានរង្វាន់ខេមបូឌានស៊ុបភើខាប់២លើក និងពានរង្វាន់លីគខាប់២លើក។ ឥឡូវ​នេះ​ពួក​គេ​កំពុង​ធ្វើ​ដំណើរ​យ៉ាង​ល្អ​ក្នុង​ពាន AFC Cup ដោយ​បាន​ប្រកួត​ឈ្នះ​៣​លើក​ជាប់​គ្នា៕

អត្ថបទ៖ រតនា