កីឡា

ខ្សែប្រយុទ្ធដ៏គ្រោះថ្នាក់របស់ Macarthur ត្រៀមប៉ះភ្នំពេញក្រោនធ្លាប់ឈ្នះជើងឯក Ligue 1

បានផុស

៣ years មុន

នៅ

ថ្ងៃអង្គារ ២៤ តុលា ២០២៣

ដោយ

ក្លិបអូស្ត្រាលី Macarthur FC ត្រូវធ្វើដំណើរមកកាន់ទឹកដីកម្ពុជា ដើម្បីប្រកួតជាមួយក្លិបភ្នំពេញក្រោនក្នុងពានរង្វាន់ AFC Cup នៅថ្ងៃព្រហស្បតិ៍ ទី២៦ ខែតុលា ឆ្នាំ២០២៣ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Macarthur ប្រើប្រាស់កីឡាករក្នុងស្រុកច្រើន ប៉ុន្តែក៏មានកីឡាករបរទេស៣រូបដែរគឺខ្សែបម្រើម៉ិកស៊ិកកីឡាករ Ulises Dávila, អ្នកចាំទីប៉ូឡូញកីឡាករ Filip Kurto និងខ្សែប្រយុទ្ធបារាំងកីឡាករ Valère Germain។

ខ្សែប្រយុទ្ធ Valère Germain ជាកីឡាករដ៏គ្រោះថ្នាក់ដែលមានបទពិសោធលេងនៅលីគកំពូលបារាំងរយៈពេល១៣ឆ្នាំ និងធ្លាប់ឈ្នះជើងឯកលីគកំពូលបារាំង១លើកផងដែរ។

ខ្សែប្រយុទ្ធវ័យ៣៣ឆ្នា Germain ចន្លោះឆ្នាំ២០១០-២០១៧ ជាសមាជិកក្រុមធំរបស់ក្លិប AS Monaco ដោយបង្ហាញខ្លួន១៥៩លើក និងស៊ុតបញ្ចូលទី៤១គ្រាប់ ជួយឲ្យក្លិប Monaco ឈ្នះពានរង្វាន់ Ligue 1 ក្នុងរដូវកាល ២០១៦-២០១៧។ ឆ្នាំ២០១៥-២០១៦ កីឡាកររូបគេលេងនៅក្លិប Nice ក្នុងលក្ខខណ្ឌខ្ចីជើង ដោយបង្ហាញខ្លួនបាន៣៨ប្រកួតស៊ុតបញ្ចូលទី១៤គ្រាប់។

ឆ្នាំ២០១៧ដល់២០២១ កីឡាករ Germain បានផ្លាស់ទៅកាន់ក្លិប Marseille ដោយបង្ហាញខ្លួនបាន១២០លើក និងស៊ុតបញ្ចូលទី២២គ្រាប់។ ឆ្នាំ២០២១-២០២៣ រូបគេបានផ្ទេរទៅ Montpellier ដោយបង្ហាញខ្លួនបាន៦៥លើក និងស៊ុតបញ្ចូលទី៦គ្រាប់។

ក្នុងខែកក្ដដា ឆ្នាំ២០២៣ កីឡាករ Germain បានផ្លាស់មកចូលរួមជាមួយក្លិប Macarthur FC របស់ប្រទេសអូស្ត្រាលី ដោយទើបបង្ហាញខ្លួនលើទីលានបាន១៥១នាទីក្នុងពានរង្វាន់ AFC Cup ស៊ុតបញ្ចូលទី៣គ្រាប់ និងបញ្ជូនបាល់ឲ្យមិត្តរួមក្រុម២លើក៕

អត្ថបទ៖ ផា រតនា