លោកគ្រូ ឃឹម បូរី បញ្ជាក់ពីបញ្ហាប្រឈមរបស់ណាហ្គាវើលដ៍ជុំទី១

ការប្រកួតជុំទី១​ពានរង្វាន់ខេមបូឌានព្រីមៀរលីគបានបញ្ចប់ហើយ ក្រោយដំណើរអស់រយៈពេល៣ខែ ក្លិបណាហ្គាវើលដ៍ធ្វើមិនបាន​ល្អ​ទេ ដោយបញ្ចប់ត្រឹមចំណាត់ថ្នាក់លេខ៨ ក្នុងតារាងពិន្ទុ។

លោក ឃឹម បូរី គ្រូបង្វឹកក្លិបណាហ្គាវើលដ៍បានមើលឃើញពីចំណុចខ្វះខាត​ដែល​ក្រុមរបស់លោកធ្វើមិនបានល្អ​ដោយ​សារ​​កីឡាករបរទេសសំខាន់ៗរបួសច្រើន និងជាប់ពិន័យនៅពេលជិតបញ្ចប់ការប្រកួតជុំទី១។

លោក ឃឹម បូរី បានប្រាប់«កម្ពុជាថ្មី»ថា៖«សម្រាប់ស្ថានភាពជុំទី១គឺក្រុមរបស់ខ្ញុំធ្វើមិនបានល្អទេ ព្រោះ​កីឡាករសំខាន់ៗរបស់ខ្ញុំ៣រូប​បាន​របួស ហើយ​កីឡាករ Cristian ជាប់ពិន័យ៤ប្រកួត។​ ការប្រកួត៣លើកចុងក្រោយរបស់ណាហ្គាវើលដ៍ មានកីឡាករបរទេសតែ២រូបលេងនៅលើទីលាន​គឺ Yuta និង Bektur។ បញ្ហា​​ទាំង​នេះ​ហើយ​ធ្វើ​​ឲ្យ​ណាហ្គាវើលដ៍​លេងការពារ​ច្រើន។ នេះជាមូលហេតុដែល​ក្រុម​យើង​​ធ្វើមិនបានល្អ»។

ក្រោយបញ្ចប់ជុំទី១ ក្នុងពានរង្វាន់ខេមបូឌានព្រីមៀរលីគ បាល់ទាត់ណាហ្គាវើលដ៍ឈរនៅលេខរៀងទី៨ ក្នុងតារាងពិន្ទុដោយប្រកួត៩លើក ឈ្នះ២ ស្មើ៣ ចាញ់៤ មាន៩ពិន្ទុ។

ចំពោះ​ការប្រកួតជុំទី២ ​បាន​មកដល់ ស្របពេល​ទីផ្សារដោះ​ដូរ​កីឡាករលើកទី២នៅលីគកំពូលកម្ពុជា បានបើកដំណើរកាល លោក ឃឹម បូរី មានគម្រោង​នាំយកកីឡាករបន្ថែមដើម្បីបំពេញចំណុចខ្វះខាត។ ជាពិសេសកីឡាករ​កំពុង​​របួស៣រូបសំខាន់ៗ​គឺកីឡាករ Marques Marcio, Rafli Mursalim និង Alexandre Cardoso សុទ្ធតែជាកម្លាំងសំខាន់សម្រាប់ក្រុមទាំងមូល៕

អត្ថបទ៖ ផា រតនា