កីឡា

ក្រោយរង់ចាំ៣៨ឆ្នាំ យុវជនអាល្លឺម៉ង់ឡើងដល់វគ្គផ្ដាច់ព្រ័ត្រ World Cup U17 ជាលើកទី២

បានផុស

២ years មុន

នៅ

ថ្ងៃព្រហស្បតិ៍ ៣០ វិច្ឆិកា ២០២៣

ដោយ

ក្រុមបាល់ទាត់ជម្រើសជាតិអាល្លឺម៉ង់អាយុក្រោម១៧ឆ្នាំ ឡើងដល់វគ្គផ្ដាច់ព្រ័ត្រជើងឯកពិភពលោកអាយុក្រោម១៧ឆ្នាំ (World Cup U17) ជាលើកទី២ក្នុងប្រវត្តិសាស្រ្ត ក្រោយរង់ចាំអស់រយៈពេល៣៨ឆ្នាំ បន្ទាប់ពីបានឈ្នះក្រុមអាហ្សង់ទីននៅវគ្គពាក់កណ្តាលផ្តាច់ព្រ័ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាល្លឺម៉ង់ធ្វើមិនសូវបានល្អទេក្នុងការប្រកួតជើងឯកពិភពលោក World Cup U17 បើគិតចាប់តាំងពីឆ្នាំ១៩៨៥ ជាឆ្នាំដំបូងដែលព្រឹត្តិការណ៏នេះចាប់ផ្ដើម។ នៅឆ្នាំដំបូងនោះ អាល្លឺម៉ង់បានឡើងទៅវគ្គផ្ដាច់ព្រ័ត្រ និងទទួលបានត្រឹមចំណាត់ថ្នាក់លេខ២ ក្រោយចាញ់ក្រុមនីហ្សេរីយ៉ា ២-០ នៅប្រទេសចិន ប៉ុន្តែក្រោយមកធ្វើមិនបានលទ្ធផលល្អទេ។ ទើបដល់ឆ្នាំ២០២៣នេះបានពួកគេបានឡើងដល់វគ្គផ្តាច់ព្រ័ត្រម្តងទៀត។

ថ្ងៃសៅរ៍ ទី២ ខែធ្នូ ឆ្នាំ២០២៣ អាល្លឺម៉ង់ត្រូវធ្វើការធ្ងន់ជាមួយក្រុមយុវជនបារាំងក្នុងវគ្គផ្ដាច់ព្រ័ត្រ World Cup U17។ អាល្លឺម៉ង់ដែលដឹកនាំដោយគ្រូបង្វឹកលោក Christian Wuck ធ្វើបានយ៉ាងល្អតាំងពីវគ្គសន្សំពិន្ទុក្នុងពូលរហូតឡើងមកដល់វគ្គផ្ដាច់ព្រ័ត្រ។

វគ្គសន្សំពិន្ទុ ក្រុមអាល្លឺម៉ង់ឈរលេខ១ ក្នុងពូល F ដោយប្រកួត៣លើកឈ្នះទាំង៣ មាន៩ពិន្ទុ។ នៅវគ្គ១៦ក្រុមចុងក្រោយ ពួកគេបានយកឈ្នះសហរដ្ឋអាមេរិកដោយលទ្ធផល ៣-២ និងវគ្គ៨ក្រុមចុងក្រោយបន្តយកឈ្នះអេស្ប៉ាញ ១-០។ វគ្គពាក់កណ្តាលផ្តាច់ព្រ័ត្រ អាល្លឺម៉ង់បានឈ្នះអាហ្សង់ទីន ដោយការទាត់ប៉េណាល់ទីកាត់សេចក្តី ៤-២ ស្មើគ្នា ៣-៣។