កីឡា

គ្រូព្រះខ័នរាជស្វាយរៀងសរសើរអ្នកចាំទី ស៊ូ យ៉ាទី ធ្វើបានល្អឥតខ្ចោះ

បានផុស

៣ years មុន

នៅ

ថ្ងៃចន្ទ ៤ ធ្នូ ២០២៣

ដោយ

ណាហ្គាវើលដ៍បានក្លាយជាក្រុមដំបូងគេសម្រាប់ការបញ្ឈប់ក្រុមព្រះខ័នរាជស្វាយរៀងក្នុងលីគបាល់ទាត់កំពូលកម្ពុជារដូវកាលនេះតាមរយៈលទ្ធផល ១-០ នៅដីរបស់ខ្លួននាខេត្តកំពង់ស្ពឺ កាលពីល្ងាចថ្ងៃអាទិត្យ ទី៣ ខែធ្នូ ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រាប់បាល់ជ័យជម្នះក្នុងសប្តាហ៍ទី១២របស់ណាហ្គាវើលដ៍បានកើតឡើងតាំងពីនាទីទី៦ ដើមវគ្គទី១ ដោយខ្សែការពារ ឡេង មករា តែតចូល បន្ទាប់ពីខ្សែការពារ នេន សុធារ័ត្ន លើកបាល់ហ្វ្រីឃីក។ ការប្រកួតបន្តបន្ទាប់មក ព្រះខ័នរាជស្វាយរៀងគ្រប់គ្រងលើការប្រកួតស្ទើរទាំងស្រុងរហូតដល់ចប់ ប៉ុន្តែណាហ្គាវើលដ៍បានចុះការពារភាគច្រើនបំផុត ហើយអ្នកចាំទី ស៊ូ យ៉ាទី បានសង្គ្រោះយ៉ាងល្អឥតខ្ចោះមិនក្រោម២០លើកឡើយ។

ពាក់ព័ន្ធនឹងការប្រកួតនេះ លោក Pep Muñoz គ្រូបង្វឹកព្រះខ័នរាជស្វាយរៀងបានលើកឡើងថា ៖«យើងបានគ្រប់គ្រងការប្រកួតតាំងពីដំបូងរហូតដល់ចប់ការប្រកួត។ យើងមានឱកាសច្រើនណាស់ក្នុងការរកគ្រាប់បាល់តាមរយៈបច្ចេកទេសជាច្រើន ប៉ុន្តែអ្នកចាំទី ស៊ូ យ៉ាទី ពិតជាធ្វើបានយ៉ាងល្អឥតខ្ចោះ»។

«តាមធម្មតា យើងអាចរកបានគ្រាប់បាល់តាមរយៈបច្ចេកទេសលេងទាំងនោះ តែលើកនេះធ្វើមិនបានសម្រេច។ យើងនៅមានការប្រកួតច្រើនទៀត។ យើងដឹងថា ក្រុមទាំងអស់សុទ្ធតែធ្វើអ្វីគ្រប់យ៉ាងដើម្បីយកឈ្នះពួកយើង ដូច្នេះយើងត្រូវតែឆ្ពោះទៅការប្រកួតបន្ទាប់ទៀតដោយខំប្រឹងព្យាយាមធ្វើឲ្យបានល្អជាងនេះ ជាពិសេសនៅក្នុងប្រអប់គ្រោះថ្នាក់»។ លោកគ្រូបង្វឹកសញ្ជាតិអេស្ប៉ាញបានសង្កត់ធ្ងន់។

ព្រះខ័នរាជស្វាយរៀងដែលបានចាញ់ជាលើកដំបូងក្នុងចំណោម១២ប្រកួតនៃខេមបូឌានព្រីមៀរលីគរដូវកាល២០២៣-២៤ មាន៣១ពិន្ទុ បន្តឈរលេខ១ក្នុងតារាងពិន្ទុ ដោយបាននាំមុខគូប្រជែងលេខ២គឺភ្នំពេញក្រោន (២៣ពិន្ទុ) ដល់ទៅ៨ពិន្ទុ ប៉ុន្តែភ្នំពេញក្រោនមិនទាន់ប្រកួតសប្តាហ៍ទី១២ទេដោយត្រូវប្រកួតនៅល្ងាចថ្ងៃចន្ទនេះជាមួយក្រសួងការពារជាតិ។ ប្រសិនបើភ្នំពេញក្រោនឈ្នះនឹងកាត់បន្ថយពិន្ទុនៅសល់ការនាំមុខត្រឹម៥ពិន្ទុ។

អ្វីដែលគួរឲ្យកត់សំគាល់ក្នុងជើងទី២ ណាហ្គាវើលដ៍ធ្វើបានល្អដោយបានប្រកួតស្មើជាមួយក្រុមខ្លាំង វិសាខា ១-១ នៅសប្តាហ៍ទី១១ និងឈ្នះព្រះខ័នរាជស្វាយរៀង ១-០ នៅសប្តាហ៍ទី១២ បន្ទាប់ពីធ្វើមិនសូវបានល្អកាលពីជើងទី១។ ទោះបីជាយ៉ាងណា ណាហ្គាវើលដ៍នៅមិនទាន់មានទម្រង់ប្រយុទ្ធគួរឲ្យកត់សំគាល់ច្រើនឡើយដោយបានព្យាយាមការពារ និងវាយបកភាគច្រើន៕