កីឡា

លន បញ្ញា ផ្ដាំទៅអ្នកចង់ចាប់អាជីពប្រដាល់កុំធ្វើតាមអារម្មណ៍

បានផុស

១ year មុន

នៅ

ថ្ងៃសុក្រ ៨ ធ្នូ ២០២៣

ដោយ

កីឡាករ លន បញ្ញា ម្ចាស់មេដាយមាសស៊ីហ្គេមបានផ្តាំទៅអ្នកដែលចង់ចាប់អាជីពប្រដាល់ត្រូវសួរខ្លួនឯងឲ្យច្បាស់មុនធ្វើការសម្រេចចិត្តថាតើខ្លួនពិតជាស្រឡាញ់ប្រដាល់ពិតប្រាកដឬយ៉ាងណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយសារព័ត៌មាន«កម្ពុជាថ្មី» អ្នកលេងគុនខ្មែរ លន បញ្ញា បានប្រាប់ទៅប្អូនៗ និងអ្នកមានបំណងចាប់អាជីពប្រដាល់ថា សូមកុំធ្វើតាមអារម្មណ៍ខ្លួនឯង ដោយគ្រាន់តែឃើញគុនខ្មែរកំពុងល្បី ហើយចង់ចូលហ្វឹកហាត់តាមអារម្មណ៍ ពីព្រោះគុនខ្មែរត្រូវការហ្វឹកហាត់តាំងពីក្មេង និងត្រូវមានទេពកោសល្យថែមទៀត។

លន បញ្ញា បាននិយាយថា ៖«ប្រសិនបើចាប់អាជីពគុនខ្មែរដោយគ្មានឆន្ទៈពិតប្រាកដ ឃើញគេហាត់ ក៏ចង់ហាត់ដែរជារឿងមិនល្អទេ។ ចាំថា ត្រូវមានឆន្ទៈ និងចំណងចំណូលចិត្តពិតប្រាកដ។ ចំណុចសំខាន់មួយទៀតគឺត្រូវមានរាងកាយមាំមួន។ ត្រូវមើលថា កាយសម្បទាយើងមានអំណោយផលសម្រាប់អាជីពឈឺខ្លួន? បើសុខភាពយើងមិនល្អ សូមកុំចូលហ្វឹកហាត់។ ការហាត់គុនខ្មែរត្រូវមានរាងកាយមាំមួន សុខភាពល្អ ដោយមានដុងពីកំណើត មានឆន្ទៈស្រឡាញ់ពិតប្រាកដចាំមកហ្វឹកហាត់ទើបជោគជ័យ។ អ្នកមានអាយុច្រើនចាប់ពី២៥ឆ្នាំឡើងទៅ យកល្អកុំហាត់ ពីព្រោះការហាត់គុនខ្មែរត្រូវការហ្វឹកហាត់តាំងពីក្មេង តែត្រឹមអាយុ១៨ឆ្នាំអាចចូលហ្វឹកហាត់បាន»។

លន បញ្ញា ជាកីឡាករឃីកបុកស៊ីង និងគុនខ្មែរដ៏ល្អម្នាក់នៅក្នុងប្រទេសកម្ពុជាដែលបានឈ្នះមេដាយមាស១ និងប្រាក់១ ពីកីឡាស៊ីហ្គេមពីរលើកចុងក្រោយ។ នៅស៊ីហ្គេម លើកទី៣២ រូបគេបានឈ្នះមេដាយមាសលើកីឡាឃីកបុកស៊ីងទម្ងន់ ៦៧គីឡូក្រាម ក្រោយឈ្នះកីឡាករ Haris Sofyan Abdul របស់ឥណ្ឌូណេស៊ី។ គិតត្រឹមចុងឆ្នាំ២០២៣ រូបគេជាកីឡាករគុនខ្មែរមួយរូបដែលមិនទាន់ស្គាល់បរាជ័យក្នុងការប្រកួតគុនខ្មែរជិត៣ឆ្នាំចុងក្រោយ។

លន បញ្ញា មានឱកាសប្រកួតដណ្ដើមរង្វាន់រថយន្ត២លើកហើយ ប៉ុន្តែការប្រកួតលើកទី១នៅប្រទេសអូស្រ្តាលីបានខកខានទៅវិញដោយសារមានបញ្ហាសុខភាព។ សម្រាប់ឱកាសដណ្តើមរង្វាន់រថយន្តលើកទី២ពីប៊ូសស្ត្រង រូបគេត្រៀមខ្លួនបានយ៉ាងល្អ៕

អត្ថបទ៖ ផា រតនា