ក្រុមខ្លាំង៣មានកីឡាករបរទេសប្រកួតលីគបាល់ទះកំពូលកម្ពុជា

ការប្រកួត​​​លីគ​បាល់ទះ​កំពូល​កម្ពុជា​រដូវ​កាល​ដំបូង​នឹង​ចាប់​ផ្តើម​​បើក​ជា​ផ្លូវ​ការ​នៅ​ថ្ងៃ​ទី​១២ ខែ​មករា ឆ្នាំ​២០២៤ នៅ​ពហុកីឡដ្ឋាន​ជាតិ​អូឡាំពិក​ដោយ​មាន​​ក្រុម​អាជីពចំនួន​៨​ចូល​រួម​ប្រកួត​ប្រជែង។

អ្វី​ដែល​​ពិសេស​នោះ ការ​ប្រកួត​ត្រូវ​បាន​អនុញ្ញាត​ឲ្យ​មាន​កីឡាករ​ប្រទេស​ចូល​រួម ហើយ​ក្នុង​មួយ​ក្រុម​ៗ​អាច​ចុះ​ឈ្មោះ​បញ្ជី​កីឡាករ​បរទេស៣​រូប។ រហូត​មក​ដល់​ពេល​នេះ​មាន​ក្រុម​ចំនួន​៣​​ដែល​បាន​នាំ​ចូល​កីឡាករ​បរទេស​ចូល​រួម។

លោក អាំង សិរីពិសិដ្ឋ អនុប្រធាន និង​ជា​អគ្គលេខាធិការ​សហព័ន្ធ​កីឡា​បាល់ទះ​កម្ពុជា​បាន​ឲ្យ​ដឹង​ថា រហូត​មក​ដល់​ពេល​នេះមាន​ក្រុម​៣​​ដែល​បាន​នាំ​ចូល​កីឡាករ​បរទេសគឺ សមាគម​បាល់ទះ​វិសាខា សមាគម​បាល់ទះក្រសួង​មហា​ផ្ទៃ និង​បញ្ជាការដ្ឋាន​អង្គរក្ស។

ក្រុម​វិសាខា​​បាន​នាំ​ចូល​សមាជិក​បរទេស​​ច្រើន​ខែ​មក​ហើយ​គឺ​កីឡាករគុយបា Sanchez Lester កម្ពស់​១.៨៤​ម៉ែត្រ, កីឡាករ Herrera Raciel កម្ពស់​ ១.៩៨ម៉ែត្រ និង​កីឡាករ Pelayobernal Henry កម្ពស់២.១០ម៉ែត្រ។ ពួក​គេ​កំពុង​យល់​ចិត្ត​គ្នា​ជា​មួយ​មិត្តរួម​ដែល​​នឹង​ក្លាយ​ជា​ក្រុម​មួយ​ប្រជែង​ជើង​ឯក។

នៅ​ក្លិប​បញ្ជាការដ្ឋាន​អង្គរក្ស​បាន​នាំ​យក​កីឡាករ​ឥណ្ឌូណេស៊ី​៣​មក​ពង្រឹង​ក្រុមក្នុង​នោះ​កីឡាករកីឡាករ Dio Zulfikri អាយុ​២៧​ឆ្នាំ មាន​បទ​ពិសោធ​ច្រើន​ទាំង​ជម្រើស​ជាតិ​ឥណ្ឌូណេស៊ី និង​លីគ​បាល់ទះ​កំពូល​ឥណ្ឌូណេស៊ី។ រូប​គេ​បាន​ជួយ​ក្រុម​ឥណ្ធូណេស៊ី​ឈ្នះ​មេដាយ​មាស​កីឡា​ស៊ីហ្គេម៣លើក​ចុង​ក្រោយ​ជាប់​គ្នា និង​ធ្លាប់​ឈ្នះ​ជើង​ឯកលីគ​កំពូល​ឥណ្ឌូណេស៊ី​៣​លើក​។ ពីរ​នាក់​ទៀត​ជា​កីឡាករ​វ័យ​ក្មេង​ដែល​កំពុង​ពេញ​កម្លាំង។

ចំណែក​ក្រុម​បាល់ទះ​ក្រសួង​មហា​ផ្ទៃ​​បាន​នាំ​ចូល​កីឡាករ​បាល់ទះ​វៀតណាម​៣​រូប​សម្រាប់​ការ​ប្រកួត​លីគរដូវ​កាល​ដំបូង​នេះ។ ក្រុមកីឡាបាល់ទះក្រសួងមហាផ្ទៃ ប្រកាសនាំចូលកីឡាករបរទេសជនជាតិវៀតណាម៣នាក់ ត្រៀមសម្រាប់ពានរង្វាន់ «តេជោលីគ»។ កីឡាករ​វៀតណាម​ទាំង​៣​នាក់​គឺ Pham Thoa Khuong, Che Quoc Volit និង​កីឡាករ Tran Duc Hanh។ កីឡាករ Che Quoc Volit កម្ពស់​១.៩៨ម៉ែត្រ មក​ពី​ក្លិប TP. Hồ Chí Minh ដែល​​ធ្លាប់​​ឈ្នះ​ជើង​ឯក​​នៅ​​វៀតណាម​៣​ដងគឺ​ឆ្នាំ២០១៩ ២០១៨ និង​២០១៥ ខណៈ​២​រូប​ទៀត​មិន​មាន​ព័ត៌មាន​ទេ។

ព្រឹត្តិការណ៍​លីគ​បាល់ទះ​កំពូល​កម្ពុជា​ដែល​ហៅ​កាត់​ «តេជោលីគ»​​នឹង​ចាប់​ផ្តើម​នៅ​ថ្ងៃទី១២ ខែ​មករា ដល់​ទី​ថ្ងៃ​១៨ ខែ​កុម្ភៈ ឆ្នាំ​២០២៤​ នៅវិមានពហុកីឡដ្ឋានជាតិអូឡាំពិក។ ក្នុង​ពិធី​បើក​​លីគ​បាល់ទះ​កម្ពុជា​រដូវ​កាល​ដំបូង ក្រុមខ្លាំង​​វិសាខា​ដែល​ឈាន​មុខ​គេ​ក្នុង​​ប្រទេស​កម្ពុជា​ត្រូ​ស្វាគមន៍​ក្រុម​ខ្លាំង​វៀតណាម Sanest Khanh Hoa ក្នុង​ជំនួប​មិត្តភាព​អន្តរជាតិ​វេលា​ម៉ោង​៦​​ល្ងាច។ បន្ទាប់​មក​នៅ​ថ្ងៃ​ទី​១៣ ខែ​មករា ការ​ប្រកួត​តេជោលីគ​ចាប់​ផ្តើម។

​ក្រុម​បាល់ទះ​អាជីព​ចំនួន​៨​ចូល​រួម​ប្រកួតរួម​មាន​ ក្រុម​​បាល់ទះ​វិសាខា ​ក្រសួង​មហា​ផ្ទៃ ​បញ្ជាការដ្ឋាន​អង្គរក្ស កងពលធំអន្តរាគមន៍លេខ៣ នគរ​បាល​រាជ​ធានី​ភ្នំពេញ ក្រុម​នគរ​បាល​​ព្រះ​​សីហនុ ក្រុម​​នគរ​បាល​ពោធិ៍​សាត់ និង​ក្រុម​​នគរ​បាល​ខេត្ត​កណ្តាល​។

កម្មវិធី​ប្រកួត​ថ្ងៃ​ទី​១២ ខែ​មករា

• វិសាខា vs Sanest Khanh Hoa (ម៉ោង​៦​ល្ងាច)

កម្មវិធី​ថ្ងៃ​ទី​១៣ ខែ​មករា

• បញ្ជាការដ្ឋាន​អង្គរក្ស vs ក្រុម​នគរ​បាល​​ព្រះ​​សីហនុ (ម៉ោង១​រសៀល)
• ក្រសួង​មហា​ផ្ទៃ vs ក្រុម​​នគរ​បាល​ពោធិ៍​សាត់ (ម៉ោង៣​រសៀល)
• វិសាខា vs ​ក្រុម​​នគរ​បាល​ខេត្ត​កណ្តាល​ (៥​រសៀល)
• កងពលធំអន្តរាគមន៍លេខ vs នគរ​បាល​រាជ​ធានី​ភ្នំពេញ (ម៉ោង៧​យប់)

អត្ថបទ៖ វីរបុត្រ