កីឡា

ចប់សប្តាហ៍ទី១ ក្រុមវិសាខាឈរលើកំពូលតារាងបាល់ទះតេជោលីគ

បានផុស

២ years មុន

នៅ

ថ្ងៃចន្ទ ១៥ មករា ២០២៤

ដោយ

ការប្រកួតបាល់ទះលីគកំពូលកម្ពុជា ហៅកាត់«តេជោលីគ»រដូវកាលដំបូងបានចប់សប្តាហ៍ទី១ដោយក្រុមខ្លាំងវិសាខាបានឈរលើកំពូលតារាងពិន្ទុ បន្ទាប់ពីធ្វើបានល្អជាងគេក្នុងចំណោមការប្រកួតទាំងពីរលើក។

នៅថ្ងៃទី១ ក្រុមវិសាខាបានយកឈ្នះក្រុមនគរបាលខេត្តកណ្តាល ដោយលទ្ធផល ៣-០ (ពិន្ទុ ២៥-១៤, ២៥-១៨ និង២៥-១២)។ ការប្រកួតថ្ងៃទី២ វិសាខាបានយកឈ្នះក្រុមនគរបាលខេត្តពោធិ៍សាត់ដោយលទ្ធផល ៣-០ (ពិន្ទុ ២៥-១៦, ២៥-២៣ និង ២៥-១២)។ តាមរយៈលទ្ធផលទាំងពីរលើកដែលមានគ្រាប់បាល់ចំណេញច្រើនជាងគេរុញច្រានឲ្យវិសាខាបានឈរលើកំពូលតារាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមដែលមិនទាន់ស្គាល់បរាជ័យដូចវិសាខាគឺ បញ្ជាការដ្ឋានអង្គរ និងក្រសួងមហាផ្ទៃដែលឈ្នះពីរប្រកួតដូចគ្នា។ ក្រុមនគរបាលខេត្តព្រះសីហនុជាក្រុមមកពីខេត្តដែលធ្វើបានល្អជាង បន្ទាប់ពីឆ្លងកាត់កាត់២ប្រកួតឈ្នះ១ប្រកួត និងចាញ់១ប្រកួត ដោយកំពុងឈរលេខ៤ក្នុងតារាងពិន្ទុ។

ដោយឡែក ក្រុមធ្វើមិនសូវបានល្អដោយត្រូវបានដៃគូរកបានពិន្ទុច្រើនគ្រាប់ និងរកបានពិន្ទុពីដៃគូបានតិចគឺក្រុមនគរបាលខេត្តកណ្តាលស្ថិតនៅចំណាត់ថ្នាក់លេខ៨ (បាតតារាង) និងក្រុមនគរបាលខេត្តពោធិ៍សាត់ស្ថិតនៅចំណាត់ថ្នាក់លេខ៧។

សូមបញ្ជាក់ថា បន្ទាប់ពីចប់ការប្រកួតវិលជុំសន្សំពិន្ទុ ក្រុមលេខ៧ និងលេខ៨ត្រូវកាត់ចោល ខណៈ៦ក្រុមខាងលើនឹងបន្តទៅប្រកួតវិលជុំសន្សំពិន្ទុលើកទី២។