កីឡា

Taito ជាជើងឯក K-1 ពិភពលោកមិនទាន់បរាជ័យ៣ឆ្នាំចុងក្រោយ

បានផុស

៨ ខែ មុន

នៅ

ថ្ងៃព្រហស្បតិ៍ ១ កុម្ភៈ ២០២៤

ដោយ

កីឡាករឃីកបុកស៊ីងជប៉ុន Taito Gunji កំពុងគ្រប់គ្រងខ្សែក្រវាត់ K-1 ពិភពលោក២ប្រភេទទម្ងន់ផ្សេងគ្នាដែលមិនទាន់ស្គាល់បរាជ័យឡើងសម្រាប់ការឡើងសង្វៀនរយៈពេល៣ឆ្នាំចុងក្រោយ។

កីឡាករកើតនៅថ្ងៃទី១៧ ខែមករា ឆ្នាំ១៩៩៩ បានចាប់ផ្តើមប្រកួតលក្ខណៈស្ម័គ្រចិត្តពីឆ្នាំ២០១៤ រហូតដល់ឆ្នាំ២០១៦ ដែលបានឆ្លងកាត់សង្វៀន១២លើកគឺទទួលបានជ័យជម្នះ១១លើក និងចាញ់១លើក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណា នៅឆ្នាំ២០១៥ Taito ក៏បានផ្តើមប្រកួតលក្ខណៈអាជីពរហូតដល់បច្ចុប្បន្ន។ សម្រាប់ការប្រកួតអាជីពរហូតដល់ដើមឆ្នាំ២០២៤ រូបគេបានឡើងសង្វៀន៣០ដង ក្នុងនោះឈ្នះ២៤ដង ចាញ់៥ដង និងស្មើ១ដង។

សម្រាប់ការប្រកួតលក្ខណៈមិនអាជីព Taito ធ្លាប់ឈ្នះជើងឯក៣គ្រឿងគឺនៅឆ្នាំ២០១៤ បានឈ្នះជើងឯក K-1 Challenge B-Class Super Bantamweight ទម្ងន់៥៥គីឡូក្រាម និងឈ្នះជើងឯក K-1 Challenge A-Class Super Bantamweight ហើយឆ្នាំ២០១៦ បានឈ្នះជើងឯក K-1 Koshien Super Bantamwieght ទម្ងន់៥៥គីឡូក្រាម។

បច្ចុប្បន្ន រូបគេបានកំពុងគ្រប់គ្រងខ្សែក្រវាត់ឃីកបុកស៊ីងអាជីពពិភពលោក K-1 ពីរប្រភេទទម្ងន់ផ្សេងគ្នាគឺនៅឆ្នាំ២០១៥ បានឈ្នះខ្សែក្រវាត់ទម្ងន់ K-1 Featherweight និងធ្លាប់បានឡើងប្រកួតការពារខ្សែក្រវាត់នេះជោគជ័យបានមួយដង ហើយនៅឆ្នាំ២០២២ បានឈ្នះខ្សែក្រវាត់ K-1 Featherweight World Grand Prix។ ក្រៅពីនេះ រូបគេក៏ធ្លាប់ឈ្នះខ្សែក្រវាត់ទម្ងន់ Bantamwieght នៅសង្វៀន Krush ក្នុងឆ្នាំ២០១៧។

គិតចាប់ពីធ្នូ ឆ្នាំ២០២០ រហូតដល់ដើម្បី២០២៤ពោលគឺមានរយៈពេលជាង៣ឆ្នាំហើយដែលកីឡាករ Taito Gunji មិនទាន់ចាញ់ឡើងក្នុងចំណោមប្រកួត១២ប្រកួតចុងក្រោយ។ កីឡាករបរទេសដែលចាញ់រូបគេក្នុងរយៈពេលជាង៣ឆ្នាំចុងក្រោយនេះមានថៃ ក្រិក ចិន និងអាហ្សង់ទីន។

និយាយជារួមសម្រាប់ដៃគូដែលជាកីឡាករបរទេសគឺរូបគេមិនដែលចាញ់ឡើយ ហើយប្រវត្តិចាញ់៥ដងក្នុងអាជីពក្រោមស្នាដៃមិត្តរួមជាតិ។

ទោះបីជាយ៉ាងណា ក្នុងប្រវត្តិឡើងសង្វៀន៤០ដងទាំងអាជីព និងស្ម័គ្រចិត្ត កីឡាករទម្ងន់ស្រាលជប៉ុនរូបនេះមិនធ្លាប់ចេញទៅប្រកួតនៅក្រៅប្រទេសឡើយពោលគឺប្រកួតនៅតែក្នុងប្រទេសជប៉ុនតែមួយគត់។

អត្ថបទ៖ វីរបុត្រ