Macarthur ឡើងវគ្គផ្ដាច់ព្រ័ត្រ AFC Cup ក្នុងតំបន់អាស៊ានលើកដំបូង

ក្រុម Macarthur FC របស់ប្រទេសអូស្ដ្រាលី បានយកឈ្នះក្រុម Sabah របស់ប្រទេសម៉ាឡេស៊ីក្នុងលទ្ធផល ៣-០ ក្នុងវគ្គពាក់កណ្ដាលផ្ដាច់ព្រ័ត្រក្នុងតំបន់អាស៊ាន​ជើងឯក AFC Cup ឆ្នាំ​២០២៣-២៤។

ការប្រកូតក្នុងវគ្គទី១ក្រុម Macarthur បានបើកការនាំមុខមុន ១-០ នៅនាទី៤០ ស៊ុតបញ្ចូលដោយកីឡាករ Davila ចូលដល់វគ្គទី២ គ្រាប់បាល់២គ្រាប់ទៀតបន្តកើតមានឡើង ក្រោយការស៊ុតបញ្ចូលទី២គ្រាប់ម្នាក់ឯងពី Jed Drew នៅនាទី៤៦និងនាទី៨០។ ក្នុងការប្រកួតនេះក្រុម Sabah ក៏បានព្យាយាមបង្កើតឱកាស​ ដើម្បីរកគ្រាប់បាល់បំប៉ោងសំណាញ់ទីដែរ ប៉ុន្តែធ្វើមិនបានល្អសោះ ក្រោយការព្យាយាមស៊ុត១១លើក តែមិនចំគោលដៅសូម្បី១លើក។

ក្រោយបញ្ចប់ការប្រកួតក្រុម Macarthur FC បានកក់កៅអីក្នុងវគ្គផ្ដាច់ព្រ័ត្រ AFC Cup ក្នុងតំបន់អាស៊ាន ជាលើកដំបូងក្នុងប្រវត្តិសាស្រ្ដរបស់ខ្លួន ខណៈត្រូវរង់ចាំមើលលទ្ធផលការប្រកួតរបស់ក្រុម Central Coast Mariners និងក្រុមភ្នំពេញក្រោន។

ក្រុម Macarthur សុទ្ធតែស្គាល់ពីសមត្ថភាពក្រុមទាំង២នេះច្បាស់ណាស់ ក្នុងនោះដោយសារពួកគេធ្លាប់ជួបក្រុមភ្នំពេញក្រោន ២លើកក្នុងការប្រកួតវគ្គសន្សំពិន្ទុក្នុងពូល។ ចំណែក​ក្រុម Central Coast Mariners នៅលីគ​អូស្ត្រាលី​ជា​មួយ​គ្នា។

បើមិនមានការប្រែប្រួលអ្វីទេ ការប្រកួតវគ្គផ្ដាច់ព្រ័ត្រ AFC Cup ក្នុងតំបន់អាស៊ាននឹងធ្វើឡើងនៅថ្ងៃទី២២ ខែកុម្ភៈ ឆ្នាំ២០២៤៕

អត្ថបទ៖ ផា រតនា