ភ្នំពេញក្រោនចប់ភារកិច្ច AFC Cup ត្រឹមវគ្គពាក់កណ្តាលផ្តាច់ព្រ័ត្រតំបន់អាស៊ាន

ក្រុមភ្នំពេញក្រោនបានបញ្ចប់ភារកិច្ចរបស់ខ្លួនត្រឹមវគ្គពាក់កណ្ដាលផ្ដាច់ព្រ័ត្រពាន​រង្វាន់ AFC Cup ឆ្នាំ​២០២៣-២៤ ប្រចាំ​តំបន់​អាស៊ាន បន្ទាប់​ពី​ចាញ់ក្រុម​ខ្លាំងអូស្ត្រាលី Central Coast Mariners ដោយ​លទ្ធផល ៤-០ នា​ល្ងាច​ថ្ងៃទី​១៣ ខែ​កុម្ភៈ ឆ្នាំ​២០២៤។

ភ្នំពេញក្រោន​ធ្វើ​បានយ៉ាងល្អ​ក្នុង​ពាន​រង្វាន់​ AFC Cup ​ក្នុង​ដំណើរយ៉ាងវែងឆ្ងាយតាំងពីវគ្គជម្រុះបឋមរហូតដល់វគ្គពាក់កណ្ដាលផ្ដាច់ព្រ័ត្រក្នុងតំបន់អាស៊ាន។

ការ​ប្រកួត​វគ្គទី១ ភ្នំពេញក្រោនមិនអាចបង្កើតល្អណាមួយក្នុងការស៊ុតសំដៅទីគូប្រកួតបានទេ។ ផ្ទុយទៅវិញត្រូវបានក្រុម Central Coast Mariners បើកការនាំមុខ ១-០ នៅនាទី៣៧ ស៊ុតបញ្ចូលដោយកីឡាករ Jing Reec។ នៅ​​វគ្គទី២ ក្រុមម្ចាស់​ផ្ទះ​នៅតែបន្តសម្រុក និង​ព្យាយាមបង្កើត​ឱកាស​ជាច្រើន។ ​នាទី៧២ រក​បាន​គ្រាប់បាល់ទី២ នាទី៧៨​រក​បាន​​គ្រាប់​ទី៣ និង​នាទី​៩០+៥ រក​បាន​គ្រាប់​ទី៤ ​​ដោយ​កីឡាករ​អង់គ្លេស​ Ryan Edmondson ​ដែល​ទើប​ប្តូរ​ចូល​រក​បាន​៣​គ្រាប់​ម្នាក់ឯង។

ក្រុម Central Coast Mariners បាន​ឡើង​ទៅ​ជួប​ក្រុម​អូស្ត្រាលី​ជា​មួយ​គ្នា​គឺ Macarthur FC វគ្គផ្ដាច់ព្រ័ត្រ AFC Cup ​ប្រចាំ​តំបន់អាស៊ាន នៅថ្ងៃទី២២ ខែកុម្ភៈ ឆ្នាំ២០២៤។ ស្រប​ពេល ភ្នំពេញក្រោន ជា​ក្លិប​តំណាង​កម្ពុជា​ និង ក្រុម Sabah មកពីម៉ាឡេស៊ី ធ្លាក់ត្រឹមវគ្គពាក់ព្រ័ត្រនៅទឹកដីប្រទេសអូស្រ្ដាលីដូចគ្នា៕

អត្ថបទ៖ ផា រតនា