កីឡា

វិសាខាប៉ះភ្នំពេញក្រោនដើម្បីបោះជំហានទៅការពារជើងឯកពានរង្វាន់សម្ដេចតេជោ

បានផុស

២ years មុន

នៅ

ថ្ងៃអង្គារ ៩ មេសា ២០២៤

ដោយ

ក្រុមបាលទាត់វិសាខា ត្រូវធ្វើដំណើរទៅជួប ភ្នំពេញក្រោន នៅល្ងាចថ្ងៃទី១០ ខែមេសា ឆ្នាំ២០២៤ នៅវគ្គពាក់កណ្តាលផ្តាច់ព្រ័ត្រ ដើម្បីស្វែងរកឱកាស ឡើងទៅវគ្គផ្ដាច់ព្រ័ត្រ ពានរង្វាន់សម្តេចតេជោ ហ៊ុន សែន ថ្នាក់ជាតិលើកទី១៧ ដែលខ្លួនជាអ្នកការពារជើងឯកឆ្នាំចាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីជើងទី១ ថ្ងៃទី៦ ខែមីនា នៅកីឡដ្ឋានព្រីនស៍ វិសាខា បានត្រឹមស្មើ ២-២ ជាមួយក្រុមភ្នំពេញក្រោនដែលជាពេលមានបញ្ហាពាក់ព័ន្ធនឹងការកាត់សេចក្ដីរបស់ក្រុមអាជ្ញាកណ្ដាលនៅទីលានរហូតធ្វើឲ្យប្រកាសដកខ្លួនចេញពីគ្រប់ការប្រកួត។ យ៉ាងណា កាលពីចុងខែមីនា ពួកគេបានសម្រេចវិលត្រឡប់ចូលទីលានប្រកួតវិញ។

ប៉ុន្មានប្រកួតចុងក្រោយ វិសាខា ធ្វើមិនសូវបានល្អទេ ជាពិសេសការប្រកួតក្នុងលីគបាល់ទះកំពូលកម្ពុជា។ ពួកគេបានចាញ់ ព្រះខ័នរាជស្វាយរៀង ៣-០, ចាញ់ក្រសួងការពារជាតិ ០-២ ប៉ុន្តែចុងក្រោយបំផុត ឈ្នះអង្គរថាយហ្គឺរ ១-០។

ក្នុងនាមជាម្ចាស់ជើងឯកពានរង្វាន់សម្ដេចតេជោ៣សម័យកាលជាប់គ្នា វិសខាត្រូវធ្វើការធ្ងន់នៅពេលជួបម្ចាស់ផ្ទះភ្នំពេញក្រោនដែលជាក្រុមខ្លាំងនៅកីឡដ្ឋាន ស្មាត អរអេសអិន។

ប្រវត្តិជួបគ្នា៥លើកចុងក្រោយរបស់ក្រុមទាំង២៖
-វិសខា ១-២ ភ្នំពេញក្រោន (ខេមបូឌានស៊ុបភើខាប់ ថ្ងៃទី៣០ ខែកក្ដដា ឆ្នាំ២០២៣)
-វិសាខា ០-១ ភ្នំពេញក្រោន (លីគកំពូលកម្ពុជា ថ្ងៃទី១៧ ខែកញ្ញា ឆ្នាំ២០២៣)
-វិសាខា ១-៣ ភ្នំពេញក្រោន (លីគកំពូលកម្ពុជា ថ្ងៃទី៨ ខែធ្នូ ឆ្នាំ២០២៣)
-វិសាខា ១-៣ ភ្នំពេញក្រោន (លីគកំពូលកម្ពុជា ថ្ងៃទី៣ ខែមីនា ឆ្នាំ២០២៤)
-វិសាខា ២-២ ភ្នំពេញក្រោន (ពានរង្វាន់សម្ដេចតេជោ ថ្ងៃទី៦ ខែមីនា ឆ្នាំ២០២៤)

តាមស្ថិតិជួបគ្នា៥លើកចុងក្រោយ វិសាខា រកមិនបានជ័យជម្នះពីភ្នំពេញក្រោនឡើយ។ សម្រាប់ការប្រកួតជើងទី២ នាថ្ងៃទី១០ ខែមេសោ លោក មាស ចាន់ណា គ្រូបង្វឹកវិសាខា ត្រូវស្វែងរកយុទ្ធសាស្រ្ដថ្មី បន្ថែមទៀដើម្បីយកឈ្នះក្រុមភ្នំពេញក្រោន។

កាលវិភាគប្រកួតជើងទី២ ពានរង្វាន់សម្ដេច តេជោ វគ្គពាក់កណ្ដាលផ្ដាច់ព្រ័ត្រ ថ្ងៃទី១០ ខែមេសា
-ព្រះខ័នរាជស្វាយរៀង vs បឹងកេត (ជើងទី១ បឹងកេត ១-៣ ព្រះខ័នស្វាយរៀងស្វាយរៀង)
-ភ្នំពេញក្រោន vs វិសាខា (ជើងទី១ វិសាខា ២-២ ភ្នំពេញក្រោន)

អត្ថបទ៖ ផា រតនា