ពូល E យប់នេះប្រជែងគ្នាខ្លាំង​ដើម្បីកៅអីវគ្គ១៦ក្រុមចុងក្រោយ

ការប្រកួតចុងក្រោយវគ្គសន្សំពិន្ទុពូល​ E នឹងក្លាយជាការប្រកួតដ៏តានតឹងមួយក្នុងព្រឹត្តការណ៍ឆ្នាំនេះ បន្ទាប់ពីក្រុមទាំង៤ក្នុងពូលនេះ មាន​៣ពិន្ទុស្មើគ្នា​ពី​ការ​ឈ្នះ​១​ប្រកួត និង​ចាញ់​១​ប្រកួត​ដូច​គ្នា។

វេលាម៉ោង១១យប់ ថ្ងៃទី២៦ ខែមិថុនា ក្រុមទាំង៤ក្នុងពូល E ត្រូវ​ប្រកួតដំណាលគ្នាក្នុងវគ្គសន្សំពិន្ទុចុង​ក្រោយ។ ក្រុមជម្រើស​ជាតិស្លូវ៉ាគីជួប​ជម្រើសជាតិរូម៉ានី ហើយ​អ៊ុយក្រែន​ជួប​បែលហ្ស៊ិក។ ឆ្លងកាត់ការប្រកួត២លើកកន្លងមកក្រុមទាំង៤ ឈ្នះ១ ចាញ់១ មាន៣ពិន្ទុដូចគ្នា។ នេះហើយជាមូលហេតុដែលធ្វើឲ្យការប្រកួតក្នុងពូល​តានតឹងជាងពូល​ផ្សេង​ៗ។

ការប្រកួតយប់នេះ ប្រសិនបើក្រុមមួយណាចាញ់ នោះពួក​គេ​នឹង​អស់​ឱកាសឡើង​វគ្គ១៦ក្រុមចុងក្រោយ ប៉ុន្តែបើលទ្ធផលស្មើគ្នាទាំង២គូ នោះក្រុមដែលមានគ្រាប់បាល់ចំណេញតិចជាងគេនឹងត្រូវធ្លាក់ត្រឹមវគ្គសន្សំពិន្ទុ៕

អត្ថបទ៖ ផា រតនា