លោក Rivaldo ជំរុញឲ្យប្រេសុីល​ហៅ Hulk និង Silva មកជួយ​វគ្គជម្រុះ World Cup

អតីតកីឡាករបាល់ទាត់ប្រេសុីល Rivaldo បានជំរុញឲ្យក្រុមគ្រូ​បង្វឹក​ជម្រើសជាតិប្រេស៊ីលកោះហៅកីឡាករ Hulk និង Thiago Silva មកជួយក្រុមក្នុងការប្រកួតវគ្គជម្រុះពានរង្វាន់ World Cup ក្នុងតំបន់អាមេរិកខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រេសុីលក្រោមការដឹកនាំរបស់លោក Dorival Junior បានចាញ់ក្រុមប៉ារ៉ាហ្គាយ ក្នុងលទ្ធផល ១-០ ក្នុង​ការប្រកួតជម្រុះ World Cup ឆ្នាំ២០២៦ ដែលធ្វើឲ្យពួកគេឈរនៅចំណាត់ថ្នាក់ទី៥ ក្នុងតារាងពិន្ទុ។ ការប្រកួតជាមួយ​ប៉ារ៉ាហ្គាយ លោក​គ្រូ​បង្វឹក​បានដាក់តារាឆ្នើម Real Madrid ទាំង៣នាក់គឺ Vinicius, Rodrygo និង Endrick ក្នុងតំបន់ប្រយុទ្ធ ប៉ុន្តែជាលទ្ធផលពួកគេមិនអាចរកគ្រាប់ស៊ុតបញ្ចូលទី​ឡើយ។

ក្រោយឃើញទម្រង់លេងមិនសូវល្អ លោក Rivaldo ជាសមាជិកជួយឲ្យប្រេសុីលឈ្នះ​ជើង​ឯក​ពិភព​លោក​ World Cup ឆ្នាំ២០០២ បានណែនាំឲ្យ​យក​ខ្សែប្រយុទ្ធ Hulk និងខ្សែការពារ Fluminense របស់ក្រុម Atletico Mineiro និង Thiago Silva គួរតែត្រូវបានកោះហៅមកជួយក្រុមជម្រើសជាតិវិញ។ Hulk បានតំណាងឲ្យប្រេស៊ីលចុងក្រោយបំផុតនៅក្នុងឆ្នាំ២០២១។ អតីតខ្សែការពារ Chelsea កីឡាករ Thiago Silva មិនត្រូវបានកោះហៅចូលរួមក្រុមជម្រើសជាតិប្រេសុីល បានចាប់តាំងពីការចាញ់ការប្រកួត World Cup ឆ្នាំ២០២២ នៅវគ្គ៨ក្រុមចុងក្រោយក្រោមស្នាដៃក្រូអាត។

នៅក្នុងបទសម្ភាសន៍ជាមួយ Betfair លោក Rivaldo បាននិយាយថា ៖«តាមអ្វីដែលខ្ញុំបានឃើញក្នុងការប្រកួតកាលពីម្សិលមិញ ប្រសិនបើអ្នកហៅ Hulk មក ទោះបី​វាមិនមែន​ជា​កាប្រកួត World Cup​ ជុំចុងក្រោយក៏ដោយ ប៉ុន្តែគាត់នឹងក្លាយជាជំនួយដ៏ធំធេងក្នុងវគ្គជម្រុះនេះ។ Thiago Silva គួរត្រឡប់​មកវិញ​ដើម្បីជួយក្រុម។ ពួក​គេ​អាច​ទប់​ទល់​នឹង​សម្ពាធ​»។

Rivaldo បានរិះគន់យ៉ាងខ្លាំងចំពោះទម្រង់លេងរបស់ប្រេស៊ីល​ជា​មួយ​ប៉ារ៉ាហ្គាយ ហើយបានចាត់ទុក​ជាការលេងដ៏អន់បំផុត។

លោកបានបន្ថែមថា ៖«វាមិនមែនជា​ការ​លេង​របស់​ប្រេស៊ីល ដែល​អ្នក​គាំទ្រ​ចង់​ឃើញ​នោះ​ទេ។ ប្រសិនបើយើងចាញ់ក្រុមឈីលី វានឹងកាន់តែស្មុគស្មាញ»៕

ប្រែសម្រួល៖ ផា រតនា