កីឡាករថៃ Davis ​អាច​ប្រឈម​ការចាប់ខ្លួន បើ​ទៅលេង​នៅសិង្ហបុរី​ក្នុង​ពាន AFF Cup

ខ្សែបម្រើជម្រើសជាតិថៃ Ben Davis ត្រូវបានចោទប្រកាន់ពីបទរំលោភលើ​កាតព្វកិច្ច​បម្រើជាតិ​ ក្នុង​នាម​ជា​ពលរដ្ឋ​សិង្ហបុរី ហើយអាច​ប្រឈម​នឹង​​ការ​ចាប់ខ្លួន ប្រសិនបើរូបគេ​ធ្វើ​ដំណើរ​ជា​មួយ​ជម្រើស​ជាតិ​ថៃ​​ ទៅ​ប្រកួត​ជា​មួយ​សិង្ហបុរី ក្នុងពានរង្វាន់ AFF Cup 2024។

Davis ស្ថិតក្នុងបញ្ជីកីឡាករថៃចំនួន២៦នាក់​ដែល​ត្រៀម​ខ្លួន​ចូលរួមប្រកួត​ពានរង្វាន់ AFF Championship 2024។ ថៃត្រូវប្រកួត​ជា​មួយ សិង្ហបុរី នៅថ្ងៃទី១៧ ខែធ្នូ ឆ្នាំ២០២៤។ យោងតាមកាសែត The Straits Times ខ្សែបម្រើរូបនេះប្រឈមនឹងការចាប់ខ្លួន ដោយសារ​រូប​​គេ​មិនទាន់បានបញ្ចប់​កាតព្វកិច្ច​ក្នុងការបម្រើជាតិរបស់​ខ្លួន​​ក្រោមច្បាប់សិង្ហបុរី។

កាសែត​នេះ​បាន​បន្ត​ថា សមាគម​បាល់ទាត់​ថៃ និង​កីឡាករ Ben Davis បាន​បដិសេធ​​ធ្វើ​អត្ថាធិប្បាយ​លើ​បញ្ហា​នេះ​។ រឿងនេះត្រូវបាន​កើត​​ឡើងម្ដង​ហើយ នៅពេល​ប្រទេសថៃកំពុង​ត្រៀម​​ក្រុម​ជម្រើស​ជាតិ​ប្រកួត​ពាន​រង្វាន់​ AFF Cup 2020 នៅប្រទេសសិង្ហបុរី ហើយកីឡាករ Davis ស្ថិត​ក្នុងបញ្ជីបឋម ប៉ុន្តែគ្រូបង្វឹក​ថៃ លោក Mano Polking មិន​បាន​កោះ​ហៅ​ក្នុង​បញ្ជី​ចុង​ក្រោយ​។

Davis កើតនៅខេត្ត​ភូកេត ប្រទេស​​ថៃ​ ក្នុងឆ្នាំ២០០០ ​ដែល​មានម្តាយជនជាតិថៃ និងឪពុកជនជាតិអង់គ្លេស។ រូប​គេ​បាន​ផ្លាស់​ទៅ​ប្រទេស​សិង្ហបុរី​ជាមួយ​គ្រួសារ​នៅ​ពេល​​អាយុ៥ឆ្នាំ។ រយៈ​ពេល​៤​ឆ្នាំ​ក្រោយ​មក រូប​គេ​បាន​ក្លាយ​ជា​ពលរដ្ឋ​សិង្ហបុរី។ ខ្សែបម្រើរូបនេះធ្លាប់លេងឲ្យក្រុម​ជម្រើស​ជាតិ​សិង្ហបុរី​អាយុ​ក្រោម​​១៦​ឆ្នាំ (U16) និង​​ក្រុម​អាយុ​ក្រោម​១៩​ឆ្នាំ (U19)។ រូប​គេ​ធ្លាប់​​ត្រូវ​បាន​កោះហៅចូល​រួម​ក្រុម​សិង្ហបុរី​ជម្រើស​ទី១ នៅ​​ឆ្នាំ២០១៨ ប៉ុន្តែ​រូប​គេ​មិន​បាន​ចូល​​ឡើយ។ ​កាល​ពី​មួយឆ្នាំមុន Davis បានក្លាយជាកីឡាករសិង្ហបុរីទី​ដែលបានចុះកិច្ចសន្យាទៅលេងនៅ Premier League ជាមួយក្លិប Fulham។ Davis បានដាក់ពាក្យសុំទៅក្រសួងការពារជាតិរបស់សិង្ហបុរី​ ដើម្បីពន្យាពេលវេលា​បម្រើជាតិ ប៉ុន្តែត្រូវបានច្រានចោល។

នៅ​ពេល​នោះ សំណុំរឿង​របស់កីឡាករ Davis ត្រូវ​បាន​នាំ​ទៅ​កាន់​សភា​សិង្ហបុរី។ រដ្ឋមន្ត្រីក្រសួងការពារជាតិ លោក Ng Eng Hen បានធ្វើការបដិសេធសំណើពន្យារពេលនេះ។ ឪពុករបស់ Davis គឺលោក Harvey Davis បានបដិសេធដោយឥតឈប់ឈរ ក្នុងការផ្តល់កាលបរិច្ឆេទពិតប្រាកដនៅពេល​កូនប្រុសរបស់​លោក​នឹងត្រលប់មកបម្រើជាតិវិញ។

កាលពីខែកុម្ភៈ ឆ្នាំ២០១៩ ក្រសួងការពារជាតិសិង្ហបុរីបាននិយាយថា Davis បានបរាជ័យក្នុងការបំពេញកាតព្វកិច្ចជាតិ​។ រូប​គេ​​​​កំពុង​ស្នាក់​នៅ​ក្រៅ​ប្រទេស​ដោយ​មិន​មាន​លិខិត​អនុញ្ញាត​ចេញ​ចូល​ត្រឹមត្រូវ។ អ្នកបំពានច្បាប់ចុះឈ្មោះចូលរៀនរបស់សិង្ហបុរីអាចប្រឈមមុខនឹងការជាប់ពន្ធនាគាររហូតដល់៣ឆ្នាំ និងពិន័យជាប្រាក់១០,០០០ដុល្លារ។

ថៃ​បាន​កោះ​ហៅ​កីឡាករ​គ្រប់​គ្រាន់​តាម​បទ​ប្បញ្ញត្តិ AFF Cup 2024។ ទោះជាយ៉ាងណា ក្រុមជម្រើសជាតិនីមួយៗត្រូវបានអនុញ្ញាតឱ្យចុះឈ្មោះកីឡាករតែ២៣នាក់ប៉ុណ្ណោះក្នុងក្រុមផ្លូវការ មុនពេលការប្រកួត។ ដូច្នេះ Davis ប្រហែល​មិន​អាចចូលរួមជាមួយក្រុមទៅលេងនៅប្រទេស​សិង្ហបុរី​ទេ ​ដើម្បី​គេច​ពី​ហានិភ័យ​ផ្លូវ​ច្បាប់៕

ប្រែសម្រួល៖ ផា រតនា