Arteta ពេញចិត្តខ្លាំងទម្រង់លេងកីឡាករ​វ័យ​១៧​ឆ្នាំ Nwaneri

គ្រូបង្វឹកក្លិប Arsenal លោក Mikel Arteta ពេញចិត្តទម្រង់លេងរបស់ខ្សែបម្រើ Ethan Nwaneri យ៉ាងខ្លាំងបន្ទាប់ពីកីឡាករវ័យ១៧ឆ្នាំរូបនេះ រកជ័យជម្នះជូនក្រុម ហើយទទួលបានកៅអីឡើងទៅវគ្គ១៦ក្រុមចុងក្រោយ ក្របខ័ណ្ឌ Champions League។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Nwaneri ដែលបានចូលរួមជាមួយ Arsenal តាំងពីអាយុ៨ឆ្នាំ ត្រូវបានអ្នកគាំទ្រ ចាប់អារម្មណ៍កាន់តែខ្លាំងក្រោយគ្រូបង្វឹកដាក់ឲ្យលេងជំនួយតំណែងរបស់កីឡាករ Bukayo Saka ដែលរងរបួសសរសៃពួរកាលពីចុងខែធ្នូ។

ខ្សែបម្រើវ័យក្មេងនេះជាតួអង្គសំខាន់ជួយឲ្យក្លិប Arsenal យកឈ្នះក្លិប Girona ក្នុងលទ្ធផល ២-១។ គ្រាប់បាល់ជ័យជម្នះកើតឡើងពីការស៊ុតបញ្ចូលទីរបស់កីឡាករ Nwaneri នៅនាទី៤២ ក្នុងការប្រកួតនៅកីឡដ្ឋាន Estadi Montilivi ហើយនោះក៏ជាគ្រាប់បាល់ដំបូងរបស់គេ ក្នុងពានរង្វាន់ UEFA Champions League។ ក្រោយបញ្ចប់ការប្រកួត រូបគេក៏បានឈ្នះពានរង្វាន់​កីឡាករល្អ​ប្រចាំ​ការ​ប្រកួត។

លោក Mikel Arteta បាននិយាយថា ៖«គាត់​មាន​ភាព​ប្រជែងខ្លាំង​ណាស់​ ពេល​គាត់​បាន​បាល់ ហើយ​មាន​ទំនុក​ចិត្ត​ខ្លាំង។ ​មុន​ពេលគាត់ចង់ធ្វើ​សកម្មភាពអ្វី​មួយ​ គឺសម្រេចចិត្ត​បាន​​ត្រឹមត្រូវ តាមអ្វីដែលគាត់ចង់បាន។ គាត់​មាន​សមត្ថភាព​បញ្ចប់​ទីគ្រប់​ជ្រុង»។

ការប្រកួតបន្ទាប់ Arsenal បន្ទាប់​ ត្រូវ​ទទួល​ក្រុម​លេខ​៤ Manchester City ក្នុងពានរង្វាន់ Premier League នៅ​ថ្ងៃ​អាទិត្យ។ បច្ចុប្បន្នក្រុម​របស់លោក Arteta ស្ថិត​ក្នុង​ចំណាត់​ថ្នាក់​លេខ​២ នៅលីគកំពូលអង់គ្លេស ដោយ​តាម​ពី​ក្រោយ​ក្រុមលេខ១ Liverpool ចំនួន​៦​ពិន្ទុ​ ខណៈក្រុមហង្សក្រហមសល់មួយប្រកួតទៀតក្នុងដៃ៕

ប្រែសម្រួល៖ ផា រតនា​