Nieto ឈរជាអ្នកឈ្នះស្បែកជើងមាស ខណៈវីរៈ ដារ៉ា ឈរជាអ្នកឈ្នះស្រោមដៃមាសរដូវកាលនេះ

ខ្សែបម្រើប្រយុទ្ធ Andres Nieto របស់ភ្នំពេញក្រោន នឹងក្លាយជាម្ចាស់ស្បែកជើងមាស និងអ្នកចាំទីវីរៈ ដារ៉ា របស់ព្រះខ័នរាជស្វាយរៀង នឹងក្លាយជាម្ចាស់ស្រោមដៃមាស សម្រាប់លីគកំពូលកម្ពុជា Cambodian Premier League នៅរដូវកាលនេះ។

ការប្រកួតប្រជែងក្នុងក្របខណ្ឌលីគកំពូលកម្ពុជា Cambodian Premier League រដូវកាល ២០២៤-២០២៥ នេះបានបិទបញ្ចប់ជាផ្លូវការត្រឹមល្ងាចថ្ងៃ អាទិត្យ ទី ១៨ ខែ ឧសភា ម្សិលមិញ ក្នុងនោះក្រុមជើងឯកបានទៅលើក្រុមព្រះខ័នរាជស្វាយរៀង។ ចំណែកជើងឯករងបានទៅលើក្រុមភ្នំពេញក្រោន និងក្រុមលេខ ៣ បានទៅលើ វិសាខា។

នៅក្នុងរដូវកាលនេះ Nieto បានក្លាយជាអ្នកស៊ុតបញ្ចូលទីច្រើនជាងគេប្រចាំលីគកំពូលកម្ពុជា ហើយក៏ជាបេក្ខភាពនឹងឈ្នះស្បែកជើងមាសផងដែរ ដោយរូបគេស៊ុតបញ្ចូលទីសរុបបានចំនួន ២១ គ្រាប់ ឈរនៅលើខ្សែប្រយុទ្ធវិសាខា កីឡាករ Anorade Souza Ramon ដែលមាន ២០ គ្រាប់។ ចំណែកចាំទី វីរៈ ដារ៉ា នឹងក្លាយជាម្ចាស់ស្រោមដៃមាស បន្ទាប់ពីឈរនៅលេខរៀងទី ១ ក្នុងនាមជាអ្នកបិទសំណាញ់ទីមិនឱ្យគូប្រកួតស៊ុតបញ្ចូលទីច្រើនបំផុត (clean sheet) នៅរដូវកាលនេះរហូតដល់ទៅ ១៤ ប្រកួត។

សូមបញ្ជាក់ថា ការលើកពាន Cambodian Premier League របស់ព្រះខ័នរាជស្វាយរៀង បានធ្វើរួចរាល់ជាផ្លូវការហើយកាលពីថ្ងៃទី ១៨ ខែ ឧសភា ម្សិលមិញនៅកីឡដ្ឋានខេត្តស្វាយរៀង ក្រោមក្រសែភ្នែកអ្នកគាំទ្រជាង ៤,០០០ នាក់៕

អត្ថបទ៖ សេម កុសល